Read Medumba Daniel 1 Bible Online

Daniel 1 - Medumba bible

Daniel 1

¹A lo be tshùa ngu'njù tat mba Yoyakim be mfen Yuda là, Nébukanetsar, mfen Babilon lo nsi num Yérusalém, ndo' i.

²Tshùaben swèn Yoyakim, mfen Yuda mba mo' bag tshu Ndà Nsi mum mbu Nébukanetsar; a lo' tshen tshu là nèn yi mum ngô Shinear, ntùm ndà ze nsi, njab tshen tshu là mum ndà tshunkàb ze nsi.

³Mfen tshob Aspenas, ngakwé mbwe netèt tse njabmfenkun ndù: Lo' tsemo' bon Israél tse bo b'a nzwit fen ke nzwit ben ndùbndùb lo là;

⁴a bwô ndù tshen bonnshum ni be ke lo' num wut yub, mbwô num se yube; a bwô ndù bo ghù fen num njoṅ zenu fa, nzi'te ju, mbe ghazenu, nku'ni netsin mum ndà mfen; tswite yub ṅwa'ni bo ntshob Kaldéa.

⁵Mfen nabte ndù bo ke mfà mo' bag jujù i bo mba sit lé'njù lo, bo ndu' mi tu wul i ke nu là. Bo tshagte yub ndùlala ngu'njù tat, ndù yen nà be tôg kà bo lo' yub nèn yi mbwe mfen.

⁶Bon Yuda lo be netèt bo: Daniel, Hanania, Mikaél bo Azaria.

⁷Ngakwé mbwe netèt ba njabmfenkun tswi ndèn mube: Ntswi lén Daniel Beltasar, ntswi se Hanania Sadrak, ntswi se Mikaél Mésak, ntswi se Azaria Abed-Négo.

⁸Daniel jù' ntù i ndù a ke sagte wul i tse jujù mfen bo ndu' mi a ke nu là. Ndùlala a labte ngakwé mbwe netèt ba njabmfenkun ndù kà nànt'é, ndù a sagte wul i.

⁹Nsi ghù Daniel fon fen bo kondèn mbwe ngakwé mbwe netèt ba njabmfenkun.

¹⁰A tshob Daniel ndù: Me tshwèt mbwôg yàm tshùaben, mfen, ze tu wul i bèn njab ju ze bin ghù njù bo ju ze bin ghù nu là; bin nediag ndù a be yen zin ndù bin jum ntshùa njoṅ ghuan tsin fa, me lo' tu àm ntô yi a numke?

¹¹Daniel tshob ngabéb dù' ze ngakwé mbwe netèt ba njabmfenkun fà Daniel, Hanania, Mikaél bo Azaria yi ndù a ke ndôte yub là ndù:

¹²Laṅte yag ghafa' tsho, bo ke mfà be njab bo ntse bag mum lé'njù gham.

¹³O nsi lôte mba bag be yi là bo mba ben tse bo tshwèt njù jujù mfen be yi là, ntshùa ndùlala ngù num ghafa' tsho mb'o yen nà.

¹⁴A ju' mba bo tshob yi là, ndaṅte yub mum lé'njù gham.

¹⁵Lé'njù gham lo be tôge, bo yen ndù bo be mebwô, ntshote ntshùa njoṅ nshumnshum fa tse bo ke njù jujù mfen nà.

¹⁶Fe num yen ngelaṅ nà ngabéb dù' nke ndo' yub jujù bo mub ndu' mi a lo mbwô ndù bo nu là, nke mfà njab bo.

¹⁷Nsi fà nelène, nesiaṅte tshen bonnshum kuà li num njoṅ ṅwa'ni fa bo njoṅ zenu fa. Daniel lo ke ndèn netote ntun njoṅ njem fa.

¹⁸Lé'njù tse mfen yab ndù bo nsi lo' yub se' yi là ku', ngakwé mbwe netèt ba njabmfenkun lo' yub nèn yi mbwe Nébukanetsar.

¹⁹Mfen tshobte boa bo, mèn ke tum netèt bo mbe mba Daniel, Hanania, Mikaél, bo Azaria là; bo lo' yub ntshufe' mum fa' mfen.

²⁰A lo ke mbe num njoṅ nu fa z'a bètte zenu bo nesiaṅte, nu ze mfen bètte yub là, a yen ndù bo ghù zenu ntshùa njoṅ ghangam fa boa njoṅ ghaka fa tse bo be mum ze ngô là yoṅ tse gham.

²¹Daniel ghô bwe kà nkum num mbwe ngu'njù mba Kirus jù fen nà.