Read Medumba Daniel 2 Bible Online

Daniel 2 - Medumba bible

Daniel 2

¹Ntùm mbatte ngu'njù bàa mba Nébukanetsar be mfen nà, a zi ba njem. Tu i tshu', miaglo keb tu i.

²Mfen ghù bo tsiaṅ ghangame, ghaka, ghasôgntse, mba ba Kaldéa ndù bo se' ntote njem ts'a yen nà a ju'u. Bo se' ntsinte mbwe mfen.

³Mfen tshob bo ndù: Me zi mo' njem, tu àm tshu', nummbe me tshwèt nkù ntù nelèn yen njem nà.

⁴Ba Kaldéa tshob mfen mum ntshob Aram ndù: A bwô ndù mfen tswe matmat! Tshob njem z'o yen nà ghafa' tsho, bag nsi tote ntun mi wù.

⁵Mfen bùnte ntshob ba Kaldéa ndù: Tu wul àm jù' yen nu li ntùm ntù àm ndù bin be ke tote ntun njem me, mba bo nsi tshu'te zin nkamnkam, bèn sate min mba' fa.

⁶Là, a be ze bin tote ntun njem me, me lèn nà, mba me nsi fà nda' nzenze bin, bèn ghù nku'ni tse ndùb bin. A ndùlala, bin tote ntun njem me, me lène.

⁷Bo bùnte mbatte yoṅ bàa, ntshob ndù: A bwô ndù mfen soṅ ghafa' tse njem, bag nsi tote ntun mi yi.

⁸Mfen bèn mbùnte ntshob ndù: Bin zwi ngelaṅ à nummbe bin lèn ndù tu wul àm bèn njù' yen nu là ntù àm, a b'a kua' nenùne, me lène:

⁹A be ze bin ke' ghù me lèn njem nà là, mba ju ze me jù' là nsi ghù à be bin. Bin nabte netèt bin netshob ntshob tatte me bo mi fùte, kà nkum ndùse ngelaṅ nsi bate là. A ndùlala bin soṅ àm njem, kà me lène, a be ze bin tote ntun mi me là.

¹⁰Ba Kaldéa tsin mbwe mfen mbùnte ntshob ndù: Sàm mèn ke num nsitsha' z'a ku'ni neghù mfen lèn ju z'a tshwèt mbètte là. A ndùlala sàm mfen, ze ndùb mba ze neta, ke' to' bètte lèn yen ju là ngangame, ngaka ke ze Kaldéa lo.

¹¹Ju ze mfen tshwèt mbètte là ta neshu, sàm mènntùn ke bwe z'a b'a tsin mbwe mfen ngù a lèn ju z'a tshwèt nkô là, k'a ke nda' nsi tse dù'ntswe yub ke' b'a netèt benntùn nyiaṅtu là.

¹²Mfen ya ntù, nja ntù num yen nu là neshu. A tshob ndù bo zwite njoṅ ghazenu fa mum ngô Babilon.

¹³Bo tshob yen ntshù' là mum ngô, nto' neke nzwite ghazenu, nke ndiag Daniel boa shun tse biagte yube.

¹⁴Ndùlala Daniel lo' zenu bo zete ntshob nu yi Arjok, tà tse ghabéb dù' mfen z'a tum nke nèn biagte ghazenu tse bo be mum ngô Babilon nà.

¹⁵Daniel tshob Arjok tàmànjô mfen ndù: Numke ntshù' mfen ta neshu ndù à? Ndùlala Arjok soṅ Daniel ju z'a nsi là.

¹⁶Daniel nèn mbètte mfen ndù a faṅ ngelaṅ yi, a nsi tote ntun njem yi.

¹⁷Daniel nèn ndà i, nsoṅ Hanania, Mikaél, bo Azaria, shun tse nu z'a nsi là,

¹⁸ndù bo le'te Nsi z'a be kamànyam nà, ndon kondèn i mum yen mesin nà, ndùlala ndù kà zwite Daniel boa shun tse mba tshé' ghazenu tse bo mum ngô Babilon nà.

