Read Medumba Ezékia 42 Bible Online

Ezékia 42 - Medumba bible

Ezékia 42

¹Mèn nà lo' àm ntum yi ntshundà njù, nze bag tu, ndo' àm nèn yi mum nto'ndà mi a be se dù' z'a be nge, se ba' z'a nze tu là.

²Bag ba' ze nzendà z'a be nze tu be bwe là lo ghù mbu ṅam ntàn, num nesage, ngù mbu ntshob tàn ṅam mbàa num bam se.

³Nto'ndà ndùb mi a be num ndaṅ ba' ntat là na' mb'a mbwe ntshundà njù, mbwe ntshundà ntùm bwe z'a ghù mbu gham nà.

⁴Ta' manze lo be mbwe nto'ndà ndù a ghù mbu ntàn, mbèn ngù mo' metsit nze z'a ghù ta' kam bu là. Nzendà tshob ke ntshù a nze tu.

⁵Nto'ndà mi a be mfe tù là lo kagte ntshùa mi a tunnsi là, ntshùa mba mi a be netèt là, nummbe tun taba' lo ke ndo' dù'.

⁶Ndaṅ ba' lo be ntat, là ke ghù ntom, mba ntom ts'a be num ntshundà là; a ndùlala bèn ngù kà nto'ndà mi a be tù là boa mi netèt nkagte ntshùa mi tunnsi.

⁷Kumba' z'a be se nto'ndà, nze bag ntshundà njù, mbwe nto'ndà là lo ghù mbu ntshob tàn ṅam mbàa nesage;

⁸nummbe nto'ndà mi a be nze bag ntshundà njù là lo ghù mbu ntshob tàn ṅam mbàa. Là, ntshundà Ndà Nsi na' mb'a mbu ṅam ntàn.

⁹Nzendà z'a tshù bag ntumnyam nà lo be tun nto'ndà, a be ze mèn be tsho ntshùa à num ntshundà njù là.

¹⁰Nto'ndà lo be num bag ntshundà ze nke' z'a be nze bag ntumnyam nà, mbwe dù' z'a be nge là b'a mbwe ba'.

¹¹Ta' manze lo be mbwe men nto'ndà là mb'a be mbwe mi a be tu là. Nesag bo bam se na' mb'a be ndaṅndaṅ. Bo na' mb'a be mat ntshù', mb'a be ju ntshù', nzendà tshob fute.

¹²A lo bèn mb'a be ju ntshù' num nzendà nto'ndà mi a be nze mà ntèn nà. Ta' nzendà lo be num tu manze, manze z'a be ndaṅndaṅ mbwe kumba' z'a tshù nze bag ntumnyam, bo nke ntshùa bwe kà ntsho là.

¹³Mèn nà tshob me ndù: Nto'ndà mi a be tu boa mi a mà ntèn, mbwe dù' z'a be nge là b'a nto'ndà nelàne. Ghale'te Nsi tse bo be nèn mbaṅ Tshùaben nà nsi ke jù tshu ts'a làn neshu là bwe. Bo nsi ke yabte tshu ts'a làn neshu là bwe: Tshu bwôntù, nyàm tse bo zwite yub num tshule'te Nsi num nukebwô bo mfànnu là; nummbe dù' b'a ze nelàne.

¹⁴Ndùse ghale'te Nsi nsi tsho bwe là, mba bo ke nsi bèn tum dù' nelàn nèn ntshundà ke be ndù bo yab nzwe fa' tshob bwe. Tshen nzwe là b'a tse nelàne. A bwô ndù bo ma' nzwe tse ghua kà nèn num ze dù' ngô.

¹⁵A lo be miagte nefi' dù' mum ndà, ngù me tum num nzendà z'a be bag ntumnyam nà. A fi' ntshùaṅ ba' ndiaṅ mbume.

¹⁶A fi' bag z'a tshù bag ntumnyam nà bo kam mfi' z'a ke mfi' yi là, njoṅ i fa tum mbu bon tàn nkù bàa.

¹⁷A fi' bag z'a tshù mà ntèn nà bo kam mfi' z'a ke mfi' dù' yi là, njoṅ i fa tum mbu bon tàn nkù bàa.

¹⁸A fi' bag ntèn bo kam mfi' z'a ke mfi' dù' yi là, njoṅ i fa tum mbu bon tàn nkù bàa.

¹⁹A kaṅ wul i ntshù bag mbinyam, ndo' kam mfi' z'a ke mfi' dù' yi là mfi' yi, njoṅ i fa tum mbu bon tàn nkù bàa.

²⁰A fi' kum kàb kuà ts'a diaṅ ba' mbum nà, a tum mbu bon tàn nkù bàa nesage, ntum mbu bon tàn nkù bàa num bam se. Yen kum kàb là bèn mbe ndù num dù' nelàn bo ze banban.