Read Medumba Ezékia 40 Bible Online

Ezékia 40 - Medumba bible

Ezékia 40

¹A na' mb'a ngu'njù ntshob tàn ṅam mbàa mba bag be ndà kuan nà, mbe ngu'njù ntshob kuà gham mba Yérusalém tù' fam nà. Tshùaben yab bu num àm mba ngu'njù to'te là, mum lé'njù gham mum ṅwù, nkel àm sen lé'njù là nèn yi ntùm ngô Israél.

²A lo' àm ntùm ba njem nèn nte àm num mo' nesà mbale, mo' tusô be bwe, nze mà ntèn ndù bo kut.

³Mb'a lo' àm nèn yi bwe là, me yen mo' mèn ndù a be mba tùn fôgtab là, ndù a tshùb nkù bu i bo kam ju nefi' dù' yi, ntsin nzendà.

⁴Yen mèn nà tshob me ndù: Mén mèn, gha' miag mu njene, kù' ntoṅ mu nju'u. Te tu o num ju ze me nsi la'te wù là, nummbe Nsi kel o nse' yi nsen ni à num yen nu là. Soṅ tunndà Israél njoṅ tshu fa ts'o yen nà.

⁵Tshù, mo' kumba' lo be bwe, ndù mba' diaṅ i bag bag mbume. Mo' kam ju nefi' dù' yi lo be bu mèn nà ndù a ghù ma' ntat (mbu ntat). Ta' bu nke ntshùa mba bu i be nto' mbe là. A fi' bam kumba', a b'a mbu ntat, mfi' ntse i nenèn tù, a be mbu ntat.

⁶A lo nèn num nzendà z'a nze bag ntumnyam nà, nko' num tuko' ba', mfi' nkù'ndà nzendà z'a na' ntsho nsi mbu ntat là, mbèn mfi' mo' nkù'ndà nzendà z'a na' ntsho nsi mbu ntat là.

⁷Mba zit to'ndà lo na' mb'a mbu mbàa kam num njoṅ kum tse fa. Ta' nze lo ke mbe netèt nto'ndà mbu mbàa kam. Nkù'ndà nzendà z'a be nze bam ntshundà, nze ntùm bwe lo ghù à mbu ntat.

⁸A fi' bam ntshundà, nzendà, ze ntùm bwe, a tum mbu ntat;

⁹a lo ghù mbu nkuà, ntom tse ta' bu. Bam ntshundà, nzendà b'a ntùm bwe.

¹⁰Nto'ndà lo be tat, bag bag, num bag nzendà z'a be bag ntumnyam nà. Njoṅ nto'ndà fa lo ghù a mfi' ntshù', ntom ts'a be bwe là ghù à mfi' ntshù'.

¹¹A fi' bam nzendà a tum mbu ntàn, mfi' bag i ze nesà, a tum mbu ntôg kam.

¹²Mo' kàb lo be mbwe nto'ndà ndù a ghù kam bu num njoṅ kum tse fa; mba zit to'ndà lo ghù mbu ntat num njoṅ bag tse fa.

¹³A fi' nzendà, neto' num ta' to'ndà nèn nkum num mo', a tum mbu ntshob bàa gham kam, neto' num mo' nzendà nèn num mo'.

¹⁴A siaṅt'a kum mbu ṅam ntat num ntom tse ta' ntshundà be bwe ndiaṅ mbum nà.

¹⁵Dù' z'a be netèt nzendà njù bo bam ntshundà mba nzendà ntùm bwe là na' mb'a mbu ntshob tàn ṅam mbàa.

¹⁶Ntôndà lo be num nto'ndà boa ntom, ndù bo taṅte netàm bwe, num nze tse; a na' mb'a be ndaṅndaṅ njoṅ bam ntshundà fa. Ntôndà lo be mum bwe, ndiaṅ mbume. Ntshatene be num ntom.

