Read Medumba Ezékia 43 Bible Online

Ezékia 43 - Medumba bible

Ezékia 43

¹Mèn nà lo' àm nèn yi nzendà, nzendà z'a be nze bag ntumnyam nà.

²Me yen nkuni Nsi Israél nke nkù' bag ntumnyam nse'. Nz'é be mba ntshu'te ntse ndùbndùb là, nkuni mi nke nziag num nsitsha'a.

³Yen njem ni fute ze me na' njen ngelaṅ me na' nse' yen mba bo sate tusô là. Tshen njem nà fute ze me na' njen mbaṅ ta'ntse Kebar là. Me vù nsi kabkab.

⁴Nkuni Tshùaben tshùa num nzendà z'a be nze bag ntumnyam nà ntsho ndà.

⁵Ndùlala ywèt kel àm nèn nte ntshundà z'a be ntùm bwe là. Tshù, nkuni Tshùaben dun ntùm Ndà Nsi.

⁶Me ju' mo' mèn tswe mum ndà nke ntshob nu me, mo' ta' mèn tsin mbaṅ àm.

⁷Mèn nà tshob me ndù: Mén mèn, yen ni b'a dù' ze diaṅkwa sàm be là, dù' ze me te bam nku màm bwe là. Me nsi tswe bwe matmat, netèt bon Israél. Tunndà Israél boa fenfen tshob ke nsi bèn sagte lén sàm se nelàn njam kat yub ke njam fi fenfen tshob mi a nsi bete mum mbwe' tshob là lo.

⁸Bo lo te yub nzendà a mbaṅ yàm, ntete tshob ntom a mbaṅ tshàm, nda' ta' kumba' bèn nke mfagt'àm bag à bo là. Bo lo tshùa ndùlala nsagte lén sàm se nelàn njam tshùaya'nu tshob tse bo ghù là. A ndùlala bèn ngù kà me mfét yub mum yantù àm.

⁹Ndonni bo nsi lo' kat yub nèn yi ngùanesà boa fi fenfen tshobe, tu wul àm tswe netèt bo matmat.

¹⁰Wù mén mèn, a bwô ndù o la'te yen Ndà Nsi li tunndà Israél; a bwô ndù bo fi' i, tuswe ko yub num nukebwô tshobe.

¹¹A be ze tuswe ko yub num njoṅ nzin mub fa là, o ghù bo lèn mba yen ba' là be là, mb'a tsin tù là, njam tse boa nze tse, njoṅ netshaṅ tse fa boa nkàn mi, njoṅ netshaṅ tse fa boa ntshù' mi. Tote njoṅ i fa bo, bo tshùb netshaṅ tse tu bo boa nkàn mi, mbe kut ba' ngù a ndaṅndaṅ mb'a be là.

¹²Tshù ntshù' yen ba' là là. Njoṅ dù' fa ze yen ba' là nsi lo' num tu mbat là b'a nelàn neshu. Tshù ntshù' ba' là là.

¹³Tshù njoṅ mfi' tômbwôg le'te Nsi li: Ta' bu lo ke ntshùa mba bu i be nto' mbe là. Tômbwôg là lo ghù ta' kam bu netsho ntùm bwe, ngù ta' kam bu num bam se. Ngoṅ i z'a diaṅ mbum nà ghù njoṅ z'a be netèt madu' mèn bo nkét ntubu i là. Tshù mba ngoṅ tômbwôg be là.

¹⁴Neto' num tun i z'a te num tsha' tà nèn nkum tun laṅ se s'a nsi là ghù ta' bu num ta' kam bu, laṅ se s'a be tù là lo ghù mbu mbàa nenèn tù, ngù ta' kam bu num bam se.

¹⁵Lagmbwôg lo ghù mbu mbàa nenèn tù, tsemo' ndô kuà be mfe num lagmbwôge.

¹⁶Lagmbwôg le'te Nsi lo ghù kum tse kuà, ta' kum i ghù mbu ntôge. Laṅ se lo ghù mbu sammbàa num mbu sammbàa num njoṅ kum tse kuà fa.

¹⁷Ngoṅ i z'a diaṅ i mbum nà lo be njoṅ z'a be bo ghabte ta' bu nze kuà là. Tun i be ta' kam bu bag bag, mbu'tuko' tse tshù nze bag ntumnyam.

¹⁸Mèn nà tshob me ndù: Tshù ju ze Tshùaben Nsi tshob li: Tshù ntshù' mi a be num nu tômbwôg le'te Nsi lé'njù se bo nsi kul i num neton ba nyàm bwe bo ne ne' lem bwe li:

¹⁹O nsi fà fot mfô ghale'te Nsi, ben Lévi tse bo tum mum tunndà Tsadok, nke mbèn nse' mbaṅ àm nefa' me là ndù bo ke mfà num nukebwô. A b'a Tshùaben Nsi bèn ntshobe.

²⁰O nsi lo' lem tse se' ndô kuà ts'a be num tômbwôg là yi, naṅ ntôg laṅ se mi nkuà, num ngoṅ i z'a diaṅ mbum nà. Yen nà nsi b'a num nelo' ndànte tômbwôg yi bo num nukebwô.

²¹Yen nà nsi be tôg o lo' fe fot mfô ze bo fà num nukebwô là nton mum Ndà Nsi, num dù' ze bo tshé'te num bwe là, njam dù' nelàne.

²²A nsi be mbatte lé'njù bàa o fà ta' fot mfô s'a ke' ghù lo' là num nukebwô. Bo nsi lo' i lànte tômbwôg yi mba bo na' ndo' fot mfô ndànt'é yi là.

²³Ndùs'o nsi miagte nelànte dù' là, o nsi fà ta' metshab fot mfô s'a ke' ghù lo' là bo ta' komnjù s'a tum netèt bwoṅ nyàm, ke ghù lo' là.

²⁴O nsi fà tshen nyàm n'a mbwe Tshùaben; ghale'te Nsi nsi ma' ngwa num bo, ton yub Tshùaben a kua' fafa.

²⁵O nsi ke fà ta' fot mbwe mba sit lé'njù lo num nukebwô. Bo nsi fà metshab fot mfô bo ta' komnjù s'a tum netèt bwoṅ nyàm nà, be ndùlala mum lé'njù sammbàa. A ke' bwô ndù tshen nyàm nà ghù lo' num bo.

²⁶Bo nsi lànte wut, lànte tômbwôg mum lé'njù sammbàa, tsho' i lo' ghù se Nsi yi.

²⁷Tshen lé'njù là nsi be tshùa, a be mbatte lé'njù fom boa tsemo'o, ghale'te Nsi ton nyàm tse bin nsi fà là tômbwôg boa tsin tshule'te Nsi tse so mbu. Me nsi ju' nze zin yen ngelaṅ nà. Tshùaben Nsi bèn ntshob ndùlala.