Read Medumba Daniel 3 Bible Online

Daniel 3 - Medumba bible

Daniel 3

¹Mfen Nébukanetsar ghù bo nabte neto gol ze ntse i nenèn tù be mfi' ṅam ntat, bam se be mfi' tat là. A te i mà tômbo' Dura, ntùm taṅngô Babilon.

²Mfen Nébukanetsar ghù bo tsiaṅ kambwe'e, kam taṅla', kamkame, ghalé' tshunkàb, ghatsho'te, ba ntoṅnku, fenfen nte' ba tàmànjô mum njoṅ ntaṅngô fa, ndù bo se' njù jùa, ndo' ngamte neto ze mfen Nébukanetsar te tù là yi.

³Ndùlala kambwe'e, kam taṅla', kamkame, ghalé' tshunkàb, ghatsho'te, ba ntoṅnku, fenfen nte' mba ba tàmànjô mum njoṅ ntaṅngô fa, tse'te mum lé'njù jùa neghamte neto ze mfen Nébukanetsar te tù là.

⁴Ngayob njo tshag nz'é tù ntshob ndù: Ntumntum, ngôngô, benntùn tse bo tum ntùm njoṅ ntshob fa là, tshù ju ze bo bètte ndù bin ghù li!

⁵Ndùse bin nsi ju' nze nta, mandô, loṅ nse'e, medub, loṅ nsa, ndô boa njoṅ nzenze tshu nebu' sa yi là, bin vù nsi kabkab ngamte neto gol ze mfen Nébukanetsar te tù là.

⁶Mba we lo z'a ke nsi vù nsi kabkab, ghamte neto gol là, bo nsi ma' i ntùm ndà mbwôg z'a tshwèt nkù neta là be ndùse.

⁷A ndùlala, ndùse njoṅ ngô fa nsi ju' nze nta, mandô, loṅ nse'e, medub, loṅ nsa, boa njoṅ nzenze tshu nebu' sa yi fa là, njoṅ ntumntum fa, ngôngô, benntùn tse bo tum ntùm njoṅ ntshob fa là, vù nsi kabkab, ngamte neto gol ze mfen Nébukanetsar te tù là.

⁸A tshùa ndùlala tsemo' ba Kaldéa nèn mbaṅ mfen mbote ba Israél yi.

⁹Bo tshob mfen Nébukanetsar ndù: A bwô mfen tswe matmat.

¹⁰Tu wul o me mfen, lo fà ntshù' ntshob ndù mba zit mèn no z'a nsi ju' nze nta, medub, mandô, mfùag, kem, ndô boa njoṅ nzenze tshu nebu' sa yi là, a vù nsi ngamte neto gol.

¹¹A be ze mèn ke' vù tse nsi ngamt'é là, mba bo nsi ma' i ndà mbwôg ze mbwôg tshwèt nkù bwe là.

¹²Là, Sadrak, Mésak mba Abed-Négo, ba Yuda ts'o yab yub neke ntô Babilon nà, tshen ben nà ke' lo' ntshù' o mba ju là me mfen. Bo ke' fa' yu nsi ke bèn ngamte neto z'o ghù bo te tù là.

¹³Ndùlala Nébukanetsar ya ntù neshu, ntshob ndù bo nèn ndo' Sadrak, Mésak mba Abed-Négo nse' yi. Bo lo' yub nse' yi mbwe mfen.

¹⁴Nébukanetsar tshob bo ndù: Sadrak, Mésak mba Abed-Négo, a b'a nenùn ndù bin ke' be fa' tshàm nsi, ke bèn ngamte tsin neto gol ze me te tù là ké?

¹⁵Ndonni bin nabte wut tsin ngwù nsi, ngamte neto ze me nabte là ndùse bin nsi ju' nze nta, medub, mandô, mfùag, kem, ndô boa njoṅ nzenze tshu nebu' sa yi là ké? A be ze bin ke' ghù ndùlala là, mba bo nsi ma' zin ntùm ndà mbwôg ze mbwôg tshwèt nkù bwe là. A zit nsi z'a ku'ni neyôg zin mum mbu màm à?

