Read Medumba Ezékia 6 Bible Online

Ezékia 6 - Medumba bible

Ezékia 6

¹Tshùaben tshob ntshob mi me ndù:

²Mén mèn, kaṅ se o ndôte nze bag tse mbat Israél, ntshob ntshob ngatshob ntshob Nsi num bo.

³O nsi tshob ndù: Tse mbat Israél, bin ju' ntshob Tshùaben! Tshù mba Tshùaben tshob ba mbale, nkônga, bon nta'ntse boa ntômbo' li: Me nsi ghù ṅwi tsho netèt bin, me sate tsin mbwe' fa.

⁴Bo nsi biagte ntômbwôg le'te Nsi mine, tsit nka nge'mbwôg mine ze bo num nton labinda bwe là; me nsi ghù fe tsin vùte mbaṅ neto tsin tse nesagte.

⁵Me nsi yabte fe bon Israél mbwe neto tshob tse nesagte, sate mvôg min lo' diaṅ ntômbwôg le'te nsi min yi fa.

⁶Bo nsi sate njoṅ dù' fa mum zin ngô; bo nsi sate njoṅ tsin mbwe' fa ndùlala ndù bo biagte min ntômbwôg le'te Nsi, nsate yube; bo nsi be'te tsin neto ndù bo mi yub. Bo nsi sate min nka nge'mbwôg ze bo num nton labinda bwe là, biagte mfa' mbu mine.

⁷Fe ben nsi vùte netèt bin, bin lèn ndù a b'a me bèn mbe Tshùaben.

⁸Là, me nsi faṅ metshé' i netèt bin, tshen nà ke nsi vù num ntshùag ṅwi mum mbu ngôngô, ndùse me nsi sate zin mum ngô nzenze là.

⁹Ben bo nsi tum ntshu vù là nsi kwimt'àm netèt ngôngô dù' ze bo nsi be kuan nà, nummb'a nsi be be ndù me be' ntù yub ze màndà bo ze tatu. A nsi be be ndù me biag miag mub mi kattù mbaṅ neto tshobe; nu tse nsi bag tu wut tshob num nukebwô tse bo ghù njam mfa' mub mi a bag ntshùate là.

¹⁰Bo nsi lèn ndù a b'a me bèn mbe Tshùaben, mba ndù me ke mi ntshobe, ke bèn ntshag njoṅ tshen nge' là bo a banban.

¹¹Tshù mba Tshùaben tshob li: Bu' mbu, nse' nku mu nsi ntshob ndù: Wé! A tshùa num nukebwô tunndà Israél ts'a bag ntshùate là, a nsi kwù num ṅwi, kwù nziku', kwù keya'.

¹²Mèn z'a nsi be ngùanesà là nsi kwù keya', mèn z'a be mbaṅ bwe là kwù ṅwi, mèn z'a tù' nsi bo ke lo' i là kwù nziku'u, a tshùa ndùlala, me ghù tshùagntù àm ṅwate num bo.

¹³Bin nsi lèn ndù a b'a me bèn mbe Tshùaben, ndùse fe tshob nsi be netèt tshob neto, mbaṅ ntômbwôg le'te nsi mub là. A nsi be ndùlal'a num tu kônga z'a sage, num tu njoṅ tu ba mbat fa, tun njoṅ tù fi fa, tun njoṅ tshalon fa s'a ghù tswe' mfu mi là. A b'a dù' ze bo be mfà labinda ze njwèt mi bwô njoṅ neto tshob fa là.

¹⁴Me nsi bù' bu àm nsi num bo, lo' ngô ghù ze tsi yi, neto' kônkwa nèn nkum Ribla, njoṅ dù' fa ze bo be ntswe là. Bo nsi lèn ndù a b'a me bèn mbe Tshùaben.