Read Medumba Ezékia 41 Bible Online

Ezékia 41 - Medumba bible

Ezékia 41

¹Yen mèn nà lo' àm nèn yi ntùm Ndà Nsi. A fi' ba ntom, a tum mbu ntat bag bag, mbe njoṅ mfi' ntàb.

²Bam nzendà lo ghù mbu ntàn; mba zit bag nzendà lo lo ghù mbu mbàa kam. A fi' njoṅ Ndà Nsi fa, a tum mbu ṅam mbàa nesage, ntum mbu gham num bam se.

³Yen nà be tôg a tsho mum ndà, mfi' ntom nze netsho ndà, a tum ta' bu; mfi' nzendà; a tum mbu ntat, bam se ghù mbu ntat kam.

⁴A fi' ntùm Ndà Nsi, a tum mbu gham nesage, mbu gham num bam se, ntshob me ndù: Yen ni b'a dù' nelàn ntshùate.

⁵A fi' kumba' Ndà Nsi, a be mbu ntat, mfi' bam nto'ndà mi a be nka, ndiaṅ ba' mbum nà, a be mbu mbàa.

⁶Nto'ndà mi a be nka là lo ke mbe ndù mo' lat num mo'o, njoṅ i fa be ṅam ntat, njoṅte ndaṅ mi ntat; nto'ndà lo ke nkwag kumba' ze bo kut ndiaṅ ba' yi mbum nà, là ke yôg njé'te num bwe, là ke tshùb ze kumba' Ndà Nsi.

⁷Nto'ndà lo ke mbe kum num mba sit laṅ ba' lo nke ngu' à be neghu'u, nke ndam ba' mbume; nummbe bo ke nko' num ba' à num ta' tuko' z'a lam ba' mbum nà. Dù' lo yàm mum ba' z'a mfe tù là. Bo nke ndo tunnsi mbe kum mfe tù ntôg à mum laṅ ba' z'a netèt là.

⁸Me yen ndù dù' ba' be bwe là ṅate nèn tù neshu. Nto'ndà mi a latte là lo ghù mbu ntat ndaṅndaṅ, ngù mbu ntat nelo num tun Ndà Nsi nkum num tun nto'ndà mi a latte là.

⁹Kum ba' ze njù, mi nto'ndà mi a latte là lo ghù kekub i mbu mbàa kam. A na' mb'a nze z'a be netèt nto'ndà Ndà Nsi là.

¹⁰Dù' lo ke mbe netèt nto'ndà mbu gham num bam se, ndiaṅ Ndà Nsi mbume.

¹¹Dù' nelo' ntsho yi mum nto'ndà lo ghù nze tse: Ta' nze be tu, mo' be mà ntèn, bam se be mbu mbàa kam ndiaṅ mbume.

¹²Ba' z'a be mbwe dù' z'a be nge, nze bag mbinyam nà lo ghù mbu ntshob tàn ṅam ntat num bam se, kum i ghù tshub i mbu mbàa kam ndiaṅ mbume. A lo ghù mbu ntshob tàn ṅam nkuà nesage.

¹³Mèn nà fi' Ndà Nsi, a ghù mbu ṅam ntàn nesage. Dù' z'a be nge là, ba' boa kum tse lo ghù mbu ṅam ntàn.

¹⁴Bam mbwe Ndà Nsi bo dù' z'a be nge, ntshù nze bag ntumnyam nà lo ghù mbu ṅam ntàn.

¹⁵A fi' ba' num njam i ze nesage, mbwe dù' nge, mfi' njam i, mfi' boa bam ntshundà, a tum mbu ṅam ntàn.

¹⁶A lo' ntù nebag nabte ba' yi neto' mànsi nèn nkum tù: Ntùm Ndà Nsi, bam ntshundà, nzendà, ntôndà mi bo tete ntùn bwe là, ndiaṅ bam ntshundà yi mbume, num njoṅ ndaṅ ba' ntat fa.

¹⁷Bo kom ba foto tu nzendà, ntùm Ndà Nsi, njam njù, mba kum kàb z'a diaṅ dù' mbum nà, ntùm bwe bo njam njù.

¹⁸Ba kérubim boa ntene, ta' ten nke mbe netèt kérubim bàa. Kérubim lo ghù se tse bàa!

¹⁹Mo' ta' i be se mènntùn nkaṅ nke ndôte nze dù' tshaten be là, mo' be se ngwayit, nkaṅ nke ndôte mo' nze dù' mo' tshaten be là. A be ndùlala ndiaṅ dù' mbume.

²⁰Ba kérubim boa tshaten lo be neto' mànsi nèn nkum tu nzendà, mba num kàbngô Ndà Nsi.

²¹Nsaṅ Ndà Nsi lo b'a ndaṅndaṅ num njoṅ bag tse fa, mbwe dù' nelàn be be mat ntshù'.

²²Bo lo' ntù nabte tômbwôg le'te Nsi yi. A lo nèn tù ta' bu kam, mbe ta' bu num nesage. Ntôg mi, nku mi boa mbaṅ tse b'a be ntù. Mèn nà tshob me ndù: Yen ni b'a téblé s'a be mbwe Tshùaben nà.

²³Ndà Nsi bo dù' nelàn lo ghù nzendà bàa.

²⁴Ghabndà lo ke mbe num ba nzendà bàa bàa, tse njoṅ i fa ke nkaṅte num nzendà là, ngabndà mbàa num ta' nzendà, memo' mi mbàa num mo' nzendà.

²⁵Bo lo tshebte ba kérubim boa tshaten num ba nzendà Ndà Nsi, ndaṅndaṅ mb'a be num nkum kàbngô là. Ta' setghàm lo be mbwe bam ntshundà, ndù bo lo' a ntù nabte yi.

²⁶Ntôndà lo be bwe ndù bo fùne, tshaten be bwe njoṅ dù' fa, mbe mbaṅ bam ntshundà, mbaṅ nto'ndà ba' mi a latte là, mba mbaṅ setghàm.