Read Medumba Ezékia 44 Bible Online

Ezékia 44 - Medumba bible

Ezékia 44

¹Mèn nà bèn ndo' àm mbèn yi num nzendà dù' nelàn ze njù, z'a ke ntshù bag ntumnyam nà, ndù yen nzendà là tam tu.

²Tshùaben tshob me ndù: Yen nzendà li nsi ghô z'a mb'a tam tu là; k'a zi nte nge, sàm mèn ke bèn nzi ntshùa bwe; nummbe me Tshùaben Nsi Israél tsho à bwe. A nsi tam à be tu ndùlala.

³Mbe se' mba mén mfen nà, a ku'ni netswe bwe, njù ju mbwe Tshùaben. A nsi tshùa num nzendà nze z'a bam ntshundà là kà tsho bwe, bèn tshùa bwe kà tume.

⁴Mèn nà lo' àm nèn yi num nzendà Ndà Nsi z'a be tu là. Me be lôte njen ndù nkuni Tshùaben dun mum ndà Tshùaben. Ndùlala me vù nsi kabkab.

⁵Tshùaben tshob me ndù: Mén mèn, kù' ntoṅ, te lag so bwe mebwô. Kù' ntoṅ mu nju' ju ze me nsi tshob wù num njoṅ nkàn fa boa njoṅ ntshù' ndà Tshùaben nà. Lôte njoṅ nze netsho yi ndà fa boa nze fa tse netsho yi dù' nelàne.

⁶Tshob njoṅ ghatatu fa mum tunndà Israél ndù me Tshùaben tshob bo ndù njoṅ tshùaya'nu tshob fa ku' ndùlala.

⁷Bin lo lo' ba kesiket tse mum ntù boa ba kesiket tse mbàb wut nse' yi mum dù' àm ze nelàne, ndù bo lo' ndà àm mba ju banban nà; bin lo fà bàn àm, nzit bo lem njoṅ neto tsin fa. Bin lo keb kàn sàm.

⁸Tu wut tsin lo ke fa' ntùm dù' àm ze nelàne, là, ngù bo tù' bèn mfa' num zin tu mum dù' àm ze nelàne.

⁹Tshùaben Nsi tshob ndù sàm ngùn, z'a be kesiket mum ntù, mbe kesiket num mbàb wut là ke nsi tsho mum dù' i ze nelàne; sàm mèn netèt ghùn tse bo be netèt ba Israél là ke nsi tsho bwe.

¹⁰Ntôg ndùlala, ba Lévi nsi ket nge' nukebwô yub, nummbe bo lo le' àm ndùse bon Israél, kù àm, nkaṅ wut tshob ntam njam neto tshob là.

¹¹Bo nsi be ntùm dù' àm ze nelàn mba ghafa' là; bo nsi keb ba nzendà ba' àm. Bo nsi ke se tô nyàm tse ngô se' yi neton mba num tsemo' tshule'te Nsi là. Bo nsi ke tsin mbwe ngô, ke fa' num ze tu ngô.

¹²Bo nsi ket nge' nukebwô tshobe, nummbe bo lo fa' ngô mbwe neto tshobe, ngù tunndà Israél vù ntùm nukebwô. A ndùlala me nsi bù' bu àm num bo. A Tshùaben Nsi bèn ntshob ndùlala.

¹³Bo ke nsi ghebte mbaṅ àm ntùm fa' le'te Nsi, ke ghebte mbaṅ dù' tshàm tse nelàne, dù' tshàm ts'a làn ntshùate là. Bo nsi ket nge' nu tuswe boa tshùaya'nu tse bo na' ngù là.

¹⁴Me nsi fà fa' nebéb ndà àm bo, bo ke mfa' njoṅ fa' s'a bwô ndù bo fa' bwe là.

¹⁵Là mbe se' mba ghale'te Nsi, ba Lévi, bon Tsadok tse bo na' mfa' mum dù' àm ze nelàn ndùse bon Israél tsin ngùanesà mbaṅ àm nà, tshen ben nà nsi ghebte num àm, ke fa' me. Bo nsi tsin mbwe àm, num nefà nzit bo lem me. Tshùaben Nsi bèn ntshob ndùlala.

