Read Medumba Ezékia 9 Bible Online

Ezékia 9 - Medumba bible

Ezékia 9

¹Tshùaben kua' num ntoṅ màm kua' neta. Bin lo' nge' nse' yi mum ngô, bin ghebte, mba we lo bo ze juntshùag nesate dù' yi bu i.

²Me yen benntùn ntôg kù' mfe nze bag nzendà z'a be mfe tu là nse'e, ndù mba we lo tshùb ze juntshùag nesate dù' yi bu i. Mo' mèn lo be netèt bo ndù a ket nzwe fôgtab, ntaṅ fe nekite ju yi num kob se. Bo se' ntsinte mbaṅ tômbwôg le'te Nsi s'a b'a se tùn nà.

³Nkuni Nsi Israél lo num kérubim z'a be num i là nèn nze tun Ndà Nsi; a tsiaṅ mèn z'a ket nzwe fôgtab, ntaṅ fe nekite ju yi num kob se là.

⁴Tshùaben tshob yi ndù: Tshùa netèt ngô, netèt Yérusalém, mvèn keki num nkonse benntùn tse bo tshwèt mféme, nke ntswe num bagkèt nu ts'a tshwèt ntum mum ngô là.

⁵A bèn ntshob tsemo' be kua' num ntoṅ màm ndù: Ndùs'a tôg là, bin tum njam i, ntshu'te, kà bin ghù ntù kondèn, ke faṅ sàm ju.

⁶Bin zwite ywèn benntùn, bonnshum, ngonngon, bônke' mba bènnzwi, bin sate njoṅ i fa. Kà bin ghebte num mèn z'a ghù keki là. Bin to' a num dù' àm ze nelàne. Bo to' num ywèn benntùn, ghakwé mbwe (tse bo be mbwe) Ndà Nsi là.

⁷A tshob bo ndù: Bin sagte ndà àm, ngù fe ben dun bam ntshundà! Bin tume. Bo tum ntshu'te njoṅ i fa mum ngô.

⁸Mba bo ke ntshu'te, mbe be ndù me ke' bwe là, me vù nsi kabkab, kua' ntshob ndù: Ah! Tshùaben, ndù o nsi sate njoṅ i fa z'a tù' Israél là ké? Ndù o nsi so tshùagntù o mum Yérusalém ké?

⁹A bùnte me ndù: Mfànnu tunndà Israél bo tunndà Yuda yàm nga' mbu; nezwite benntùn dun ntùm ngô, mfànnu dun ntùm bwe, nummbe bo be ntshob ndù: Tshùaben tum ntùm ngô, Tshùaben ke tshwèt mbèn njen sàm ju.

¹⁰Mba tu wul àm ke ghù ntù kondèn, ke ghù kondèn num sàm mèn. M'a' ghù mfa' mub vù be tu bo.

¹¹Tshù, mèn z'a ket nzwe fôgtab, ntaṅ fe nekite ju yi num kob se là se' ntshob ndù: M'a' ghù ju z'o tshob ndù me ghù là.