Read Medumba Ezékia 36 Bible Online

Ezékia 36 - Medumba bible

Ezékia 36

¹Wù mén mèn, a bwô ndù o tshob ntshob ngatshob ntshob Nsi num tse mbat Israél, ntshob ndù: Tse mbat Israél, bin ju' ntshob Tshùaben.

²Tshù ju ze Tshùaben Nsi tshob li: A tshùa num mba ngakeban tshwèt ntshob num bin ndù: Ah! Ah! Tshen dù' ṅaṅa matmat li tù' à tshag là!

³Tshob ntshob ngatshob ntshob Nsi ndù: Tshù ju ze Tshùaben Nsi tshob li: Mba benntùn fe bag bag ntsho' ngwù num bin sate zine, ndù bin tù' ju tsemo' ngôngô là, mba bo tshwèt ntsin tsham num tu bin, mba ngôngô tshwèt ngù ndàm num bin nà,

⁴ndùlala bin ju' ju ze Tshùaben Nsi tshob là me tse mbat Israél! Tshù ju ze Tshùaben Nsi tshob tse mbat Israél, mi nkônga Israél, tse lekete' Israél, mi ntômbo' Israél, tse fam Israél boa mi ntusô Israél mi bo ghua' yube, nswèn yub ndù bo lag ntsha' yub, ndù ngô tse bo diaṅ i mbum tshabt'é li:

⁵Mum tonkèt lànghe' sàm, me tam bu àm mum ngôngô, num njoṅ ngô Edom fa. Bo lo lo' ngô àm ngù yub yi, ntshùa njam tsiaṅte yub fa ngwag i ntù bo, ndùlala ndù bo kag njoṅ tshu fa mum ngô. A b'a Tshùaben Nsi bèn ntshobe.

⁶A ndùlala tshob ntshob ngatshob ntshob Nsi ngô Israél, ntshob ba mbat boa nkônga, lekete' boa ntômbo' ndù: Tshù ju ze Tshùaben Nsi tshob li: Ndonni me tshob nu mum lànghe' bo tshùagntù àm. Mba ngôngô be nke ntshabte zin nà,

⁷tshù ju ze me Tshùaben Nsi tshob li: Me bù' bu àm nsi, ntshob nsaṅlaṅ bwe ndù ngô tse bo diaṅ zin mbum nà nsi ket yub tshabte be yub tu.

⁸Mbe se' mba bin, tse mbat Israél là, nkaṅntù min nsi te'e, yam ntàm (tàm) num Israél yàm nzwit mèn, nummbe ze ngelaṅ nebèn njam ghebte.

⁹Tse mbat Israél, tshù me li me se' mbaṅ bin nà, me kaṅ wul àm nke ndôte zine. Bo nsi dù' zine, ywit zine.

¹⁰Me nsi tete benntùn num bin yàme, njoṅ ze tunndà Israél fa. Bo nsi tswete mum ntusô bèn nabte fam kule.

¹¹Benntùn boa nyàm nsi tswete num bin, bwe nzwit yub yàme. Me nsi ghù benntùn tete num bin mb'a be mbwembwe là, me ghù mebwô ntshùa ngelaṅ mbwe. Yen ngelaṅ nà bin nsi lèn ndù me b'a Tshùaben.

¹²Me nsi ghù benntùn yàm nzwit mèn Israél nyiaṅte tsha' tsine. O nsi b'a ze ju, mi ntsi'i, a ke bwô ndù o bèn nkwé bon tse yi.

¹³Tshù ju ze Tshùaben Nsi tshob li: Mba bo be ntshob num o ndù o be mfèt benntùn, nke nzwite bon yu ngô là,

¹⁴ndonni o ke nsi bèn fèt benntùn, ke bèn nzwite bon yu ngô. A b'a Tshùaben Nsi bèn ntshobe.

¹⁵Me ke nsi bèn ghù ngôngô ke ntshabte, tuswe ke nsi bèn ko o mbwe ntumntum, o ke nsi bèn zwite bon yu ngô. A b'a Tshùaben Nsi bèn ntshobe.

¹⁶Tshùaben tshob me ndù:

¹⁷Mén mèn, bon tunndà Israél lo lo' nzin mub boa mfa' mub nsagte ngô yub yi ndùse bo ke ntswe bwe là. Nzin mub lo be mbwe àm a mba sagte ze mènnzwi be mbe ntùm bwe ndùs'a tshwèt njen ṅwù là.

¹⁸A tshùa ndùlala me kag yantù àm num bo, nummbe bo lo fètte lem mum ngô, mbèn ndo' ba neto nsagte ngô yi.