¹⁷A lo' àm nèn yi bam ntshundà z'a be njù, dù' ze nto'ndà be bwe, boa dù' tse bo yabte ndoṅ bwe bag bag là. Nto'ndà lo be yen dù' bo yabte ndoṅ bwe là ṅam ntat.

¹⁸Yen dù' là na' mb'a mbaṅ nzendà, nsag à be njoṅ ze nzendà sag là. Yen nà na' mb'a z'a be ntùm bwe là.

¹⁹A fi' bam nzendà neto' num nzendà z'a mànsi là tà nèn nkum num dù' ndoṅ ze ntùm bwe z'a be njam njù là, a tum mbu ṅam ntàn bag ntumnyam bo bag tu.

²⁰A fi' nzendà bam ntshundà njù nelèn mb'a sage, bo mba bam se be là.

²¹Nto'ndà mi lo be ntat ntat bag bag, ntom tse boa tse bam ntshundà lo ghù à be mfi' ntshù' boa mbwe nzendà: Mbu ntshob tàn ṅam mbàa nesage, bo mbu ntshob bàa gham kam num bam se.

²²Ntôndà mi, bam ntshundà i, tshaten tse lo ghù à be mfi' ntshù' bo nzendà z'a bag ntumnyam nà; bo lo ke nko' à num mbu'tuko' sammbàa kà nkum bwe, bam ntshundà i be bwe.

²³Ta' nzendà lo be bam ntshundà njù, mbwe nzendà z'a tshù bag tu là bo mbwe nzendà z'a tshù bag ntumnyam nà. A fi' dù' mbu ṅam ntàn nelo num mo' nzendà nèn nkum num mo'.

²⁴A lo' àm nèn yi nze mà ntèn, dù' ze nzendà z'a be bag ntèn be là. Ba ntom bo bam ntshundà z'a fi' là lo ghù a be mfi' ntshù'.

²⁵Yen nzendà là bo tse bam ntshundà lo ghù ntôndà ndiaṅ mbume; men ntôndà là lo ghù mbu ntshob tàn ṅam mbàa num nesage, ngù mbu ntshob bàa gham kam num bam se, mbe mba memo' ntôndà là.

²⁶Bo lo ke nko' à num mbu'tuko' sammbàa kà nkum bwe, bam ntshundà i be bwe. Tshaten lo be num ntom tse bag bag.

²⁷Bam ntshundà njù lo ghù ta' nzendà nze bag mà ntèn. A fi' mbu ṅam ntàn nelo num mo' nzendà nèn nkum num mo', nze bag mà ntèn.

²⁸A lo' àm nèn yi bam ntshundà ze ntùm bwe, num nzendà z'a tshù mà ntèn nà. A fi' nzendà z'a mà ntèn nà, a tum be mfi' ntshù'.

²⁹Nto'ndà mi, ntom tse boa bam ntshundà tse lo ghù à be mfi' ntshù'. Yen nzendà boa bam ntshundà tse lo ghù ntôndà ndiaṅ mbume, ngù mbu ntshob tàn ṅam mbàa nesage, bo mbu ntshob bàa kam num bam se.

³⁰Bam ntshundà lo diaṅ mbume, ngù mbu ntshob bàa gham kam nesage, bo mbu mbàa kam num bam se.

³¹Bam ntshundà nzendà ke nèn nkum à mum ntshundà njù; ba tshaten lo be num ntom tse, ngù mbu'tuko' fom neko' nkum bwe.

³²A lo' àm ntsho yi ntùm bam ntshundà z'a be bag mbinyam nà, mfi'i, a tum be mfi' ntshù'.

³³Ndaṅ mi, ntom tse mba tse bam ntshundà ghù be mfi' ntshù'. Njoṅ sag tse fa mba njoṅ nto' mi fa ghù ntôndà bwe. Nesag ghù nguan mbu' ṅam ntàn bo nezi mbu' ntshob tàn ṅam mbàa.

