Read Medumba Ezékia 48 Bible Online

Ezékia 48 - Medumba bible

Ezékia 48

¹Tshù ndèn tunndà Israél li: Neto' tà tôg tu, num nkaṅ nze Hethlon z'a Hamat, Hatsar-Enon, num ndùnsi Damas bag tu nèn nkum nze Hamat, nelo ntumnyam nkum mbinyam b'a ze dù' Dan. Tshù ta' tunndà là.

²Neto' num ndùngô Dan, nelo ntumnyam nkum mbinyam b'a ze dù' Aser. Tshù ta' tunndà là.

³Neto' num ndùngô Aser, nelo ntumnyam nkum mbinyam b'a ze dù' Néftali. Tshù ta' tunndà là.

⁴Neto' num ndùngô Néftali, nelo ntumnyam nkum mbinyam b'a ze dù' Manasé. Tshù ta' tunndà là.

⁵Neto' num ndùngô Manasé, nelo ntumnyam nkum mbinyam b'a ze dù' Efraim. Tshù ta' tunndà là.

⁶Neto' num ndùngô Efraim, nelo ntumnyam nkum mbinyam b'a ze dù' Rubèn. Tshù ta' tunndà là.

⁷Neto' num ndùngô Rubèn, nelo ntumnyam nkum mbinyam b'a ze dù' Yuda. Tshù ta' tunndà là.

⁸Neto' num ndùnsi Yuda, nelo ntumnyam nkum mbinyam nsi b'a kam tsha' tse bin lé' là. A bwô ndù bam se be mbu ntsha' ntshob bàa gham nkù tàn, nsag njoṅ nelo ntumnyam nkum mbinyam. A bwô ndù dù' nelàn b'a netèt bwe.

⁹A bwô ndù kam tsha' tse bin lé' Tshùaben nà ghù mbu ntsha' ntshob bàa gham nkù tàn nesag num ntsha' tàn num bam se.

¹⁰Yen kam tsha' nelàn nà b'a ze ghale'te Nsi: A bwô ndù a ghù mbu ntsha' ntshob bàa gham nkù tàn num bag i z'a tu là, ntsha' tàn num bam se num bag i z'a mbinyam nà, ntsha' tàn num bam se num bag i z'a ntumnyam nà, ntsha' ntshob bàa gham nkù tàn nesag num bag i z'a ntèn nà. Dù' Nsi ze nelàn nsi b'a netèt bwe.

¹¹Yen kam tsha' là nsi b'a ze ghale'te Nsi tse bo yab yub num fa' là, bon Tsadok, tse bo na' mfa' mum dù' nelàne, ke to' fàn manze, ndùse bon Israél fàn manze là, mba ba Lévi fàn yub manze là.

¹²Yen kam tsha' là nsi be tshobe, mba kam tsha' nelàn tse bo na' ndo' num tsha' tse bo lo' num tsha' ngô, mbaṅ ze ndùngô ba Lévi là.

¹³Ba Lévi nsi ghù dù' mbaṅ ze ndùngô ghale'te Nsi num mbu ntsha' ntshob bàa gham nkù tàn nesag num ntsha' tàn num bam se, ngù mbu ntsha' tàn num bam se bo mbu ntsha' ntshob bàa gham nkù tàn num nesage.

¹⁴Be bo ke swèn sàm ju ke nebate lo. Kà swèn mbwe tshu ts'a tum ntùm ngô là, nummbe bo yab tshen tshu l'a Tshùaben.

¹⁵Tshé' tsha' mbu ntsha' bàa nkù tàn num bam se num tsha' mbu ntsha' ntshob bàa gham nkù tàn nà nsi be tsha' tusô, num mba' ben tse bo be ntswete tusô nke' là; tusô nsi b'a netèt bwe.

¹⁶Tshù mfi' tse li: bag tu ghù mbu bon tàn ntshob bàa ntsha' bàa, bag ntèn ghù mbu bon tàn ntshob bàa ntsha' bàa, bag ntumnyam ghù mbu bon tàn ntshob bàa ntsha' bàa, bag mbinyam ghù mbu bon tàn ntshob bàa ntsha' bàa.

¹⁷Tusô nsi ghù ntusô nke' mbaṅ bwe: S'a tu là nsi ghù mbu ntshob tàn bon bàa nkù, se ntèn ghù mbu ntshob tàn bon bàa nkù, se ntumnyam ghù mbu ntshob tàn bon bàa nkù, se mbinyam ghù mbu ntshob tàn bon bàa nkù.