¹⁹Me lo sate yub netèt ntumntum, bo nènte ntùm ngô nzenze. Me lo tsho'te yub a ndaṅndaṅ mba nzin mub bo mfa' mub be yi là.

²⁰Bo lo zin nkum ntùm ngôngô dù' ze bo nèn nà, ntsho bwe ndo' lén sàm se nelàn mba ju banban nà, kà bo nke ntshob mfà num bo ndù: A ze nzwit mèn Tshùaben, bo fet'a ntùm ze ngô.

²¹Ndùlala me lo kô nefà nkuni lén sàm se nelàn se tunndà Israél ke ndo' mba ju banban netèt ngôngô dù' ze bo nèn nà.

²²A ndùlala tshob yen nu li tunndà Israél. Tshù ju ze Tshùaben Nsi tshob li: Bon Israél, me ke' ghù yen nu li a num zin tu. Me ghù a num nkuni lén sàm se nelàne, lén sàm se bin na' ndo' mba ju banban netèt ghakelèn Nsi tse bin nèn netèt bo là.

²³Me nsi tswite nelàn lén sàm se ndùb se bin na' ndo' mba ju banban netèt ngôngô, mbagt'é netèt bo là. Ndùlala ndù ngôngô lèn ndù me b'a Tshùaben, ndùse me nsi tswite nelàn àm num bin mbwe bo là. A b'a Tshùaben Nsi bèn ntshobe.

²⁴Me nsi sôte zin netèt ngôngô, kùmte zin netèt ntumntum, lo' zin bèn yi num tsin tsha'a.

²⁵Me nsi naṅ ntse nelàn num bin, men ntse là nsi lànte zin num njoṅ ṅu' min fa mba njoṅ tshùaya'nu tsin fa.

²⁶Me nsi fà ntù nswe bin, so ywèt nswe num bin. Me nsi tsho' ntù loṅ ze bin ghù là, fà ntù mbàb wut bin.

²⁷Me nsi so ywèt tshàm num bin, ghù kà bin ke nzin mb'a be ntùm ntshù' màm nà, bèn ke ze ntag màm.

²⁸Bin nsi tswe mum ngô ze me na' mfà tà tsin nà. Bin nsi be yàm nzwit mèn, tu wul àm be Nsi zin.

²⁹Me nsi sô zin mum sagte zin. Me nsi ghù ngefet ku'u, ghù ngefet yàme, ndùlala ndù kà nziku' ya zine.

³⁰Me nsi ghù ntù yam ntàm yàme, ghù tsha' fà jujù yàme, ndùlala ndù kà tuswe bèn neko zin num nu nziku' netèt ngôngô.

³¹A nsi tshùa ndùlala bin kwimte nzin min boa mfa' min mi a na' mbe mi kebwô là. Yen ngelaṅ nà bin nsi tshobte tu wut tsin num mfa' min mi kebwô boa tshùaya'nu tse bin be ngù là.

³²Me ke' ghù ndùlal'a num zin tu. A bwô bin lèn ndùlala. A bwô ndù tuswe ko zin num nzin min me bon Israél. Tshùaben Nsi bèn ntshob ndùlala.

³³Tshù ju ze Tshùaben Nsi tshob li: Lé'njù se me nsi lànte zin num mfànnu min nà, me nsi ghù benntùn bèn ntswe ntùm ntusô, bo bèn nkut fam.

³⁴Bo nsi dù' tsha' tse bo ghua' là, tshen tsha' là lo tù' kônkwa num miag ghatshùanze.

³⁵Bo nsi tshob ndù: Yen ngô bo na' sat'é là tù' b'a mba nka' Edèn nà. Ntusô mi mi a tù' fam, bo sate, mèn ke ke ntswe bwe là, bo kut ndonni, benntùn bèn nke ntswe bwe.

³⁶Yen ngelaṅ nà ngôngô tse bo diaṅ zin mbum nà nsi lèn ndù a b'a me bèn mbe Tshùaben, mba ndù me bèn nkut ngô z'a be fam, njwit nà ze bo sate là. A b'a me Tshùaben bèn ntshobe, m'a' ghù yen nu là.

³⁷Tshù ju ze Tshùaben Nsi tshob li: Me nsi be fà ju là tunndà Israél faṅ ndù bo diag àm. Me nsi ghù bo yàme, mbe bwoṅ yube;

³⁸mba bwoṅ nyàm nà, tse bo tsho'te yube, bo be bwoṅ yub ndù bo tse'te mà Yérusalém, ngelaṅ mbumte là. A yen ngelaṅ nà ze ntusô min mi a be fam nsi dun bwoṅ benntùn nà. Bo nsi lèn yen ngelaṅ nà ndù me b'a Tshùaben.