Read Medumba Ezékia 45 Bible Online

Ezékia 45 - Medumba bible

Ezékia 45

¹Ndùse bin nsi tshùa njam tô, lo' ghabte ngô yi mba ntsi' là, bin nsi lé' ta' kam tsha' Tshùaben; tshen tsha' là nsi tù' tse nelàne, be ju bwôntù ze bin fà Tshùaben nà. Tshen tsha' là nsi b'a mbu ntsha' ntshob bàa gham nkù tàn nesage, be mbu ntsha' ntàn num bam se; a bwô ndù tshen tsha' là tù' tse nelàn njoṅ dù' tse fa.

²Bin nèn num tshen tsha' là ndo' dù' bwe num dù' nelàne, a be mbu bon tàn nkù bàa num njoṅ bag tse kuà fa. Bin bèn ndo' dù' nge mbaṅ bwe ndiaṅ mbume, yen dù' là ghù mbu ntshob tàn ṅam mbàa.

³Bin bèn mfi' tse dù' nelàne, bo dù' nelàn ntshùate be num tshen tsha' nelàn nà z'a ghù mbu ntsha' ntshob bàa gham nkù tàn nesage, ngù mbu ntsha' tàn num bam se là.

⁴Yen nà b'a dù' tsha' nelàn z'a mum ngô là. A b'a ze ghale'te Nsi tse bo be mfa' num ntshufa' dù' nelàne, nke nèn mbaṅ Tshùaben mfa' yi là. Mub mba' nsi b'a bwe, bo bèn ndo' yen dù' là ngù dù' nelàn yi.

⁵Bo nsi fi' dù' mbu ntsha' ntshob bàa gham nkù tàn num nesage, num mbu ntsha' tàn num bam se, a be ze dù' ba Lévi, ghafa' mum Ndà Nsi, yen dù' là fà ntusô netswe bwe.

⁶Bin lé' ta' dù' z'a be tusô là mbu ntsha' ntshob bàa gham nkù tàn nesage, num mbu ntsha' bàa nkù tàn num bam se; bo dù' nelàn nsi b'a bag bag. Yen dù' là nsi b'a ze njoṅ tunndà Israél fa.

⁷Bin nsi lé' tsha' mfen mbaṅ dù' tsha' nelàn bo tse tusô, boa tshen tsha' là nèn à be nze ntshù', neto' bag mbinyam nèn nkum mbinyam, nto' bag ntumnyam nèn nkum ntumnyam. Tshen tsha' là ghù ndù i bag bag neto' ndù z'a mbinyam nà nèn nkum z'a ntumnyam nà.

⁸Tshen nà nsi b'a tse tsha'a, be mi ntsi' mum ngô Israél. A nsi tshùa ndùlala fenfen tshàm be ke bèn ma'ni yàm nzwit mèn; bo nsi faṅ tshé' ngô tunndà Israél num njoṅ tunndà fa ts'a ghù là.

⁹Tshùaben Nsi tshob ndù: A ku' ndùlala me fenfen Israél! Bin tsin nefètte lem bo neyi. Bin ghù nu ndaṅndaṅ bo nunetsine. Bin kag yàm nzwit mèn, kà bin neyab nge'. A b'a Tshùaben Nsi bèn ntshob ndùlala.

¹⁰Bin ghù nkilô mi a be mi nenùn nà, ngù kesoṅ se nenùne, bo bath ze nenùne.

¹¹Kesoṅ bo bath nsi ghù a mfi' ntshù'. A bwô ndù bath be gham kà mbe ta' ntsi, nkesoṅ be gham kà mbe ta' ntsi. Bo nsi tsin num mfi' kà tsiagte yub mfi'.

¹²Ta' ndô nkàb nsi b'a guéra mbàa. Ta' mina zin nsi b'a ndô nkàb ṅam mbàa, ntshob tàn gham.