¹⁶Bo nsi tsho mum dù' àm ze nelàne, kù'te nèn mbaṅ téblé sàm, ke fa' me, be mum fa' sàm.

¹⁷Ndùse bo nsi tôg ba nzendà ntshundà tse ntùm bwe là, mb'a bwô ndù bo ket nzwe z'a bwô, ke lèt là. A ke' bwô ndù bo ket nzwe z'a lèt là num bo ndùse bo tshwèt ntshùa num ba nzendà ntshundà tse ntùm bwe mba ntùm ndà là.

¹⁸A bwô ndù bo te tshe' se bo lo' nzwe z'a ke' lèt là ntam yi là, nso kuttu (turbans) ze bo lo' be lèn yen nzwe là ntam yi là tun bo. A ke' bwô bo taṅ kob tun bo a mb'a be ze'ni tum nà.

¹⁹Ndùse bo nsi tum nèn ntshundà njù, nèn mbaṅ ngô ntshundà njù là, mb'a bwô ndù bo sô nzwe tse bo lo fa' fa' yi là, njab mum nto'ndà dù' nelàne; bo nsi ma' tsemo' tse ghua, ndùlala ndù kà bo lo' nzwe tshob là nkwag ngô yi.

²⁰A ke' bwô ndù bo kom tu yube, ke bèn mfaṅ ndù nyiaṅtu tshob sage, l'a bwô ndù bo ke nkebte nyiaṅtu tshobe.

²¹Kà sàm ngale'te Nsi nu ndu' lé'njù s'a tsho mum ntshundà ntùm bwe là.

²²Kà bo so mfôge, ke mènnzwi z'a tum nandà là; l'a bwô a so mènnzwi a netèt ngonngon tse bo ke' tabte yube, bo bèn ntum a mum tunndà Israél là. Bo ghù neso mfôg ta' ngale'te Nsi.

²³Bo nsi tswite yàm nzwit mèn nelèn fagte z'a be netèt ju nelàn bo ze banban nà, ngù bo lèn fagte z'a be netèt ju z'a sagte bo z'a ke' sagte là.

²⁴Bo nsi be ghatsho'te ndùse tantshu be là. Bo nsi yi't'a mum ntshù' kà tsho'te. Bo nsi ze njoṅ ntshù' boa nkàn màm fa mum njoṅ màm njùa fa, ke lo' tshàm Sabbat mba ju nelàn nà.

²⁵Sàm ngale'te Nsi ke nsi nèn mbaṅ fe mèn, mbwôg ndù k'a sagte wul i, mba tà ndùlala, b'a sagte wul i num ta' tà, ta' mà, num ta' ménnshum, ta ménngon, num ta' mfèt ze mandum, ta' mfèt ze mènnzwi z'a ke' yoṅ na ndà là.

²⁶Nsùs'a nsi lànte wul i là, mb'a bwô ndù a béb lé'njù sammbàa.

²⁷A nsi fà ze jule'te Nsi num nukebwô lé'njù s'a nsi bèn tsho ntùm dù' nelàne, mum ntshundà ntùm bwe, num nefa' ntùm dù' nelàn nà. Tshùaben Nsi bèn ntshob ndùlala.

²⁸Tshù mub ntsi' mi bo nsi ghù li: Tu wul àm nsi be mub ntsi'i. Kà bin zi mfà ju bo mum ngô Israél. Me nsi be yub ju.

²⁹Bo nsi ke jù ntùm tshu bwôntù, ntùm tshule'te tse nesôg nukebwô yi boa tse mfànnu. Njoṅ ju fa ze bo nsi tam ntshù' bwe mum ngô Israél là nsi b'a yube.

³⁰Njoṅ mbwe ntàm tù fa boa njoṅ tshu bwôntù tse bin nsi se' yi nete mbwe Nsi là nsi b'a tse ghale'te Nsi; bin nsi fà tu bàn zin ghale'te Nsi, ndùlala ndù Nsi tam ntse mum tunndà zine.

³¹Ghale'te Nsi ke nsi fèt mbàb saṅ ke nyàm no z'a kwù, ke ze ju bèn nsé'te là lo.