Read Medumba Ezékia 37 Bible Online

Ezékia 37 - Medumba bible

Ezékia 37

¹Tshùaben yab bu i num àm, ndo' àm ntùm ywèle, nèn nte àm netèt mo' tômbo' ndù mvôg dun bwe.

²Tshùaben ghù me zinte mbaṅ men mvôg là, ndiaṅ yub mbume. Men mvôg là lo yàme, nkabte njoṅ tômbo' là fa, ndù bo jum fafa.

³Tshùaben tshob me ndù: Mén mèn, be men mvôg li bèn njôg ké? Me bùnte ndù: Tshùaben Nsi, o bèn ndène.

⁴Ndùlal'a tshob me ndù: Tshob ntshob ngatshob ntshob Nsi men mvôg là ntshob ndù: Mvôg njum, bin ju' ntshob mi Tshùaben tshob là:

⁵Tshù ju ze Tshùaben Nsi tshob bin ni: Me nsi ghù zwiag bèn mbèn num bin, bin bèn njôge.

⁶Me nsi yabte ba nga num bin, ghù mbàb ko' num bwe, ngub kabte bwe. Yen nà nsi be tôg me ghù zwiag bèn num bin ndù bin bèn njôge. A nsi tshùa ndùlala bin lèn ndù me bèn mbe Tshùaben.

⁷Me tshob ntshob ngatshob ntshob Nsi ndaṅndaṅ mba Tshùaben tshob ndù me tshob là. Ndùse me to' netshob là, mo' tshu'te tshùa, nenyi'te be, mvôg kamte, nke ndatte bo bo.

⁸Me lôte, njen ndù ba nga yabte num bo, mbàb ko' num bwe, ngub kabte bwe. Là zwiag lo ke yoṅ mbe num bo.

⁹Tshùaben tshob me ndù: Mén mèn, tshob ntshob ngatshob ntshob Nsi, ntshob zwiag ndù: Tshù ju ze Tshùaben Nsi tshob li: Zwiag, fe num bag njù kuà nse' ntsho num tshen fe ben ni, ndù bo yôge.

¹⁰Me tshob ntshob ngatshob ntshob Nsi be mba me kwé là, zwiag ke ghubte kà ntsho num bo. Ndùlala zwiag bèn bo, bo yôg, ndo ntsinte tù num nku mube, njàme, mbe mba ta' ntshu ntsho là.

¹¹Ndùlala Tshùaben tshob me ndù: Men mvôg li b'a njoṅ ze nzwit ba Israél fa, bo be ntshob ndù: Mvôg mag jum, yag nenywinte kwù, yag nu mi.

¹²A ndùlala tshob men ntshob ngatshob ntshob Nsi li bo. Tshù ju ze Tshùaben Nsi tshob li: Yàm nzwit mèn, me nsi tsho' ntshu mfi mine, me nsi ghù bin tum mum mfi min me lo' zin mbèn yi num tsha' Israél.

¹³Yàm nzwit mèn, bin nsi lèn ndù me b'a Tshùaben ndùse me nsi tsho' ntshu mfi min ghù bin tum bwe là;

¹⁴ndùse me nsi yab zwiag num bin, ghù bin be ntùn, me bèn nte zin mum zin ngô là, bin nsi lèn yen ngelaṅ nà ndù a b'a me Tshùaben bèn ntshobe, mbèn nzwiagte njoṅ i fa. Tshùaben bèn ntshob ndùlala.

¹⁵Tshùaben tshob me ndù:

¹⁶Wù mén mèn, lo' bag tù, nkite lén Yuda bo ba Israél tse boa bo be là num bwe. Lo' mo' bag tù nkite num bwe ndù: Yosèf, tù Efraim bo njoṅ tunndà Israél fa ze boa bo be là.

¹⁷Tamte tshen bag ntshwèn nà ndù a tamte ntù' ta' bag i ntshù', ndùlala ndù a tamte ntùm mbu mu.

¹⁸A be ze bonla' bètt'o ndù: O ke' tote mba yen nu là bagte bag ké,

¹⁹o bùnte bo ndù: Tshùaben Nsi tshob ndù: Me nsi kwé bag tù Yosèf bu Efraim bo nzwit Israél tse boa bo tamte là. Me nsi tamte num bag tù Yuda, lo' ghù ta' bag tù yi, k'a tamte mbe ntshù' bu àm.

²⁰Bag tù ts'o kite ju bwe, ts'a be bu o là nsi be num miag mube.

²¹O nsi tshob bo ndù: Tshùaben Nsi tshob ndù: Me nsi sô bon Israél netèt ngô dù' ze bo nèn nà, tse'te yub bag bag, lo' yub bèn yi mum ngô yube.

²²Me nsi ghù bo tù' ta' ngô ntshù' mum ngô, num tse mbat Israél; njoṅ yub fa nsi ghù à mfen ntshù', bo ke nsi bèn b'a ngô bàa, ke bèn mb'a nufen bàa.

²³Bo ke nsi bèn tshùa njam neto tshob sagte wut tshobe, ghù tshùaya'nu, ke nefàn nu lo. Me nsi sô yub njoṅ dù' fa bo tswe bwe là, dù' ze bo ghù nukebwô là, lànte yube. Bo nsi be yàm nzwit mèn, tu wul àm be Nsi yub.

²⁴Ngafa' àm David nsi be mfen yub, bo ghù ngabéb yub ntshù'. Bo nsi ju' ntshù' màm, bo nsi ze nkàn màm.

²⁵Bo nsi tswe mum ngô ze me na' mfà ngafa' àm Yakob là. Mba tà tshob lo tswe bwe. Bo nsi tswe bwe, bo, bon tshobe, bon bon tshobe, ndùlala njoṅ ndù fa; ngafa' àm David nsi be mfen yub matmat.

²⁶Me nsi wat kàn fite bag à bo, bag à bo wat kàn s'a tswe matmat là; me nsi tete yube, ngù bo yàme, me te mbwe' àm dù' àm ze nelàn netèt bo matmat.

²⁷Dù'ntswe àm nsi be netèt bo, me nsi be Nsi yub, bo be yàm nzwit mèn.

²⁸Yen nà nsi ghù ngôngô lèn ndù me b'a Tshùaben, ndù me bèn ndànte Israél, ndùse dù'ntswe (mbwe') àm nsi be netèt bo matmat là.