Read Medumba Osé 12 Bible Online

Osé 12 - Medumba bible

Osé 12

¹Efraim lo' tatte ndiaṅ àm yi mbume, tunndà Israél lo' fùte ndiaṅ àm yi mbume, Yuda ke' à bo Nsi, a b'a mèn nenùn mbwe Nsi Nelàne.

²Efraim be njôg fetmbaṅ, nke ntam njam fetmbaṅ z'a fe bag ntumnyam nà. A be nkwi'te tatte boa nefètte lem njoṅ lé'njù fa. A wat kàn bo Asiria, bo nke ndo' mfèt nèn yi Egipto.

³Tshùaben b'a tù kam bo Yuda. A naṅ ntsha tu Yakob num nzin mi. A nsi ghù num i ndaṅndaṅ mba mfa' mi be yi là.

⁴Yakob lo tshùb ku mfèl i ngelaṅ z'a be bam màab là. Ndùs'a be mènntùn nà, a zwe bo Nsi.

⁵A zwe bo Angél, ntshùa i. A kua' mbètt'é kondèn. Yakob tèl i Bétél, a bwe là ze Nsi tshob nu yi là.

⁶Tshùaben b'a Nsi, mbe tàndà ntsho. Tshùaben b'a lén se.

⁷Tu wul o, bèn njam ntèt Nsi o, tshùb nkôni bo nenùne. nke nywinte num Nsi o njoṅ ndù fa.

⁸Ndaṅndaṅ mba ba Kanaan nà, Efraim b'a ntàntàn z'a ghù nkilô mi fùte mum mbu mi là. A be nkô netatte.

⁹Efraim tshob ndù: Me ke ndiag à neghù tshunkàb yàme, m'a' ghù fu' s'a be sàm nà. Là a b'a njoṅ màm ntsho'fa' fa, bo ke nsi yen sàm ju z'a bag là ntùm fu' sàm, ju z'a b'a nukebwô là.

¹⁰Tu wul àm me b'a Tshùaben Nsi o, fe mà ngô Egipto; me nsi ghù o bèn ntswe ntùm ba ntàb mb'a na' mbe ntùm lé'njù ze me na' mbumte bag à bin nà.

¹¹Me lo tshob nu ghatshob ntshob Nsi, me lo ghù njem yàm tshùa num ntshu ghatshob ntshob Nsi ntshob ba tànkùt.

¹²A be ze Galad b'a ju banban nà, mba bo nsi biagt'é. Bo tshwèt nton ba mfô mà Guilgal. Ndùlala ntômbwôg le'te Nsi mub nsi tù' mba tse ndoṅ nà, num ngônà ts'a fèn nà.

¹³Yakob kù nèn ngô Aram, Israél fa' num ta' mènnzwi, a béb bwoṅ nyàm num ta' mènnzwi.

¹⁴Tshùaben tshùa num ta' ngatshob ntshob Nsi ngù Israél ko' mà Egipto, ntshùa num ta' ngatshob ntshob Nsi mbéb Israél.

¹⁵Efraim ghù Tshùaben ya ntù neshu. Tshùaben nsi ghù lem ts'a fètte là tsho num i. A nsi ghù tuswe z'a kuni là vù tu i.