¹⁹Ndùlala Nsi la'te yen mesin nà Daniel mum njem tèttswe', Daniel nyàmte Nsi z'a kamànyam nà.

²⁰Daniel gha' ntshu i ntshob ndù: A bwô ndù lén Nsi be neghamte ngu'ngu', nummbe zenu bo neta b'a ze.

²¹A yi bèn nke mbate ngelaṅ boa ntswe'njù, a yi bèn nke ntsho' fenfen num ndiaṅ mube, nke nte fenfen num ndiaṅ mube, a yi nke mfà zenu ghazenu, nke mfà nelèn ju ben tse bo lèn neju' nu là.

²²A yi nke nda'te ju z'a tsho, ndem nà, a nke ndèn ju z'a lem mum njam nà, bo nelàn ke mbèn mbe.

²³Wù Nsi tà tshàm, me be mfà ghamte wù, nke nyàmt'o, nummb'o lo fà zenu bo neta me; ndonni o ghù me lèn ju ze bag na' mbètt'o yi là, nummb'o ghù bag lèn tsham mfen.

²⁴Ndùlala Daniel lo nèn mbaṅ Arjok ze mfen na' ntshob yi ndù a zwite ghazenu fa bo be Babilon nà, ntshob yi ndù: Kà zwite ghazenu tse bo Babilon nà. Lo' àm nèn yi mbwe mfen, m'a' tote ntun njem yi.

²⁵Arjok lo' Daniel nèn yi mbwe mfen ndende, ntshob yi ndù: Me fon mo' mèn netèt kuan ntsho tse bo lo' mfe yi Yuda là, a ghù netote ntun njem mfen. Bot nku neto

²⁶Mfen bùnte ntshob Daniel ze lén se be Beltasar là ndù: O ku'ni nesoṅ àm njem ze me yen nà, mbèn ntote ntun mi me ké?

²⁷Daniel tsin mbwe mfen, mbùnte ntshob ndù: Mesin ze mfen tshwèt mbètte ndù bo tote là, a ke' b'a ghazenu, ghaka, ghangame, bo ghalèn nsa bèn ngù nela'te mfen.

²⁸Là, ta' Nsi num bwe, mfe kamànyam z'a be nda'te ba mesin nà, a yi bèn ngù ndù mfen Nébukanetsar lèn ju z'a nsi se' mum tsemo' lé'njù là. Tshù njem boa tshu ts'o nô num kunndà so njen ni:

²⁹Mfen, o lo nô num kunndà so, nkwate ko' tu o mfà num ju z'a nsi se' ndùse yen ngelaṅ ni nsi tôg là; mèn z'a be nda'te mesin nà ghù ndù o lèn ju z'a nsi se' là.

³⁰Mbe se' mba me là, a be ze nela'te mesin yen njem nà se' me là, mb'a ke b'a ndù mo' zenu num num àm z'a tshùate ze benntùn nà; là, mb'a b'a ndù me tote njem mfen mba ndù o lèn nkwatenu ntù o.

³¹Mfen, o lo ke ndôte, njen mo' neto ndùb, yen neto là zi neshu, nke nziag neshu, neto mbit là tsin mbwe o, ntshù mi kuni neshu.

³²Tu neto là na' mb'a gol nelàne, ndàntù i bo mbu mi be silba; zwe' i bo njam nku mi be ntùn fôgtab;

³³ntammbwe mi be tùne; nku mi be, mo' kam i be tùne, mo' be tsha'a.

³⁴Mb'o ke ndôte là, mo' loṅ fiag, bu sàm mèn ke ywimt'é, ndab num nku neto mi mo' kam i be tùne, mo' be tsha' là, nyute yube.

