Read Medumba Ezékia 34 Bible Online

Ezékia 34 - Medumba bible

Ezékia 34

¹Tshùaben tshob me ndù:

²Mén mèn, tshob ntshob ngatshob ntshob Nsi num tse ghabéb mbwe Israél, ntshob ndù: Tshù ju ze Tshùaben Nsi tshob li: Ghandon b'a tse ghabéb mbwe Israél tse bo ke ndiag nda' yub jujù là. Ghabéb mbwe ke bèn nke nkém mbwe ké?

³Bin lo fèt zile, bin lo ket nzwe nyiaṅ njùmbwe. Bin lo zwite mbwe tse bo tshote là, là bin lo ke kém mbwe.

⁴Bin lo ke soṅte mbwe tse bo bot là, ke tswinte tse bo tshwèt ngon nà, ke kut mfaṅ num tse nku mub be'te là, ke ghom tse bo tum lam nà, ke diag tse bo bi là. Là, bin lo lo' neyab nge' bo ntanta ntô yub yi.

⁵Mbwe lo sate, nummbe bo lo ke ghù ngabéb yube; bo lo tù' jujù njoṅ nyàm tshwèt fa, nsate tshobe.

⁶Bwoṅ nyàm àm tshwèt ntsha num tu ba mbale, num tu nkônga ts'a sag là; bwoṅ nyàm àm sate njoṅ dù' fa mum ngô. Yen nu là ke tshwèt ntoṅ sàm mèn, sàm mèn ke tshwèt ndiag i.

⁷Mb'a be ndùlala là, bin ghabéb mbwe bin ju' ntshob Tshùaben.

⁸Tshùaben Nsi tshob ndù: Me tshob nsaṅlaṅ bwe ntshob ndù: Mba mbwe tshàm tù' ju nsa'nsa', ntù' jujù ba nyàm tshwèt mba ngabéb yub ke' bèn mbe tse là, mba tshàm ghabéb mbwe ke' bèn nelab tshob wut num mbwe, ntù' ke nkém a tu wut tshobe, ntù' ke nsot'a be jujù ntshu tu wut tshob là,

⁹a bwô ndù bo ju' ju ze Tshùaben tshob là.

¹⁰Tshùaben tshob ndù a nsi bù' tu i nsi num lèn tshen ghabéb mbwe là. A nsi kùa yub mbwe tse, a nsi kwé bwoṅ mbwe bo ndù kà bo bèn nebéb yube. A nsi tshùa ndùlala, bo be ke bèn nkém wut tshobe. A nsi sô mbwe tse ntshu bo ndù kà mbwe bèn mbe jujù yube.

¹¹Tshù ju ze Tshùaben Nsi tshob li: Tu wul àm nsi kwé bwoṅ mbwe, ke tsha' yub yàm tu.

¹²Ndaṅndaṅ mba ngabéb mbwe be ntsha' bwoṅ mbwe tse bo sate ndùs'a be netèt bo là, be ndaṅndaṅ me nsi tsha' mbwe tshàm. Me nsi sôte yub njoṅ dù' fa tse bo na' nsate nèn bwe là mum lé'njù ndot bo njame.

¹³Me nsi ghù bo tumte ntùm ngô tse bo be bwe là, me nsi kùmte yub ntùm ngô ba tum; lo' yub bèn yi num ko' tshob tsha'a. Me nsi ghù bo ke mfèt nenà num tse mbat Israél, mum ntômbo'o, ntùm njoṅ dù' fa tse benntùn be ntswe bwe mum ngô là.

¹⁴Me nsi kém yub ntùm nkin mbwe mebwô. Me nsi kag yub mum nka' num tu mbat Israél ts'a sag là; bo nsi fite ntùm nka' tse mebwô, fèt nenà ntùm nkin mi nenà yàm bwe num tse mbat Israél là.

¹⁵A b'a me nsi bèn kém tshàm mbwe, a b'a me nsi bèn ghù bo fite. Tshùaben Nsi bèn ntshobe.

¹⁶Me nsi diag mbwe z'a bi là, lo' z'a tum lam nà bèn yi njam. Me nsi kut mfaṅ num z'a ket mfaṅ nà, soṅte ze neta ke' bèn mbe yi là, me nsi lôte tse bo tshote, ngù neta là. Me nsi lo' à nunetsin tshagte yub yi.

¹⁷Mbe se' mba bin nà me mbwe tshàm, tshù ju ze me Tshùaben Nsi tshob li: Me nsi tsho'te mbwe bo bo, tsho'te nkomnjù boa mfot mbwe bo bo.

¹⁸A b'a metsit nu nekém zin ntùm kin mebwô ké, kà bin nke ndo' nku min nyiaṅte tshé' nenà yi à? A b'a metsit nu nenu ntse nelàn ké, kà bin nke ndo' nku min nkamte tshé' i yi à?

¹⁹Mbwe tshàm ke ntù' fèl à ju ze bin lo' nku min nyiaṅte yi là, nke ntù' nu à ju ze bin lo' nku min nkamte yi là.

²⁰A ndùlala Tshùaben Nsi tshob ndù: Me nsi tsho'te njùmbwe z'a tshote là bo z'a jum nà.

²¹Mba bin na' ndo' fat sin bo tshwèttun sin ntèn nyu'nyu' njùmbwe yi, ndo' ndô min ntèn yub yi ma' njù là,

²²tu wul àm, me nsi se' ywimte mbwe tshàm, ndù kà bin sate yub bo ghomte yube. Me nsi tsho'te njùmbwe bo bo.

²³Me nsi tsho' à ta' ngabéb mbwe z'a nsi tshagte yube, kém yub là, a b'a ngafa' àm David. A yi z'a nsi tshagte yube, be ngabéb yub là.

²⁴Tu wul àm Tshùaben nsi be Nsi yub, ngafa' àm David be mfen netèt bo. Tu wul àm Tshùaben tshob ndùlala.

²⁵Me nsi wat kàn fite bag à bo, biagte tshùagkèt nyàm mum ngô, kà bo ke ntswete num nkônkwa ke bwôg, nzite mum mfèn.

²⁶Me nsi tam ntse bo boa dù' ts'a diaṅ kônga àm mbum nà; me nsi tum mbaṅ à num ngelaṅ i, yen nà nsi b'a mbaṅ nelo' ntam ntse yi.

²⁷Tù nsi yam ntàm mi, tsha' fà ntàm mi. Bo nsi tswe mum ngô yube; bo nsi lèn ndù me b'a Tshùaben, ngelaṅ me nsi keb nkù kele' sobe, tshu' yub mum mbu ben tse bo ke mfa' bo là.

²⁸Ngôngô ke nsi bèn ghomte mbwe tshàm, ba nyàm tshwèt ke nsi bèn ghomte yube. Bo nsi tswete ntùm ngô ke bwôg, sàm mèn be ke bèn nkamte yube.

²⁹Me nsi ghù mo' nà nenà bile, benntùn yàm ghamte yen nu là. Yen nà là nsi fà ka'te bo. Kekua ke nsi bèn zwite ngô. Ngôngô ke nsi bèn tshabte yube.

³⁰Bo nsi lèn yen ngelaṅ nà ndù me Tshùaben b'a Nsi yub, tu wut yub ba Israél be yàm nzwit mèn. Tshùaben Nsi bèn ntshobe.

³¹Bin tse bin be mbwe tshàm nà, bin b'a ben tse me be ntshagte là. Tu wul àm, me be Nsi zin. Tshùaben Nsi bèn ntshob ndùlala.