Read Medumba Daniel 5 Bible Online

Daniel 5 - Medumba bible

Daniel 5

¹Mfen Baltazar ghù mo' jùa ndùb, boa ben tse tse ndùbndùb, ntu ntsha' mbùm. Tu wul i nu ndu' mbwe bo.

²Ndùse Baltazar zwi'te ndu' là, a tshob bo lo' ba ntu' gol, tse nkàb, tse tàab Nébukanetsar na' ndo' Ndà Nsi Yérusalém nà, ndù mfen, ben tse tse ndùbndùb, zwi tse mba màndà tse lo' nu ndu' yi.

³Ndùlala bo lo' ba ntu' gol tse bo lo' Ndà Nsi mà Yérusalém nà; mfen, ben tse tse ndùbndùb, zwi tse mba màndà tse lo' nu ndu' yi.

⁴Bo nu ndu', nyàmte ba nsi gol, tse nkàb, tse tùn meba, tse tùne, tse tù mba tse ndoṅ.

⁵Be ndùse, ntu mbu bu ta' mènntùn ṅwag num kumba' ba' mfen, mbwe dù' ndambo, nkite ju num kumba'. Mfen yen yen bu mènntùn nà z'a ke nkite ju là.

⁶Ndùlala ntshù mfen bate. Nkwatenu mi kag fétwut num i, mbu mi yub, ntunkekwi' mi yub, mo' tsham num mo'o.

⁷Mfen kua' neta, ngù bo tsiaṅ ghaka, ba Kaldéa boa ghalèn nsa. Mfen tshob ghazenu tse bo be Babilon nà ndù: Mba we lo z'a siaṅ yen ju nekite li, ntote tun i me là, mba bo nsi ma' nzwe ndob num i, taṅ ntshèn gol tô i, me fà mbatte dù' tat yi mum yàm nufen.

⁸Njoṅ tse ghazenu mfen fa tsho ndà; là ke ku'ni nesiaṅ yen ju nekite là, ke bèn nku'ni nefà ntote tun mi mfen.

⁹A tshùa ndùlala fétwut bèn ntshùb mfen Baltazar, ntshù mi kaṅ, ntama' ghom njoṅ tse ben ndùbndùb fa.

¹⁰A tshùa num ntshob mfen bo mi ben tse tse ndùbndùb, màmfen tsho ntùm ndà jùa, ntshob ndù: A bwô ndù mfen tswe matmat! Kà nkwatenu mu kag fétwut num o. Kà ntshù mu kaṅ.

¹¹Mo' mandum num ntùm ngô o ndù a ghù ywèt ba nsi nelàn num i. A lo be num ze ngelaṅ tàan mo' lèn nelàne, mo' lèn nesiaṅte bo mo' lèn zenu be num i ndaṅndaṅ mba zenu ba nsi là. Mfen Nébukanetsar, tàan, lo yab i nkam netèt ghaka, ghalèn nsa, ba Kaldéa, ghangame,

¹²nummbe bo lo fon ywèt zenu ndùb, ywèt nesiaṅte mbe tse nkwate num Daniel ze mfen tswi lén se Beltasar là. A lo ghù zenu nelo' mbagte njem yi, nelo' ntote nkùt yi mba nelo' nsiaṅte nu yi num tshu ts'a ta là. A bwô ndù bo nèn ntsiaṅ i.

¹³Bo lo' Daniel nèn yi mbwe mfen, mfen tshob Daniel ndù: O b'a Daniel mo' mèn netèt kuan ntsho Yuda, tse mfen, tàa na' ndo' mfe yi mà Yuda là ké?

¹⁴Me ju' ndù o ghù ywèt ba nsi num o, ndù bo be mfon nelàne, nesiaṅte mba zenu z'a tshùate là ju o.

¹⁵Ndonni bo lo' ghazenu, ghalèn nsa nse' yi mbwe àm ndù bo siaṅ yen ju nekite li, ntote ntun mi me, là bo ke ku'ni netote ntun men ntshob là.

¹⁶Me ju' ndù o ku'ni nefà ntote ntun mi, mba nesiaṅte nu ts'a ta là. Ndonni, a be z'o ku'ni nesiaṅ yen ju nekite li, mfà ntote ntun mi me là, mba me nsi ma' nzwe ndob num o, ma' ntshèn gol tô o, o be mbatte mèn tat mum nufen àm, nke nsa' la'.

¹⁷Ndùlala Daniel tsin mbwe mfen mbùnte ntshob ndù: Me gha tsho nda'. Fà tshen nda' là tsemo' ben. Mba ndùlala, me nsi siaṅ ju ze bo kite là mfen, fà ntote ntun mi yi.

¹⁸Mfen la'a, Nsi z'a tà mfe tù là lo fà fen tàan Nébukanetsar, mfà nezi, ghamte mba nkuni yi,

¹⁹a tshùa num nezi z'a fà yi là, njoṅ nzwit benntùn fa, njoṅ ngôngô fa mba njoṅ ntshob fa nke mvètte, nke mbwôg mbwe i. Kà nke nzwi mèn ze ntù i kô là, nkag mèn ze ntù i kô là ntùn, nkôg mèn ze ntù i kô là, mbù'te mèn ze ntù i kô là.

²⁰Là ndùse nkwate mi ko'o, ntù i to' neta, tà nèn nkum mum ka'te là, bo swe' i num diaṅkwa ma' nsi, nkwé ghamte mum mbu mi;

²¹bo lo ta' i netèt bon mèn nyiaṅtu, ntù i tù' mba ze nyàm nà, ze dù'ntswe tù' mba ze nkekwèn tshwèt là. Bo nke mfà nenà yi ndaṅndaṅ mba ba nyàmna' là, meme' kamànyam naṅ num wul i, tà nkum ndùs'a lèn ndù Nsi z'a tà mfe tù bèn nke ntô nufen benntùn, mbèn nke mfà i mba we lo z'a kô i là.

²²Tu wul o Baltazar, nshum i, o ke' bag tu o nsi, mba mb'o lèn njoṅ yen nu là fa là.

²³O lo nsi num Tshùaben kamànyam. O lo ghù bo lo' ntu' ts'a be ntùm ndà i là nse' yi mbwe o, wù, ben tsho tse ndùbndùb, zwi tsho boa màndà tsho, bin à bo nu ndu' ntùm bwe, ba nsi tùn nkàb, tse gol, tse tùn fôgtab, tse tùne, tse ntù mba tse ndoṅ, tse bo ke' be yen ke be ju', ke bèn ndèn sàm ju là, o lo nyàmte yube. Là mbe se' mba Nsi z'a mem zwiag so bu i, njoṅ tsho manze fa b'a mum mbu mi là, o ke ghamt'é tsho.

²⁴Ndùlala, a b'a yi bèn ntum yen kam bu là mba yen ju nekite ze bo kite là.

²⁵Tshù ju ze bo kite li: Méné, méné, tekèl Uphasin.

²⁶Tshù ntote ntun nu li: Méné, Nsi siaṅ yu nufen kà miagt'é.

²⁷Bo fi' o num kilô, njen ndù o fùage.

²⁸Parsin, bo ghabte nufen o, mfà mo' bag i Media, mfà mo' Persia.

²⁹Be ndùse Baltazar tshob bo ma' nzwe ndob num Daniel, ntaṅ ntshèn gol tô i, ntshob ntùm ngô ndù a bèn ngù mbatte dù' tat mum nsa'ngô.

³⁰Bo zwi Baltazar, mfen Kaldéa be yen tèttswe' là.