Read Medumba Ezékia 38 Bible Online

Ezékia 38 - Medumba bible

Ezékia 38

¹Tshùaben tshob me ndù:

²Mén mèn, kaṅ wul o ndôte ngô Magog, ntshob ntshob ngatshob ntshob Nsi num mfen Gog, ze Méshék bo Tubal.

³O nsi tshob ndù: Tshùaben Nsi tshob ndù: Me lo nsi num o, wù mfen Gog ze Méshék bo Tubal.

⁴Me nsi tshagt'o nenèn bo nefe. Me nsi ma' tùn ntshu o, tum o dù' bin njoṅ yu ntshu ntsho fa, nyàmdiaṅ boa ghako' yube, ndù bo kwi yub kua' mebwô. Bwoṅ yub yàm neshu, ndù bo tshùbte ntshètntsho ndùb boa tse nke'e, mba ba ṅwi.

⁵A tshùbte tshètntsho bo tshe' boa shun tse: Persia, Etiopia bo Put.

⁶Gomer boa njoṅ tse ntshu ntsho fa, tunndà Togarma z'a be tà tu là boa njoṅ tse ntshu ntsho fa boa nzwit benntùn yàm tse bin à bo be là.

⁷Nabte wul o, be tswe nke mbébe, wù bin à njoṅ benntùn z'o ghù mbaṅ o là. Be mfen num yàm njam.

⁸A nsi be tshùa tsemo' lé'njù me soṅ o mb'o ghù là. A nsi be tshùa tsemo' ngu'njù o kab mbu mum ngô ze ba la' tum a num ntshùag ṅwi là. Bo lo sôte yub a netèt ntumntum yàme, ndo' yub nèn yi num tse mbat Israél ts'a na' mb'a kônkwa ngelaṅ yàm nà. Fe ngelaṅ ze bo fagte yub num tsemo' benntùn nà, bo ke ntswe à mum fite njoṅ yub fa.

⁹O nsi ko' tsho mum ngô mba fetmbaṅ neta là, o nsi b'a mba ndot z'a kabte ngô là, wù, njoṅ ntshu ntsho o fa boa bwoṅ benntùn tse bin à bo be là.

¹⁰Tshù ju ze Tshùaben Nsi tshob li: Ba nkwate nsi ko' ntù o num sen lé'njù là. O nsi tàmte nukebwô ntù o.

¹¹O nsi tshob ndù: M'a' lo nsi nkab mbu mum ngô z'a be nge là, me nsi vù num benntùn tse bo tswe mebwô ntùm ndà tshob ke ke mbwôg là. Njoṅ yub fa tswete ntùm ndà tshobe, kàbngô ke be, nzendà ke fùn no ke be.

¹²O nsi tshob ndù: M'a' nèn diag ntsha' ntsho, tswitte ntsha'. Me nsi yab mbu num fam tse bo tshwèt mbèn ntswe bwe là, num nzwit mèn ze bo sôt'é netèt ngôngô là. A ghù bwoṅ nyàm boa tshu, nke ntswe netèt ngô.

¹³Séba bo Dedan, tse ghatantàn Tarsis, boa njoṅ tshob fenfen fa nsi tshob wù ndù: O se' diag à ntsha' ntsho ké? O se' tswitt'a ntsha' kà ntse'te yu bwoṅ benntùn ké? Bo se' lo' à silba bo gol, lo' bwoṅ nyàm boa tshu, diag à ntsha' ntsho ze ndùb ké?

¹⁴Mén mèn, a ndùlala tshob ntshob ngatshob ntshob Nsi, ntshob Gog ndù: Tshù ju ze Tshùaben Nsi tshob li: Ṅ, lé'njù se yàm nzwit mèn Israél nsi tswe fite l'o nsi lène.

¹⁵O nsi fe ntùm yu ngô, tà tu, se' bin yu neta ntshu ntsho, bwoṅ ghako' nyàm.

¹⁶O nsi kab mbu num yàm nzwit mèn Israél mba ta' tu' ndot z'a se' kabte ngô là. A nsi be tshùa tsemo' lé'njù me ghù bo kab mbu num yàm nzwit mèn, ndùlala ndù ngôngô zi'te nelèn àm. Nummbe me nsi la'te nelàn àm njam wù Gog be kua' num miag mube.

¹⁷Tshù ju ze Tshùaben Nsi tshob li: A kua' wù ze me na' ntshùa num ntshu ghafa' tshàm, tse ghatshob ntshob Nsi Israél ntshob tà mbwe ndù me nsi ghù o lo nsi num bo là. A lo be num tshen lé'njù là, tshen ngu'njù là bo yà tshob yen nu là.

¹⁸Tshùaben Nsi tshob ndù: Yantù nsi ko' ntù àm lé'njù se Gog nsi kab mbu num tse tsha' Israél là.

¹⁹Ntùm lànghe' sàm, ntùm tonkèt tshùagntù àm, me tshob, njù' ntùm ntù àm ndù dù' nsi nyi'te mum ngô Israél sen lé'njù là.

²⁰Ngontse ts'a dibantse là boa nsaṅ mi a mfe kamànyam nà nsi vètte mbwe àm. Nyàm tshwèt boa njoṅ nyàm fa tse bo be nsoṅ bam sob num tsha' là; njoṅ benntùn fa tse bo be ntswe num tsha' là, nsi vètte mbwe àm. Ba mbat nsi kôgte vùte nsi, ngondoṅ tsho'te mfémfé, njoṅ kàbngô fa vùte num tsha'a.

²¹Me nsi tsiaṅ ṅwi num Gog num njoṅ tshàm mbat fa. Mba we lo nsi lo' ze ṅwi lo yi nsi num mfèl i. Tshùaben Nsi bèn ntshobe.

²²Me nsi tshùa njam keya' bo lem, tshùa njam tonkèt mbaṅ bo mfé nywinmbaṅ tsho't'é; me nsi ghù mbaṅ mbwôg bo njôg lo num i, num ntshu ntsho tse mba num bwoṅ benntùn tse boa bo be là.

²³Me nsi la'te yàm nezi bo nelàn àm, ghù ngôngô yàm lèn àm. A nsi tshùa ndùlala bo lèn ndù me b'a Tshùaben.