Read Medumba Daniel 12 Bible Online

Daniel 12 - Medumba bible

Daniel 12

¹Mikaél nsi lo nsi num yen ngelaṅ nà. A b'a mfen ndùb z'a be ntsin mbaṅ yu nzwit mèn nà. Yen ngelaṅ nà nsi b'a ze nge', lèn nge' z'a ke' to' be, tà nse' nkum sènni, fe mba ngô be là. Nzwil o nsi tum ntshu vù yen ngelaṅ nà, benntùn tshen nà tse bo nsi tèt ndèn mub mum Ṅwa'ni là.

²Mbe' yàm ben tse bo tshwèt nzi mum ngô mbab là nsi bame, tsemo' bam num yôg matmat, tsemo' bam num tuswe bo nge' matmat.

³Ghasiaṅte nsi ziag mba kamànyam be mfôg là, ben tse bo na' ntswite nunetsin benntùn yàm ziag mba nsa maṅwù là, matmat.

⁴Wù Daniel, lé' men ntshob li mum tsham, nte sitam num Ṅwa'ni tà nèn nkum miagte ngelaṅ. Benntùn yàm nsi bunte num nu nenùne (benntùn yàm nsi bunte, nukebwô ke nèn mbwe), yub nelèn kwi'te.

⁵Tu wul àm Daniel lo ke ndôte, mbe tshù njen tsemo' benntùn bàa tsin tù: Mo' tsin kaṅ ta'ntse, mo' tsin num mo' kaṅ ta'ntse.

⁶Mo' tshob mèn z'a ket nzwe mebwô, ntsin netèt ta'ntse là ndù: Tshen lèn nu ke to' yen ni nsi be tà kum à ndùke?

⁷Me ju' mèn z'a ket nzwe mebwô ntsin netèt ta'ntse là tshob; a bù' bu i ze zwim bo ze kwéb ntshag mfe kamànyam, ndo' lén mèn z'a tswe matmat là nkàn mfe yi ntshob ndù: A nsi b'a num ngu'njù tat kam; tshen tshu là nsi mi ndùse bo nsi be'te ze neta nzwit mèn nelàn fafa là.

⁸Me lo ju'u, là ke tshùb, ntshob ndù: Tshùaben àm, tshen tshu là nsi miagt'a ndùke?

⁹A bùnte me ndù: Daniel, nène, nummbe tshen tshu là b'a tsham, ndù bo te sitam bwe tà nèn kum miagte ngelaṅ.

¹⁰Bo nsi lànte ben yàme, se' yub bo fôge, lànte yub mbwôge. Ghatshùagntù nsi ghù nukebwô, sàm mèn netèt bo ke nsi ju'u, là ben tse bo ghù nesiaṅte là nsi ju'u.

¹¹Fe ndùse jule'te Nsi ze njoṅ ndù fa nsi mi, bo lo' ze mat neghamte Nsi mfàm z'a bag ntshùate là nse' yi, lé'njù nsi tôg bwe bon bwe'e ntshob bàa ntsha' mbùm.

¹²Mènfen b'a mèn z'a nsi bébe, tà nèn kum mum lé'njù ntsha' mbùm ngù lé'njù ntshob tàn bon tat nkù tat là!

¹³Mba wù là, tam manze miagte yu ngelaṅ; o nsi fite bèn lo tù num ntsi' mu ndùse ndé'njù nsi mi là.