Read Medumba Osé 10 Bible Online

Osé 10 - Medumba bible

Osé 10

¹Israél na' mb'a nkùa netshùme. A lo ke njam ntàm yàme. Ndaṅndaṅ mb'a ke ntshùm yàm nà, b'a ndaṅndaṅ mba bo ke nkwi'te ntômbwôg nele'te Nsi yi là. Ndaṅndaṅ mba ngô yub ke nsin nà b'a ndaṅndaṅ mba bo ke nabte neto a bwô là.

²Ntù yub ghabte, bo nsi ket nge' i. Tshùaben nsi sate ntômbwôg le'te nsi mub mba neto tshobe.

³Nummbe bo be ntshob ndù: Bag ke' ghù mfen, nummbe bag ke' bwôg Tshùaben. Ke ze mfen ku'ni neghù bag à?

⁴Bo be ntshob ntshob ke ntun, nke nka'ni tatte, ndùse bo wat kàn nà. A ndùlala nunetsin nke nku' ndaṅndaṅ mba tù s'a ghù tshùb num i num nku' num ba ngônà là.

⁵Ba Samaria nsi vètte num mfô Bét-Avèn; ngô nsi te vù neto, ghale't'é nsi nyiaṅ ngon vù, ke làn num ghamt'é z'a nsi mi num miag mi là.

⁶Bo nsi lo' i nèn yi Asiria, mfà mfen ndùb mba nda' là. Tuswe nsi tsho num Efraim, Israél nsi tswe ntùm tuswe num nkwatenu mi.

⁷Mfen Samaria mi ze bwe, mba kam ntshwèn num ntshùa ndù wat num ntse là.

⁸Bo nsi sate mbwe' ts'a be num dù' mbù'mbù' Avèn, mbe nukebwô ze Israél ghù là. Njô boa kwékwénàndô nsi ko' num ntômbwôg mube. Bo nsi tshob ba mbat ndù: Kabte num bag, ntshob nkônga ndù vùte num bag.

⁹Israél, o lo ghù nukebwô fe mum tse lé'njù Guibéa. Bo lo tàn tshob tù bwe. Ntsho nsi tsho mà Guibéa num tu ghazwite benntùn tse bo be ntùm bwe là.

¹⁰Me nsi nèn naṅ ntsha tu bo; ngôngô nsi tse'te num bo, num nenaṅ ntsha tu bo num tshubte nukebwô tshobe, tse bàa.

¹¹Efraim b'a mén mfô ze bo kwiagt'é mebwô là, a be nkô nefèt miag tshu du' netsham nsa; là, me nsi yab mbu num mbwô tô i; m'a' taṅ Efraim; Yuda nsi dù' tsha'a. Yakob nsi tshùbte tsha'a.

¹²Bin ywit tshu ntùm nunetsine, ntsho' tshu ntùm kondèn. Bin tem nà nswe. Tshù ngelaṅ nediag Tshùaben ni, tà nkum ndùs'a se'e, nsa nunetsin i num be là.

¹³Là, bin lo dù' nukebwô, a bwô bin tsho' mfànnu. Bin nsi jù tàm tatte; nummb'o yab ntù à num nu nkalige, num ben neta ts'o ghù là.

¹⁴A ndùlala mo' tshu'te ntsho lo netèt tsho ben, kà nke mbagte tsho ngô fa, mba mfen Shalman na' mbagte Béth-Arbèl mum lé'njù ntsho, nzwi ba mà boa bon yoṅ ntshù' là.

¹⁵Tshù ju ze Bétél nsi soṅ so num bin nà. A tshùa num nukebwô zin, mfen Israél nsi mi kà mfôgnjù nse'e.