Read Medumba Ezékia 39 Bible Online

Ezékia 39 - Medumba bible

Ezékia 39

¹Wù mén mèn, tshob ntshob ngatshob ntshob Nsi num Gog, ntshob ndù: Tshù ju ze Tshùaben Nsi tshob li: Mfen Gog ze Méshék bo Tubal, me lo nsi num o.

²Me nsi tshagt'o nenèn bo nefe. Me nsi sô o tà tu ndù o lo nsi num tse mbat Israél.

³Me nsi ghù ngoṅkél o ze me be' là tum mum bu o ze kwéb ngwù nsi, me bèn mbe'te nkét mu mum bu o ze zwim.

⁴Wù, njoṅ tsho ntshu ntsho fa boa bwoṅ benntùn tse bin à bo be là, bin nsi vùte num tse mbat Israél. Me nsi ghù o tù' jujù nsaṅe, jujù njoṅ bon tshu nefùtte fa mba ze ba nyàm tshwèt.

⁵O nsi vù mà tshwèt, nummbe me Tshùaben Nsi tshob ndùlala.

⁶Me nsi tum mbwôg num Magog mba netèt ben bo be ntswe ntùm dibantse mum fite là; bo nsi lèn ndù me b'a Tshùaben.

⁷Me ke nsi bèn bam bo lo' lén sàm mba ju banban nà; nummbe me nsi ghù bo lèn lén sàm se nelàn netèt yàm nzwit mèn Israél. Ngôngô nsi lèn ndù me b'a Tshùaben, ndù me b'a mèn nelàn mum Israél.

⁸Nummbe yen nu là nsi bumte, mbe ndù a ghebte. Tshù lé'njù se me na' njà tshob li: Tshùaben Nsi bèn ntshobe.

⁹Benntùn nsi tumte ntùm ntusô Israél kwé'te mbwôg dù' ze bo ton tshu ntshùag bwe là: Ntshètntsho ndùbndùb boa mi nke'e, ngoṅkét, nkét, nkô, fébnsi. Bo nsi kwé'te yen mbwôg là ngu'njù sammbàa.

¹⁰Bo ke nsi bèn nèn mà tshwèt tswitte ntshwèn, ke nèn ntùm fèn keb ntshwèn, nummbe bo nsi lo' à tshu ntshùag nabte mbwôg yi. Bo nsi kwé tshu ben tse bo na' nkwé tshu bo là, lagte ntsha' ben tse bo na' ndagte ntsha' yub là. Tshùaben Nsi bèn ntshobe.

¹¹Me nsi fà dù' tufi Gog sen lé'njù là mum ngô Israél, bag tômbo' ghatshùanze. Bo nsi tshoṅ Gog boa njoṅ ze bwoṅ benntùn fa bwe, ntsiaṅ dù' i ndù tômbo' Hamon-Gog.

¹²Ba Israél nsi yab maṅwù sammbàa nelo' ntshoṅ yub yi bo nelo' mbé'te ngô yi.

¹³Njoṅ benntùn fa mum ngô nsi fa' num sen fi là, tsiaṅte num sen lé'njù là se me nsi tswite ghamt'àm nà. Tshùaben Nsi bèn ntshobe.

¹⁴Bo nsi tsho' benntùn tse bo ke zinte mum ngô ywimte netshoṅ fe ben tse bo ke' num tsha' là. Bo nsi lànte ngô, ke diag fe ben mum maṅwù sammbàa.

¹⁵Bo nsi zinte mum ngô. Ndùse ta' mèn netèt bo nsi yen mvôg ta' mèn nà, mb'a nsi te ta' keki mbaṅ bwe, tà nkum ndùse ghatoṅdù' nsi tshoṅ i fa mum tômbo' bwoṅ ben Gog là.

¹⁶Mba mo' tusô nsi be bwe, bo tsiaṅ i ndù Hamona. A nsi tshùa ndùlala kà bo lànte ngô.

¹⁷Wù mén mèn, tshù mba Tshùaben Nsi tshob li: Tshob nsaṅe, njoṅ bon tshu fa tse nefùtte boa njoṅ nyàm tshwèt fa ndù: Bin tse'te nse'e, bin fe bag bag nkùmte, num jule'te Nsi ze me zwite nyàm bin bwe là. Yen jule'te Nsi ndùb là b'a num tu tse mbat Israél. Bin nsi fèt mbàb, nu lem.

¹⁸Bin fèt mbàb ba sa'nde'e, nu lem fenfen nsitsha'a; bo ba nkomnjù, njùmbwe, mfot mbwe, mfot mfô tse bo be num mbat Basan ndù bo dunte là.

¹⁹Bin nsi fèt nzit kà ywèle, nu lem kà bume, num nyàm tse me zwite bin num sen jùa là là.

²⁰Bin nsi fèt mbàb nyàmdiaṅ boa ze ghako' yub num téblé kà ywèle, fèt mbàb ba sa'nde' boa ze njoṅ ghama' ntsho fa. Tshùaben Nsi bèn ntshobe.

²¹Me nsi tswite nkuni màm netèt ngôngô. Njoṅ ngôngô fa nsi yen yàm netsho'te ntsha, yen nevù ntsha ze bu àm nsi lab yub yi là.

²²Tunndà Israél nsi lèn ndù me b'a Nsi yub neto'te mum sen lé'njù là s'a nsi se' là.

²³Ngôngô nsi lèn ndù me tshùa à njam mfànnu tunndà Israél kà tshag i ndà kuan. Me tshùa njam nukebwô ts'a ghù me là kà tshag i ndà kuan. A lo tshùa ndùlala me lem yub se àm, nswèn yub mum mbu ghakeban tshobe, ndù njoṅ yub fa kwùt'a num ntshùag ṅwi.

²⁴Me lo ghù bo a mba yub nesagte boa mfànnu mub be yi là. Me lo lem yub se àm.

²⁵A ndùlala Tshùaben Nsi tshob ndù: Me nsi lo' tse kuan Yakob bèn yi njam. Me nsi ko ndèn njoṅ tunndà Israél fa, ghù lànghe' num lén sàm se nelàne.

²⁶Ndùlala bo nsi lag tuswe ze bo na' ngù, boa njoṅ nukebwô fa tse bo na' ngù me, ndùse bo ke ntswe fite mum ngô yube, sàm mèn ke be z'a kamte yub là.

²⁷Bo nsi lànte lén sàm num miag ngô yàme, ndùse me nsi kùmte yub mum ngô ghakeban tshobe, ndùse me nsi sôte yub netèt ntumntum nà.

²⁸Bo nsi lèn ndù me b'a Tshùaben Nsi yub z'a na' ntshag yub mba kuan netèt ngôngô, mbèn nke nkùmte yub mum ngô yub là. Me ke nsi faṅ sàm yub mèn netèt tshen ngôngô là.

²⁹Me ke nsi bèn lem yub se àm, nummbe me nsi naṅ ywèt tshàm num tunndà Israél. Tshùaben Nsi bèn ntshobe.