¹⁸Tshé' kam tsha' z'a be num bag i ze nesage, mbaṅ tsha' nelàn nà, bin fi' tsha' bwe mbu ntsha' tàn bag ntumnyam, mbu ntsha' tàn bag mbinyam, yen kam tsha' là swe' ndaṅndaṅ bo kam i ze nelàne, mbe ze ju ntsi' ben tse bo nsi ke fa' mum tusô là.

¹⁹Njoṅ benntùn fa ntùm njoṅ tunndà Israél fa tse bo nsi ke fa' mum tusô là nsi ke dù' tshen tsha' là.

²⁰Njoṅ kam tsha' tse bin nsi lo' là nsi b'a mbu ntsha' ntshob bàa gham nkù tàn num mbu ntsha' ntshob bàa gham nkù tàn. Bin nèn num bwe ndo' dù' bwe ze kum tse kuà fa be ndaṅndaṅ nà num nete tusô bwe.

²¹Tshé' i z'a nsi tù' là b'a ze mfen; a nsi be bag bag, mbaṅ tsha' nelàn bo tse tusô, swe' nka nze bag ntumnyam num mbu ntsha' ntshob bàa gham nkù tàn, num ndùnsi z'a mbinyam nà. Tshen tsha' là ts'a be bag bag là b'a tse mfen. Kam tsha' nelàne, dù' nelàn bo Ndà Nsi nsi be netèt bwe.

²²Ndùlala dù' z'a nsi be ze mfen nà b'a z'a be netèt tsha' ba Lévi bo ts'a be tse tusô là. Tsha' ts'a nsi be netèt ndùngô Yuda bo ndùngô Benjamin nà b'a tse mfen.

²³Tshù ndèn tsemo' tunndà Israél li: Nelo ntumnyam nkum mbinyam b'a ze dù' Benjamin. Tshù ta' tunndà là.

²⁴Num ze ndùngô Benjamin, nelo ntumnyam nkum mbinyam b'a ze dù' Siméon. Tshù ta' tunndà là.

²⁵Num ze ndùngô Siméon, nelo ntumnyam nkum mbinyam b'a ze dù' Isakar. Tshù ta' tunndà là.

²⁶Num ze ndùngô Isakar, nelo ntumnyam nkum mbinyam b'a ze dù' Zabulon. Tshù ta' tunndà là.

²⁷Num ze ndùngô Zabulon, nelo ntumnyam nkum mbinyam b'a ze dù' Gad. Tshù ta' tunndà là.

²⁸Num ze ndùngô Gad, nze bag ntèn tà nèn nkum mà ntèn, ndùnsi nsi to' Tamar nèn kum ntse Mériba mi a be Kadèsh là, nèn kum mà koṅntse, nze mbaṅ dibantse ndùb.

²⁹Yen ni b'a tsha' ts'a bwô ndù bin tam tô bwe ngabte bon Israél a tù' yub dù' bo ghù njù là, tshen nà b'a tshob dù' tsha'a, a b'a mba Tshùaben Nsi tshob là.

³⁰Tshù ndèn nzendà ntshob bàa gham netshùa bwe ntsho ntùm ngô Yérusalém ze mba zit lo nsi ghù lén tunndà be là li:

³¹Bo nsi tsiaṅ ndèn ngô à ndaṅndaṅ mba ntunndà ba Israél be yi là: A' be mfe tu, kumba' sag num mbu ntsha' bàa ngù ntsha' ntshob bàa bon tàn nkù bàa, a nsi ghù nzendà tat: Nzendà Rubèn be ntshù', ze Yuda be ntshù' ngù ze Lévi ntshù'.

³²A nsi be bag ntumnyam bo yen ta' kumba' num mbu ntsha' bàa ngù ntshob bàa bon tàn nkù bàa: Nzendà Yosèf, ze Benjamin mba ze Dan.

³³A nsi be bag ntèn bo yen ta' kumba' ze ze nesag be ndaṅndaṅ boa nzendà tat là be bwe: Nzendà Siméon, ze Isakar mba ze Zabulon.

³⁴A nsi be bag mbinyam ta' kumba' ze ze nesag be be ndaṅndaṅ boa nzendà tat là be bwe: Nzendà Gad, ze Aser mba ze Néftali.

³⁵Njoṅ nesag kumba' z'a nsi diaṅ ngô bum nà nsi b'a mbu ntsha' mbwe'e. Lén se bo ghù ntsiaṅ yen ngô là yi fe mum sen lé'njù li là b'a ndù Tshùaben num nsi li.