Read Medumba Ezékia 46 Bible Online

Ezékia 46 - Medumba bible

Ezékia 46

¹Tshùaben Nsi tshob ndù: A bwô ndù nzendà ntshundà ze ntùm bwe z'a tshù bag ntumnyam nà ke ntam tu mum lé'njù fa' ntôge, bo bèn nte yen nzendà là nge mum lé'njù Sabbat bo ntshùa ṅwù.

²Mfen nsi tshùa num nze bam ntshundà njù, tsho tsin mbaṅ ntom nzendà. Ghale'te Nsi nsi ton tshob nyàm, fà tshob tshule'te Nsi tse ma' mbu. Mfen nsi te ntunkekwi' mi nsi nzendà, tume, nzendà ghô be nge tà nèn nkum mfetnjù.

³Ngô nsi te ntunkekwi' mi nsi mbwe Tshùaben yen nzendà là mum lé'njù Sabbat boa ntshùa ṅwù.

⁴Nyàm tse mfen nsi ton Tshùaben mum lé'njù Sabbat là b'a bon njùmbwe ntôge bo ta' komnjù tse bo ke' ghù lo' là;

⁵ze jule'te Nsi z'a be ta' kesoṅ ngefet là b'a njam ta' komnjù, njab num ze tu wul i kô neyab njam njùmbwe là bo ta' kam ntshaṅ mfèt njam kesoṅe.

⁶A mbe num ntshùa ṅwù, a fà metshab fot mfô s'a ke' ghù lo' là, mfà njùmbwe ntôge bo komnjù tse bo ke' ghù lo' là num jule'te Nsi.

⁷Ze jule'te Nsi b'a kesoṅ ngefet njam fot mfô, kesoṅ ngefet njam komnjù bo ju z'a kô neyab njam ba njùmbwe là. A bwô nefà kam ntshaṅ mfèt mba njam sit kesoṅ ngefet lo.

⁸Ngelaṅ ze mén mfen tshwèt ntsho ndà là, a tsho à nze bam ntshundà njù mbèn mbe tume, ntum à bwe.

⁹Ngelaṅ bon ngô nsi se' mbwe Tshùaben num nele't'é là, mba mèn z'a nsi be tsho ndà, tshùa nzendà bag mfe tu là, nsi be tume, tum à nzendà tunndà. Mèn z'a nsi tsho z'a nzendà tunndà là, nsi be tume, tum à nzendà mfe tu. Sàm mèn ke nsi bèn njam num nzendà z'a tsho bwe là, nda' ndù, ntum à num ze bo yi tshwèt ndôte sese là.

¹⁰Mén mfen nsi tsho ndà bo à bo, bèn tum ngelaṅ bo tum nà.

¹¹A mbe mum lé'njù jùa boa tsemo' tsiaṅte nzenze a yab kesoṅ ngefet njam ta' fot mfô, njab ta' kesoṅ ngefet njam ta' komnjù num jule'te Nsi, mbèn njab ju z'a kô là njam ba njùmbwe bo ta' kam ntshaṅ mfèt mba njam sit kesoṅ ngefet lo.

¹²A be ze mfen ton ta' nyàm Tshùaben ntùm ze nekô ke mo' jule'te Nsi ze ma' mbu lo ntùm ze nekô là, mb'a bwô ndù a ghù a mb'a be ngù lé'njù Sabbat là. Yen nà nsi be tôg a tume, kà bo tam nzendà tu ndùs'a tum nà.

¹³O nsi ke ton ta' njùmbwe z'a ghù tamngu', ke ghù lo' là Tshùaben. O nsi ke ton à njoṅ nkebnjù fa.

¹⁴O nsi ke ghabte kesoṅ ngefet nze ntôge lo' ta' bag i yab bwe, num jule'te Nsi; ghabte ta' kam ntshaṅ mfèt nze tat lo' ta' bag i num netébte tag yi. Yen nà b'a jule'te Nsi z'a be ze Tshùaben nà. A b'a ta' ntshù' z'a ghô matmat, z'a ghô njoṅ ndù fa là.

¹⁵Bo nsi ke fà njùmbwe, fà jule'te Nsi bo mfèt, a be mba nyàm neton Nsi là njoṅ ndù fa.

¹⁶Tshùaben Nsi tshob ndù: A be ze mfen lo' ju num ntsi' mi tshu tse mfà mo' nshum i là, mba yen ju là b'a ze nshumnshum tse. Yen ju là nsi be yub ju num ntsi'i.

¹⁷L'a be z'a lo' ju num ntsi' mi mfà mo' tshe' i là, mba yen ju là nsi b'a ze tshe' i tà nkum ndùse ngu'njù netum kuan mb'a ntùm ntshù' ngô se' là, k'a mbèn mba' yen ju là mfen; nda' bon mfen bèn ngù nelo' ju ze mfen lo' num ntsi' mi mfà bo là.

¹⁸Mfen ke nsi lo' sàm ju num ntsi' ngô, ke fétte ngô ndo' tshu tse. A nsi lo' ju à num z'a b'a ze là kà fà bon tse, ndùlala ndù kà sàm mèn netèt yàm nzwit mèn tsin ka'ku mbaṅ ju z'a ghù là.

¹⁹A lo' àm ntsho yi bag nzendà dù' ze nto'ndà nelàn mi a be mi ghale'te Nsi be là. Yen nzendà là b'a bag mà ntèn. Mo' dù' lo be bwe mà lagndà, nze bag mbinyam.

²⁰A tshob me ndù: A bwe là ze ghale'te Nsi nsi ke na mbàb jule'te Nsi ze mfànnu bo ze netamte fa là. A b'a be bwe là ze bo nsi ke na tshu bwôntù, mbwôg ndù kà bo ket ntôg yi mum ntshundà njù, a kwag ngô.

²¹A bèn ndo' àm nèn yi ntshundà ze njù, ngù me tôg nze mbaṅ ntôg ba' ntshundà. Ta' tètla' lo be mba num sit tôg ba' lo.

²²Ndùlala metsit tètla' lo be mba num sit tôg ba' lo ndù a ghù mbu ṅam mbàa num nesage, ngù mbu ntshob tàn gham num bam se. Njoṅ i fa na' ngù à mfi' ntshù' num ntôg mi.

²³Ta' kumba' lo diaṅ yub mbume, ndù bo tete lagmbwôg tun bwe ndiaṅ mbume.

²⁴A tshob me ndù: A b'a ndà tse ghafa' mum Ndà Nsi be na mbàb nyàm jule'te Nsi ze ngô fà là.