¹⁶Sadrak, Mésak mba Abed-Négo bùnte ntshob mfen Nébukanetsar ndù: A ke' ywimte ndù bag fà mbùn ntshob wù num yen nu là.

¹⁷Mfen, a be ze Nsi yag ze bag num mfa' yi kô neyôg yag là, mb'a nsi yôg yag mum ndà mbwôg ze mbwôg tshwèt nkù bwe là, mba mum mbu mu.

¹⁸A be z'a ke' ghù ndùlala là, mfen lèn ndù be bag ke fa' tsho nsi, ke bèn nzi mfa' tshag neto gol z'o te tù là. Be bag ke ghamte yube.

¹⁹Ndùlala yantù dun ntù Nébukanetsar, ntshù mi kaṅ num Sadrak, Mésak mba Abed-Négo. A tshob ndù bo kwé'te mbwôg ndà mbwôg mba bo be nto' nkwé'te là yoṅ tse sammbàa.

²⁰A tshob ben neta tse bo mum ze ntshu ntsho là ndù bo kut Sadrak, Mésak mba Abed-Négo ma' yub ndà mbwôg ze mbwôg tshwèt nkù bwe là.

²¹Ndùlala bo kut tshen ben ni boa tshe'nku sobe, kum sobe, kummbaṅ sobe, mba tsemo' nzwe tshobe, ma' yub ntùm ndà mbwôg ze mbwôg tshwèt nkù bwe là.

²²Mba ntshù' mfen ta neshu là, bo kwé'te mbwôge, ndà mbwôg dum nga' mbu, kà lambwôg zwi benntùn tse bo ke ma' Sadrak, Mésak mba Abed-Négo tse bo kut yub mum ndà mbwôg là.

²³Tshen ben tat li, Sadrak, Mésak mba Abed-Négo tse bo kut yub là vù mum ndà mbwôg ze mbwôg tshwèt nkù bwe là.

²⁴Ndùlala mfen Nébukanetsar bwôg, ndo nsi kua' ndende. A tshob tse ghafà ntag ndù: Be lo ke ma' à ben tat ndù be kut yub ntùm ndà mbwôg ké? Bo bùnte ntshob ndù: A b'a kua' nenùn me mfen!

²⁵A tshob ndù: Tshù, me ke njen à ben kuà tse bo tshwèt nzinte ntùm ndà mbwôge, mo' sàm ju ke ke ngùtni yub là. Ntshù mbatte ben kuà là tswe à mba mi mén ba nsi là.

²⁶Ndùlala Nébukanetsar kù'te nèn nzendà ndà mbwôg ze mbwôg tshwèt nkù bwe là, ntsiaṅ Sadrak, Mésak mba Abed-Négo, ntshob ndù: Ghafa' Nsi z'a tà mfe tù, bin tum nse'e. Yen ngelaṅ nà, Sadrak, Mésak mba Abed-Négo tum netèt mbwôge.

²⁷Kambwe'e, kam taṅla', kamkame, mba tse ghafà ntag mfen tse'te, njen ndù mbwôg lo ke ghù sàm ju tshen ben nà. Bo yen ndù sàm ntàn nyiaṅtu yub ke' kù, tshe'nku sob ke bagte, mba nda' nsém mbwôg ke lam num bo.

²⁸Nébukanetsar tshob ndù: Ghamte be Nsi Sadrak, Mésak mba Abed-Négo, nummb'a lo ntum Angél i, njôg ghafa' tse tse bo yab ntù num i, mfàn ntshù' mfen nà. Bo bam nefà wut tshob ntshùa nefa' ke neghamte mo' nsi ghua kà ke b'a nda' yub Nsi.

²⁹Ndonni tshù ntshù' mi me fà li: Mba zit nzwit mèn no, mba zit ngô lo, mba mit ntshob lo z'a tshob kebwô num lén Nsi Sadrak, Mésak mba Abed-Négo là, mba bo a' kebt'é nkamnkam, mbiagte ze tunndà kà tù' à bwembwôge, nummbe mo' nsi z'a ku'ni netshu' mèn ndùlili là ke bwe.

³⁰Yen nà be tôge, mfen ghù numebwô Sadrak, Mésak mba Abed-Négo mum bag ngô Babilon.