Read Medumba Osé 13 Bible Online

Osé 13 - Medumba bible

Osé 13

¹Ngelaṅ Efraim ke ntshob là, fétwut nke mbe; a lo b'a mèn ndùb Israél; l'a tshùa num Baal, mbe ngafànnu, nkwù.

²Ndonni bo tshwèt ngù nukebwô nèn yi mbwe, nke ndo' tùn se bo ton nà nabte mfuni ju yi, nabte neto mba bo kwate là; njoṅ i fa b'a fa' ghave. Bo be ntshob num bo ndù: A bwô ndù ben tse bo num mfà tshule'te là nyô nge' ba mfô.

³A ndùlala, bo nsi be mba ṅam nkebnjù là, mba meme' mi a be nzwimte ndende, mba nenà nsa mi fetmbaṅ be nket dù' netsham nsa là, mba nzembwôg mi a tum num tôndà là.

⁴Tu wul àm, me b'a Tshùaben, Nsi o, fe mà Egipto. A ke nda' me o ke' lèn mo' Nsi, ngayôg ke mo' dù' ghua k'a ke nda' me.

⁵Me lo lèn o num kônkwa, num tsha' nejumte.

⁶Bo lo yoṅ njwèt mum nenà mebwô, njwèt kua' mebwô, ntù tshob to' ko'tewut; a ndùlala ze bo lagt'àm nà.

⁷A ndùlala, me lo zi ngwayit num bo; me lo zi nzwimàntô num bo, nya' yub num manze.

⁸Me nsi kam yub mba mbù tshwèt ze bo ghom bon tse là. Me nsi sé'te ndàntù yub; me nsi fagte yub mba nzwi ngwayit là; ba nyàm tshwèt nsi sé'te yub mfémfé.

⁹Israél me nsi sat'o, we z'a nsi ku'ni neywimt'o à?

¹⁰Mfen o b'a yà ndonni à? A bwô ndù a yôg o ntùm njoṅ ntusô mu fa. Tsho ghasa'kam b'a yà ts'o na' ntshob num bo ndù: Fà ta' mfen bo kamkame.

¹¹Me lo lo' yantù mfà mfen wù yi, me nsi kwé i ntùm tshùagntù.

¹²Bo lé' mfànnu Efraim, nkabte nukebwô i nsi.

¹³Lèn ya tse mènnzwi be ngù ngelaṅ nebwe là nsi tsho num i. A b'a mén z'a ke' ghù zenu yàm nà. Efraim ghù fen num neyôge, là, a tsw'a mba mén z'a num nga netum bam màab ndùse ngelaṅ ku' là.

¹⁴Me ke nsi tshu' yub bu àm ze neta ngô fe ben. Me ke nsi tshu' yub bu vùkob, vùkob, njoṅ o yà? Ngô fe ben, yu nesate yà? Là nekaṅ ntù lem num miag màm.

¹⁵Mba Efraim sin yàm netèt fèt tse là, fetmbaṅ z'a fe bag ntumnyam, fetmbaṅ Tshùaben z'a nsi lo kônkwa là, nsi ghù mi ntse jumte, mi ntumnsi ntse nsi zwimte. Fetmbaṅ nsi bagte njoṅ tshunkàb tanjoṅ fa.