¹³Tshù ju bwôntù z'a bwô bin ke nsô li: Bin lo' ta' bag ngefet ntshù' num tse nze ntôg z'a tum num kesoṅ se bo lo' a num ngefet z'a tum mum ta' ntsi là, mbèn ngù be ndaṅndaṅ mba num nsa.

¹⁴Ju z'a bwô bin ghù num mfèt là: Bin nsi lo' ta' bag mfèt ntshù' num bag tse gham z'a be ta' bath z'a be ta' nda mfèt z'a b'a ta' bag i ze ntshù' num bàn mfèt là. A b'a bath gham bèn mbe ta' bàn mfèt, nummbe ta' bàn mfèt ghù netum nda mfèt gham.

¹⁵Bo nsi lo' ta' mén mbwe mum kin mbwe s'a ghù mbwe nkù bàa ntùm ngô Israél là fà num ju bwôntù, nyàm netone, bo jule'te Nsi ze ma' mbu, ndù a be nyàm ze bo zwi i lo' tamte fa yi num ben tse bo ghù nukebwô ke be ndù bo kô, ke bèn ndèn nà. Tshùaben Nsi bèn ntshobe.

¹⁶Là mfen bèn fà nyàm tse bo nsi tone, tshu bwôntù boa tshu nebot dù' num ba jùa, num ba ntshùa ṅwù, num ba Sabbat boa njoṅ lé'njù jùa tunndà Israél fa. A nsi fà jule'te Nsi num mfànnu, ju bwôntù, nyàm netone, bo jule'te Nsi ze ma' mbu num netamte fa yi num tunndà Israél.

¹⁷Là mfen bèn fà nyàm tse bo nsi tone, tshu bwôntù boa tshu nebot dù' num ba jùa, num ba ntshùa ṅwù ba Sabbat boa njoṅ lé'njù jùa tunndà Israél fa. A nsi fà jule'te Nsi num mfànnu, ju bwôntù, nyàm netone, bo jule'te Nsi ze ma' mbu num netamte fa yi num tunndà Israél.

¹⁸Tshùaben Nsi tshob ndù: A mbe mbwe lé'njù ntùm mbwe ṅwù o lo' metshab fot mfô s'a ke' ghù lo' là, nèn ntamte fa yi dù' nelàne.

¹⁹Ngale'te Nsi nsi lo' lem yen nyàm bo zwi là yo' ntom ba' yi, yo' ntôg ndaṅ tômbwôge, bèn yo' ntom nzendà ntshundà ze ntùm bwe yi.

²⁰O nsi bèn ghù be ndùlala num mbatte lé'njù sammbàa ntùm ṅwù, num ben tse bo be ghù nukebwô nke ndène, ke ndù bo nefa'te. A nsi tshùa ndùlala o lànte ndà.

²¹Bin nsi ghù Pasa num mbatte lé'njù ntshob kuà gham mum mbwe ṅwù. Sen jùa là nsi tswe lé'njù sammbàa, bin ke njù bàn ke te ywibte.

²²Mfen nsi fà jule'te Nsi ze netamte fa yi num se lén bo se njoṅ ngô fa mum sen lé'njù là.

²³A nsi be mum lé'njù jùa sammbàa, a ke nton mfot mfô sammbàa Tshùaben boa nkomnjù sammbàa mi bo ke' ghù lo' là njoṅ lé'njù fa, mba ta' fot mbwe mba sit lé'njù lo num tshen lé'njù sammbàa là.

²⁴A bwô neyab ta' kesoṅ ngefet njam mba sit fot mfô lo, njab ta' kesoṅ ngefet njam mba sit komnjù lo, njab ta' kam ntshaṅ mfèt mba sit kesoṅ ngefet lo.

²⁵A nsi be num mbatte lé'njù ntshob tàn gham mum ṅwù sammbàa ngale'te Nsi ke mfà be jule'te Nsi ntshù' num netamte fa, nton nyàm, mbèn nke mfà mfèt be mbe ntshù', ndùlala mum lé'njù sammbàa.