Read Medumba Ezékia 35 Bible Online

Ezékia 35 - Medumba bible

Ezékia 35

¹Tshùaben tshob me ndù:

²Mén mèn, kaṅ wul o ndôte nze bag mbat Seir, ntshob ntshob ngatshob ntshob Nsi num i.

³Tshob bo ndù: Tshù ju ze Tshùaben Nsi tshob li: Mbat Seir, me lo nsi num o, me nyit bu àm num o, me nsi lo' o ghù fam yi, ghù kônkwa yi.

⁴Me nsi sate mu ntusô, Ghù o tù' fam, a tshùa ndùlala o lèn ndù me b'a Tshùaben.

⁵Mb'o na' ngù nkembàn z'a ghô matmat num bon Israél, ndo' ṅwi ntam yi njam bo mum lé'njù nge' sobe, num ngelaṅ ze mfànnu mub dun nte ntshèt là,

⁶me Tshùaben Nsi tshob nsaṅlaṅ bwe ndù me nsi ma' o ntùm lem, lem tam njam o. Mba nu lem na' mbe ke bag o là, lem nsi tam njam o.

⁷Me nsi lo' mbat Seir kaṅ fam yi, a tù' kônkwa. Me nsi biagte ba fe boa ba nèn bwe.

⁸Me nsi ghù fe ben dun num tse mbale. Ben tse ṅwi nsi zwite yub là nsi vùte num mu nkônga, ntùm mu ntômbo', ntùm tsho lekete'.

⁹Me nsi lo' o ghù fam ts'a ghô matmat là yi. Bo ke nsi bèn tswe mum mu ntusô, a tshùa ndùlala bin lèn ndù me b'a Tshùaben.

¹⁰Mb'o tshob ndù: Men ntumla' mbàa li, tshen ngô bàa li, bag nsi lo' yub ghù yag yi, ndù me Tshùaben b'a ntùm bwe là,

¹¹tu wul àm Tshùaben Nsi nsaṅlaṅ bwe ntshob ndù me nsi lo' yantù bo tshùagntù yab nge' yi ndaṅndaṅ mb'o na' ndo' kebàn njab nge' yi num bo là. Me nsi tshùa njam mat ze me tsho't'o là la'te mèn me be yi là.

¹²O nsi lèn ndù me Tshùaben lo ju' njoṅ tshabte fa ts'o tshabte tse mbat Israél yi nke ntshob ndù: Bo sate ba mbale, bo fà yub bag ndù bag mi yube là.

¹³Bin lo tsin tsham kebwô num àm, ntshob ntshob kebwô nzenze num àm. Me lo ju' njoṅ i fa.

¹⁴Tshù ju ze Tshùaben Nsi tshob li. Ngô nsi be tsiaṅte me lo' o ngù fam yi.

¹⁵A nsi tshùa num tsiaṅte z'o ghù mba bo sate ntsi' tunndà Israél, me bèn ngù num o yu be ndaṅndaṅ. Mbat Seir, o nsi tù' fam, wù bo ngô Edom fa. A nsi tshùa ndùlala bo lèn ndù me b'a Tshùaben.