Read Medumba Ezékia 47 Bible Online

Ezékia 47 - Medumba bible

Ezékia 47

¹Mèn nà bèn ndo' àm mbèn yi nzendà. Me yen ntse nke ntum tun nkù'ndà nze bag ntumnyam; nummbe ba' na' ntshag se i à bag ntumnyam. Ntse ke nswe' a num bag ba' ze zwim, nèn bag tômbwôg le'te Nsi z'a be mà ntèn nà.

²A lo' àm nèn yi nze ze nzendà z'a be bag tu be là, ngù me diaṅ ba' mbum njam njù num nzendà z'a bag ntumnyam nà. Ntse nke nswe' bag bu zwim.

³Ndùse mèn nà kù' nèn nze bag ntumnyam nà, me yen ndù a tshùb nkù bu i. A fi' dù' mbu nkù tàn, ngù me dut ntse. Me be dut ntse ntse nke nte num mbanku màm.

⁴A bèn mfi' dù' mbu nkù tàn, ngù me dut ntse. Ntse nke nte num ntunkekwi' màm. A bèn mfi' dù' mo' yoṅ mbu nkù tàn, ngù me dut, ntse nke nte tà ntaṅkob àm.

⁵A bèn mfi' dù' mbatte yoṅ kuà mbu nkù tàn. A be ta' koṅntse ze be me ke bèn ndut là, nummbe ntse lo tsho neshu k'a tù' bwô à nela ntse à nelaa. Koṅntse là lo ke bèn nku'ni nedul a nedule.

⁶Mèn nà tshob me ndù: Mén mèn, o yen à? A bèn ndo' àm nse' yi mbaṅ koṅntse.

⁷Ndùs'a lo' àm mbèn yi là, me yen ntù yàm mbaṅ koṅntse, num njoṅ nkaṅ mi fa.

⁸Mèn nà tshob me ndù: Men ntse li nsi swe' nèn mum bag ngô z'a ntumnyam nà, swe' nèn tômbo'o, tsho mà ntùm dibantse; ndùs'a nsi swe' naṅ mum dibantse là, mba ntse mi a dibantse là nsi tù' mi nelàne.

⁹Njoṅ tshu ntùn fa ts'a be nzinte là nsi yôg mba yà lo dù' koṅntse nsi naṅ bwe là, ngontse yàm bèn mbe bwe. Nummbe dù' ze men ntse là nsi kum là, ntse nsi tù' mi nelàne, mba ke lo yôg dù' ze koṅntse zin nkum nà.

¹⁰Ghaghom *gi*ngontse nsi tsinte num nkaṅ mi, nelo En-Guédi nèn nkum En-Eglaim. Bo nsi taṅte mbunjà, ghom ngontse tshaṅtshaṅ (kankan) yi, ndaṅndaṅ mba ngontse ts'a be ntùm dibantse ndùb là.

¹¹Bo ke nsi nabte dù' tse tse ntse kù bwe boa tse ntshe'; bo nsi kag tshen dù' là ngwa.

¹²Ntù nzenze nsi bit num nkaṅ koṅntse. Men ntù là nsi b'a mi neyam ntàme. Mfu mub ke nsi tsho'o, ntàm mub ke nsi mi num sàm ngelaṅ, ke ntswe njoṅ maṅwù fa, nummbe ntse nsi ke tum dù' nelàne. Ntàm mub nsi be jujù, mfu mub be fu.

¹³Tshù ju ze Tshùaben Nsi tshob li: Tshù ndùngô tse bin nsi ghabte tunndà Israél tse ntshob bàa gham ntsi' li. Bin fà ze Yosèf nze tse bàa.

¹⁴Mba we lo ghù ta' nz'é mba mba we lo là. Nummbe me lo bù' bu àm tù nsaṅlaṅ bwe nefà yen ngô là tà tsine. A ndùlala, bin nsi ghabte yen ngô là.

¹⁵Tshù ndùngô li: Neto' tu, fe num dibantse ndùb, nze Hethlon nèn nkum Tsedad,

¹⁶Hamat, Bérotha, Sibraim, netèt ndùnsi Damas bo ndùnsi Hamat, Natzer-Hathicon num ndùnsi Havran.

¹⁷Ndùlala tshù mba ndùngô nsi be là neto' dibantse nèn nkum Hatsar-Enon, ndùnsi Damas, Tsafon z'a tu là bo ndùnsi Hamat. Tshù bag ngô z'a be tu là.

¹⁸Ndùngô z'a bag ntumnyam nà nsi b'a Yordan, netèt Havran, Damas bo Galad, bo ngô Israél. Bin nsi fi' dù' neto' ndùngô z'a tu là tà nèn nkum dibantse z'a bag ntumnyam nà.

¹⁹Bag ngô z'a ntèn nà nsi to' nelo mà ntèn nze Tamar tà nèn nkum ntse Mériba mi a Kadèsh là, tà nèn nkum koṅntse nze dibantse ndùb. Yen nà nsi be bag ngô z'a ntèn nà.

²⁰Bag ngô z'a be mbinyam nsi to' num dibantse ndùb, neto' fe ndùngô tà nèn nkum mbwe Hamat. Yen nà nsi be bag ngô z'a mbinyam nà.

²¹Bin nsi ghabte yen ngô li netèt bin ndaṅndaṅ mba tunndà Israél lo' mbe yi là.

²²Bin nsi tam tô, lo' ghabte ntsi' yi, a be mine, bo mi ghùn tse bo nsi tswe netèt bin, bwe bon netèt bin nà. Bin nsi lo' yub a mba bonla' là netèt bon Israél.

²³Bin nsi fà mi ntsi' ngùn mum tunndà dù' z'a nsi tswe là. Tshùaben Nsi bèn ntshob ndùlala.