³⁵Ndùlala, njoṅ i fa tamte nyute: Tùne, tsha'a, tùn fôgtab, nkàb mba gol; njoṅ i fa tswe mba nke'ntshu ngefet ze fetmbaṅ be nkel i nèn yi ndùse bo ke'te ngefele, kà bo ke bèn njen ntshùa mi là. Là loṅ s'a lab num neto là tù' mà mbat ndùb, ndun num njoṅ nsitsha' fa.

³⁶Tshù njem nà, bag nsi tote ntun mi mbwe mfen.

³⁷Mfen, o b'a mfen fenfen, Nsi z'a mfe kamànyam nà lo fà fen wù, mfà mba', neta bo ghamte.

³⁸Nsi fà bon benntùn, nyàm tshwèt, nsaṅe, tse bo be ntswe njoṅ dù' fa là mum mbu mu, ngù o sa' njoṅ yub fa: A b'a wù bèn mbe tu gol.

³⁹Yu nufen nsi be tôge, mo' nufen mbatte bàa lo nsi; l'a ke nsi kote yu nufen; nufen mbatte tat nsi lo nsi sa' njoṅ njù nsitsha' fa. A b'a tùn fôgtab.

⁴⁰Yen nà nsi be tôge, mbatte nufen kuà lo nsi, nta mba tùn nà; ndaṅndaṅ mba tùn s'a be nyute njoṅ i fa, nkute njoṅ i fa là, be ndaṅndaṅ yen nufen nà nsi be'te, nyute njoṅ tshen nufen nà fa.

⁴¹Mb'o yen nku bo ntu nku, mo' kam i be tsha'a, mo' be tùn nà, yen nufen nà nsi ghabte bag bag; là mo' ju nsi be num i mba neta tùn nà, nummb'o lo yen tùn ndù a tamte bo tsha'a.

⁴²Ndaṅndaṅ mba ntu nku na' mbe, mo' kam i be tùne, mo' be tsha' là, yen nufen nà nsi ta num mo' bag i, fùag num mo'o.

⁴³O lo yen mba tùn tamte bo tsha' là, nummbe bo nsi wat kàn ben nyiaṅtu; là mo' ke nsi ṅab num mo'o, ndaṅndaṅ mba tùn ke' ghù neṅab num tsha' là.

⁴⁴Nsi nsi tsho' mo' nufen num ze ngelaṅ tshen fenfen nà, ze mo' ju ke nsi sat'é là; mo' nzwit mèn mba ntshù' ke nsi tô i. Tu wul i nsi be'te, biagte tshen nufen nà, tswe tse kua' matmat.

⁴⁵A ju ze loṅ s'o yen a tsho' mfe num mbat bu sàm mèn ke ywimt'é, mbe'te tùne, tùn fôgtab, tsha'a, nkàb bo gol, tshwèt nda'te là. Nsi ze ndùb ghù mfen lèn ju z'a nsi se' ndùse tshen tshu là tôg là. Yen njem ni b'a ndaṅndaṅ, ntote ntun mi be nenùne.

⁴⁶Ndùlala mfen Nébukanetsar vù nsi kabkab, te ntunkekwi' mi nsi mbwe Daniel, ntshob ndù bo fà nda' yi bo labinda.

⁴⁷Mfen tshob Daniel ndù: Kua' nenùne, Nsi zin b'a Nsi ba nsi, mbe Tshùaben fenfen, mbe ngala'te ba mesin, nummb'o ku'ni kà nda'te yen mesin ni.

⁴⁸Ndùlala mfen bù'te Daniel, mfà nda' yàm yi boa tse tshunkàb. A lo' Daniel ngù ngomna taṅngô Babilon yi, mbèn ndo' i ngù nkam ndùb yi netèt njoṅ ghazenu fa mà Babilon.

⁴⁹Daniel bètte mfen ndù a lo' Sadrak, Mésak mba Abed-Négo, ngù kam taṅla' yi mum taṅngô Babilon; Daniel lo ke mbe z'a ntshundà mfen.