³⁴Bam ntshundà ntùm ndà, zi nkum bam ntshundà njù. Num njoṅ bag tse fa, bo na' taṅte tshaten num ba ntom tse mbèn ngù mbu'tuko' fome nelo' nko' yi bwe.

³⁵A lo' àm nèn yi bag ze nzendà z'a be bag mfe tu be bwe là, mfi'i, njoṅ i fa fà be mfi' ntshù',

³⁶mba nto'ndà mi, mba ntom tse boa bam ntshundà tse; nzendà lo ghù ntôndà ndiaṅ mbume, ngù mbu ntshob tàn ṅam mbàa nesage, bo mbu ntshob bàa gham kam num bam se.

³⁷Bam ntshundà tse lo ke nèn nkum ntshundà njù; tshaten lo be mba num zit bag ntom tse lo, ngù mbu'tuko' fom neko' nkum bwe.

³⁸Mo' to'ndà lo ke nshù nz'é num ntom nzendà; bo ke nsôg nyàm tse bo ton n'a bwe.

³⁹Ntéblé mbàa lo be bam ntshundà, ndù bo tete yub bag bag bam nzendà. Bo ke nse tô nyàm tse bo tone, jule'te Nsi netamte fa yi bo jule'te Nsi nesôg mfànnu yi à bwe.

⁴⁰Ntéblé mbàa lo be mo' bag nzendà njù, dù' ze bo ke nko' bwe kà ntsho nzendà z'a be bag tu là, ntéblé mbàa lo bèn mbe mo' bag, nze bam ntshundà nzendà.

⁴¹Ndùlala ntéblé lo be mba zit bag nzendà lo nkuà; njoṅ i fa tamte mbe ntéblé fome, mi bo ke nse tô nyàm jule'te Nsi bwe là.

⁴²Ntéblé ndoṅ lo be nsi nkuà, mbe mi nyàm tse bo ton nà; men ntéblé là lo ghù ta' bu nesage, ngù ta' bu num bam se, ngù ta' kam bu nenèn tù. Bo ke njabte tshu nese tô nyàm tse bo ton boa tse tsemo' tshule'te Nsi à num men ntéblé là.

⁴³Ngoṅ tse lo zi nguan njoṅ bu mènntùn, ndiaṅ ba' njam njù mbume; bo yabte mbàb tshule'te Nsi à num men ntéblé là.

⁴⁴Bo lo ke ndo num nzendà ntùm bwe, njen nto'ndà ghayobkwi ntùm ntshundà ntùm bwe. Mo' to'ndà na' mb'a num bag nzendà z'a tu là, nke ntshù mà ntèn, mo' be num bag nzendà z'a bag ntumnyam nà, nke ntshù nze tu.

⁴⁵Mèn nà tshob me ndù: Yen to'ndà li z'a tshwèt ndôte mà ntèn nà b'a ze ghale'te Nsi tse bo be mbéb Ndà Nsi là.

⁴⁶To'ndà ze ntshu i tshwèt ndôte tu là be ze ghale'te Nsi tse bo be mbéb tômbwôg le'te Nsi là. Bo b'a bon Tsadok tse bo be netèt bon Lévi, mbèn nke nèn mbaṅ Tshùaben num nefa' yi là.

⁴⁷A fi' ntshundà, njen ndù bag tse fa be ndaṅndaṅ, mbe mbu ṅam ntàn mba num zit bag i lo. Tômbwôg le'te Nsi na' mb'a mbwe ba'.

⁴⁸A lo' àm nèn yi bam ntshundà ba'. A fi' ntom bam ntshundà, a tum mbu mbàa kam mba zit bag lo. Nzendà ghù ta' bu kam num bam se mba zit bag i lo.

⁴⁹Bam ntshundà lo ghù mbu gham nesage, ngù mbu ntàn kam num bam se. Bo ke nko' à num mbu'tuko' kà nkum bwe. Mbwoṅ lo be mbaṅ ntom bag bag.