Read Medumba Ezékia 33 Bible Online

Ezékia 33 - Medumba bible

Ezékia 33

¹Tshùaben tshob me ndù:

²Mén mèn, tshob bon yu nzwit mèn ndù: A be ze me lo' ṅwi ntsho yi ntùm ta' ngô, ba la' tsho' mo' mènntùn netèt bo, ndo' i ngù ntom yi,

³a be ze yen mènntùn ni yen ṅwi nke nse'e, a tô nta num nesoṅ ngô yi,

⁴mènntùn ju' nze nta, ke kù' toṅ num bwe, ndùlala ṅwi se' ngwal i, nzwi i là, mba yen nu là lôt'a be ze tu wut num nu z'a tsho i là;

⁵a ju' nze nta, là ke lo' yen nu là mba ju là. Yen nu là z'a tsho i là lôt'a be yi. Mènntùn z'a ju' nze nta nkù' toṅ bwe là nsi yôg wul i.

⁶Là, a be ze ntom yen mba ṅwi se' ke tô nta nesoṅ benntùn yi, ṅwi se' ngwat benntùn, nzwite mo' ta' i netèt bo là, mba yen mèn ni kwù num mfànnu mi. Nda' ndù me bètte lem tse ntom.

⁷Wù mén mèn, me lo' o ngù ntom yi num tunndà Israél. O nsi ke ju' ntshob mi a tum ntshu àm nà tshob bo num yàm tu.

⁸A be ze me tshob ndù ngatshùagntù nsi kwù, o ke tshob yi ndù a bate ngùninu mi là, mba yen ngatshùagntù là nsi kwù num mfànnu mi, là tu wul àm ghù mbètt'o lem tse.

⁹Là, a be z'o tshob yen ngatshùagntù l'a ke kô nebate ngùninu mi, nkwù num mfànnu mi là, mb'o yôg tu wul o.

¹⁰Wù mén mèn, tshob tunndà Israél ndù: Bin be nke ntshob men ntshob li ndù: Nukebwô tshag boa mfànnu mag tshwèt ndèt num bag, a tshùa num bwe kà bag njobe, be bag yôg à ndùke?

¹¹Tshob bo ndù me Tshùaben Nsi tshob nsaṅlaṅ bwe ntshob ndù me ke' kù ntù à ndù ngatshùagntù kwù, là ndù a bate ngùninu mi, njôge. Tunndà Israél, bin bèn njam, bin bèn njam, ngua' ngùninu min mi kebwô. Numke bin nke nkwùt'a?

¹²Mén mèn, tshob fèt tsho ndù lé'njù se mèn netsin nsi ghù nukebwô là mba nunetsin i ke nsi yôg i. Tshùagntù ngatshùagntù ke nsi ma' i nsi lé'njù s'a nsi kag tshùagntù i nsi là. Be ndaṅndaṅ mèn netsin ke nsi yôg à njam ze nunetsin lé'njù s'a nsi fàn nu là.

¹³A be z'a yi'te num ze nunetsin, ngù nukebwô là, mba bo nsi lagte nunetsine, a tshùa num nukebwô z'a ghù là nkwù.

¹⁴Me tshob be ndù ngatshùagntù a' kwù, l'a gha nukebwô, ngù nu ndaṅndaṅ bo nunetsine,

¹⁵a be z'a ba' ju ze bo fà yi num tshwèt, a be z'a ba' ju z'a na' njé, nze nkàn mi a be mfà yôg, ngua' njoṅ nukebwô fa là, mb'a nsi yôge, ke kwù.

¹⁶Me ke nsi te lag num sàm nukebwô i. A nsi yôg a nummb'a ze nunetsin bo nu ndaṅndaṅ.

¹⁷Fèt tsho be ntshob mbe ngùninu Tshùaben ke' tsin. A b'a mub bèn mbe ke tsin.

¹⁸A be ze mèn netsin kag nu ndaṅndaṅ nsi, ngù nukebwô là mb'a' kwù.

¹⁹A be ze ngatshùagntù gha nukebwô i, ngù numebwô, mbe mèn nenùn nà, mb'a nsi tshùa num bwe yôge.

²⁰Bin be ntshob mbe ze mat neghù Tshùaben ke' tsin a! Ba Israél, me nsi tsho'te mba we lo netèt bin num ngùninu mi.

²¹A lo be kum ngu'njù ntshob bàa gham, mum lé'njù tàn mum maṅwù gham mba bag be ndà kuan nà, mo' mèn lo Yérusalém, nkù nse' la' àm ntshob me ndù: Bo lo' Yérusalém.

²²Tshù, bu Tshùaben lo yab num àm mfetnjù kà njù ndàn mèn z'a kù là nkù nse' nkebnjù. Tshùaben lo gha' ntshu àm ndùse mèn nà ke ṅwag là. Ntshu àm gha', ndùlala me ke bèn mbe ketshob.

²³Tshùaben tshob me ndù:

²⁴Mén mèn, ben tse bo be ntswe ntùm fam ngô Israél là be ntshob ndù: Abraham lo b'a tù' i ndùs'a ghù yen ngô li mba ntsi' là. Mbe se' mba bag tse bag yàm nà, bo ghabte ngô bag.

²⁵Ndùlala, bùnte ntshob bo ndù: Tshù ju ze Tshùaben Nsi tshob li: Bin be mfèt mbàb boa lem ntùm bwe, nke nte lag sin num ba neto tsine; bin be mfètte lem, njôg nke ntshob mbe bo a' ghabte ngô bin à!

²⁶Bin be njé't'a num ṅwi zin, nke ngù tshùaya'nu, mba we lo netèt bin nke mbagte tu nzwi nshun i, nke ntshob mbe bo a' ghabte ngô bin à!

²⁷Tshob bo, tshù ju ze Tshùaben Nsi tshob li: Me tshob saṅlaṅ bwe, ntshob ndù ben tse bo be ntswe ntùm fam nà nsi kwùt'a num ntshùag ṅwi; me nsi fà ben tse bo be mà tshwèt là ba nyàm mba jujù yub là. Ben tse bo be ntswe dù' bo kut ntsiag bo ngabloṅ nà nsi kwùt'a keya'.

²⁸Me nsi ghù ngô tù' fam, ntù' kônkwa. Ju z'a ke mfà neta yi mum ko'tewut là nsi mi. Tuswe nsi kabte tse mbat Israél, sàm mènntùn be ke bèn ntshùa bwe.

²⁹Bo nsi lèn ndù me b'a Tshùaben ndùse me nsi ghù ngô tù' fam, ntù' kônkwa num njoṅ tshùaya'nu tse bo ghù là.

³⁰Wù mén mèn, fèt tsho tshwèt ntsin tsham num o mbaṅ kàbngô mba nzendà mba', nke ntshob bo bo ndù: Bin se'e, ndù be ju' ntshob mi Tshùaben tum be là.

³¹Bo be ntshob ndùlala, nkù nde nse' mbaṅ o, ntswete nsi mbwe o, nju' ju z'o tshob là, là ke yôg nke nze. Tatte num ntshu bo, bo ke ndiag a nda' yub bin.

³²O be bo a mba ngayob kwi nkôni là, ndù o be njob kwi kua' mebwô, mbe yob nke mbu'u. Bo be nju' ntshob mu. Nda' ndù sàm mènntùn ke' be ze ntshob mbile.

³³Ndùse yen nu là nsi se'e - a là z'a se' là - bo nsi lèn ndù ta' ngatshob ntshob Nsi lo be netèt bo.