Read Medumba Ezékia 32 Bible Online

Ezékia 32 - Medumba bible

Ezékia 32

¹A lo be kum ngu'njù ntshob bàa gham mum mbwe lé'njù mum maṅwù ntshob bàa gham, Tshùaben tshob me ndù:

²Mén mèn, yob nsindàvù, ma' njom num Faraon, mfen Egipto ntshob yi ndù: Metshab ngwayit ngôngô, bo biagt'o. O lo ke mfut'a ngànyàm mum ntse, nke nzinte mum nta'ntse, nke ndo' nku mu nkamte ntse yi, nke nyi'te fetntse.

³Tshùaben Nsi tshob ndù: Me nsi ma' fot sàm num o, mbwe nzwit benntùn yàme; bo nsi soṅ o num tsha' ma' ntùm fot sàm.

⁴Me nsi faṅ o bwe num tsha'a; me nsi tam o mum tsha'a. Me nsi ghù nsaṅ se' num o. Me nsi fà o ba nyàm mba jujù yub là.

⁵Me nsi yèn mbàb o num ba mbale. Me nsi naṅ mfémfé wul o ntùm ntômbo' k'a dune.

⁶Me nsi lo' lem tsho zwi' ngô z'o tshwèt nzinte mum bwe là yi tà nèn nkum num ba mbale. Me nsi lo' zwiagte ntômbo' yi.

⁷Me nsi kabte kamànyam ndùse me nsi biagt'o là. Me nsi ghù nsa sènte. Me nsi lo' ndot kabte lagnyam yi, maṅwù be ke bèn nefà nelàn i.

⁸Tshùaben Nsi tshob ndù: Me nsi tshùa num tu o ghù tshu nelàn (nsa mi a) ts'a mfe kamànyam nà sènte. Me nsi kag njam mum yu ngô.

⁹Me nsi ghù ntù benntùn b'a ntùm zwe ndùse me nsi tshag tsho kuan ntsho netèt ntumntum, mum ngô ts'o ke' lèn nà.

¹⁰A nsi tshùa num tu o me ghù ngô yàm bwôge. Fétwut nsi ghom fenfen tshob ndùse me nsi shùte ṅwi àm ntshu bo là. Mba we lo netèt bo nsi vètte neshu num yôg se mum lé'njù s'o vù nsi là.

¹¹Tshù mba Tshùaben Nsi tshob li: Ṅwi mfen Babilon nsi yab mbu num o.

¹²Me nsi ghù ghama' ntsho lo' ṅwi mbiagte yu nzwit mèn yi. Bagkèt benntùn netèt ngôngô fa nsi kôg ko'tewut ngô Egipto ma' nsi. Bo nsi biagte njoṅ tse benntùn fa mum ngô.

¹³Me nsi biagte njoṅ tse nyàm fa mbaṅ mi nta'ntse ndùbndùb, mi nku mènntùn ke mi nyàm no ke nsi bèn kamt'é là.

¹⁴Ndùlala Tshùaben Nsi tshob ndù: Me nsi faṅ ntse mi a mum nta'ntse là tswe ndù kam, me ghù nta'ntse ke nswe' mba mfèt là.

¹⁵Ndùse me nsi lo' Egipto kaṅ kônkwa yi, tswitte njoṅ bon tshu fa ts'a ghù, labte benntùn tse bo be ntùm bwe là, bo nsi lèn ndù a b'a me bèn mbe Tshùaben.

¹⁶Tshùaben Nsi tshob ndù: A b'a lèn yen nsindàvù li ze ngôngô ba tum nsi yob là; bo nsi yob i num Egipto, yob i num tse benntùn.

¹⁷A lo be kum ngu'njù ntshob bàa gham, mum lé'njù ntshob tàn gham mum ṅwù, Tshùaben tshob me ndù:

¹⁸Mén mèn, yob nsindàvù num ba Egipto, ntèn yub boa ngonngon ngô neta mum tsha'a, boa njoṅ benntùn fa tse be bo kwù là.

