Read Medumba Ezékia 7 Bible Online

Ezékia 7 - Medumba bible

Ezékia 7

¹Tshùaben tshob ntshob mi me ndù:

²Wù mén mèn, ju' mba Tshùaben tshob num tunndà Israél li: Tshù miagt'é li! A miagt'é li z'a se' num ntôg ngô nkuà là.

³Ndonni miagt'é se' num o. Me nsi tum yantù àm num o. Me nsi yé't'é num mu ngùninu kà tsho't'o. Me nsi yab nukebwô tsho ts'a bag ntshùate là tu o.

⁴Lag sàm ke nsi tsho' num o, ke tshàm ndèn, me ke nsi ko ndèn; bin nsi lèn ndù a b'a me bèn mbe Tshùaben.

⁵Tshù mba Tshùaben tshob li: Tshù ta' nge' là, tshù ta' nge' ntshù' là z'a tshwèt nse' là.

⁶Miagt'é tshwèt nse'e, a lo nsi num o, tshù i l'a tshwèt nse' là.

⁷Mèn ntùm ngô, yu yoṅ i te nsi! Ngelaṅ se'e, lé'njù ghebte, lé'njù ntanta! Be tshu'te tsiaṅte ke bèn mbe mfe num ba mbale.

⁸Ndonni m'a' sa tshùagntù àm num bo, ṅwate num yantù àm num o. Me nsi yé't'a num mu ngùninu kà tsho't'o, yab njoṅ tsho nukebwô fa ts'a bag ntshùate là tu o.

⁹Lag sàm ke nsi tsho' num o, ke tshàm ndèn. Me ke nsi ko ndèn. Me nsi yab ngùninu mu tu o, nukebwô tsho ts'a bag ntshùate là be netèl o. Bin nsi lèn ndù a b'a me bèn mbe Tshùaben z'a be ndab là.

¹⁰Tshù lé'njù li, tshù i l'a se' là! Yu yoṅ i te nsi! Shua' te'e, ko'tewut tshwèt nèn mbwe!

¹¹Nefètte lem lo nsi, yen nu là ke fe à bo, ke bwoṅ benntùn tse bo ghù lo, ke bwoṅ soyé ke yub neyàm no. Bo ke b'a sàm ju (Bo b'a ju banban).

¹²Ngelaṅ se'e, lé'njù ghebte. Kà ngajun tsiaṅte, kà ngaswèn ghùtni wul i, nummbe yantù kam num njoṅ ntsha'ntsha' benntùn tshob fa.

¹³Ngaswèn ke nsi bèn kwé nkàb ju z'a swèn nà, a be z'a ke' mba ntùn nà; nummbe njem ze bo yen num tse ntsha'ntsha' benntùn nà ke nsi tsi i. A tshùa num mfànnu mi, sàm mèn ke nsi tum ntshu vù.

¹⁴Bo tô nta ntsho, njoṅ i fa ku'u, là sàm mèn ke lo nsi num ntsho. Nummbe yantù àm kam num njoṅ benntùn fa.

¹⁵Ṅwi num ntshundà, keya' bo nziku' be ntùm ndà. Mèn a be mà tshwèt là nsi kwù ṅwi, mèn z'a be mum ngô là kwù nziku' bo keya'.

¹⁶Tse bo yôg là nsi kù nèn num ba mbat mba bwoṅtambia' ts'a tômbo' là. Njoṅ yub fa nsi ke tswe, mba zit lo num mi mfànnu.

¹⁷Njoṅ mbu fa yub, njoṅ ntunkekwi' fa tù' ntse.

¹⁸Bo ke ntù' à bàm tun bo, bwôg kut yube. Tuswe num num se bo, bo kom njoṅ tu tshob fa.

¹⁹Bo nsi ma' nkàb yub ba manze, gol yub tù' ju z'a sagte là. Nkàb yub bo gol yub ke' ku'ni neyôg yub mum lé'njù tshùagntù Tshùaben. Bo ke nsi ku'ni nekém ntù yube, ke nezwiagte bam sob lo; nummb'a ju z'a ghù bo vù mum mfànnu mub là.

²⁰Bo lo ke nka'te num yub ju kwiwut z'a bwô neshu là, ndo' i nabte ba mfuni nukebwô tshob ts'a bag ntshùate là yi, nabte neto tshob yi. A ndùlala me nsi ghù tshen neto là tù' tshu fétwut num bo.

²¹Me nsi fà njoṅ tshen neto fa là mum mbu ghùn, bo lagte yube. Me nsi fà yub mba ntsha' là mum mbu ben kebwô tse bo num tsha' là, ndù bo ghù a tù' ju banban.

²²Me nsi tsho' se àm num bo, bo nsi ghù yàm junkàb tù' ju banban. Ba fimntshu nsi tsho bwe, ghù a tù' ju banban.

²³Nabte mfèt nummbe nezwite benntùn dun mum ngô, nefètte lem lo' la'.

²⁴Me nsi ghù nzwit mèn z'a ghù tshùagntù ntshùate là se'e; bo nsi lo' mba' mube, me ghù ko'tewut ben neta mi. Bo nsi ghù tshob dù' nelàn tù' ju banban.

²⁵Nge' te nsi! Bo nsi diag yôg, là yôg ke nsi be!

²⁶Nge' nsi kwi'te num nge', tshu'te kwi'te num tshu'te. Bo nsi bètte ndù ngatshob ntshob Nsi tàm ngàme; ghale'te Nsi ke' bèn nelèn ntshù', ghakwé mbwe ke bèn nefà ntage.

²⁷Mfen nsi b'a nsi vù, mén mfen nsi b'a ntùm zwe. Mbu ngô nsi be'te (vètte). Me nsi ghù num bo ndaṅndaṅ mba mfa' mub be là. Me nsi tsho'te yub mba tu wut tshob be ntsho'te là, ndù bo lèn ndù a b'a me bèn mbe Tshùaben.