¹⁹We z'o tshùa i bwô à? Swe' nèn nô bin à ba kesiket!

²⁰Bo nsi vù netèt ben tse bo kwù num ntshùag ṅwi là. Bo fà ṅwi. Bin lo' Egipto boa ben tse fa.

²¹Ba neta sa'nde' nsi tshob nu Faraon mà ntùm fi boa ben tse bo ke ntomt'é là. Bo lo tshoṅ yub bo swe' nôte bwe, ba kesiket tse bo kwù num ntshùag ṅwi là.

²²Asiria b'a bwe bo ze ntshu ntsho ndù bo diaṅ fi se mbume. Njoṅ yub fa lo kwùt'a num ntshùag ṅwi.

²³Mfi mi b'a tà bam tsha'a. Ntshu ntsho i diaṅ fi se mbume. Njoṅ yub fa kwù, njoṅ yub fa kwùt'a num ntshùag ṅwi. Bo na' mbèn nke nkag bwôg mum ngô ben tse bo be ntùn nà.

²⁴Elam b'a bwe bo ze ntshu ntsho ndù bo diaṅ fi se mbume. Njoṅ yub fa lo kwùt'a num ntshùag ṅwi. Bo lo be swe' nèn bam tsha' mb'a ba kesiket. Bo na' mbèn nke nkag bwôg mum ngô ben tse bo be ntùn nà. Tuswe lo tsho tu bo boa ben tse be bo kwù là.

²⁵Bo fà se kunndà netèt tshen fe ben nà. Ze ntshu ntsho diaṅ fi se mbume, bo tse bo b'a ba kesiket, ndù bo kwùt'a num ntshùag ṅwi là. Bo na' mbèn nke nkag bwôg mum ngô ben tse bo be ntùn nà. Tuswe tsho tu bo boa ben tse bo kwù là. Bo yabte yub netèt fe ben.

²⁶Moab bo Tubal b'a bwe boa tshob ntshu ntsho ndù bo diaṅ mfi mub mbume. Njoṅ yub fa b'a ba kesiket, ndù bo kwùt'a num ntshùag ṅwi. Bo na' mbèn nke nkag bwôg mum ngô ben tse bo be ntùn nà.

²⁷Bo ke' nôte nsi a boa ba sa'nde' tse bo be mbwembwe là. Tshen nà lo nèn ntùm fi a boa tshob tshu ntsho. A bo là tse bo yab ṅwi yub mbaṅ tu bo, njab tshètntsho yub mbaṅ mvôg mub là. Nummbe bwôg ze ba sa'nde' kag mum ngô ben tse bo be ntùn nà lo ke' bwe.

²⁸Là, wù Faraon o nsi nô netèt ba kesiket, netèt ben tse bo kwùt'a num ntshùag ṅwi là.

²⁹Edom b'a bwe boa fenfen tse, kamkam tse, ndù bo lo tete yub bwe mba mba bo na' ngù neta là boa ben tse bo kwù num ntshùag ṅwi là. Bo nôte nsi boa ba kesiket, boa ben tse be bo kwù là.

³⁰Njoṅ kamkam tse bo tu là boa njoṅ ba Sidon fa b'a bwe. Bo lo be swe' nèn mbaṅ fe ben tuswe nke nko yube, mba mba neta ze bo ghù ke nkag bwôg là. Tshen ba kesiket là lo nôte nsi boa ben tse bo kwù num ntshùag ṅwi là. Tuswe lo tsho tu bo boa ben tse be bo kwù là.

³¹Faraon nsi yen yub ntù i tswe'te num nu ntshu ntsho i, num nu ben tse tse bo kwùte num ntshùag ṅwi là bo ze ntshu ntsho. Tshùaben Nsi bèn ntshobe.

³²Nummb'a lo kag bwôg mum ngô ben tse bo be ntùn nà. Bo nsi nôte netèt ba kesiket boa ben tse bo kwùt'a num ntshùag ṅwi là. Me tshob à Faraon bo njoṅ ze ntshu ntsho fa. Tshùaben Nsi bèn ntshobe.