Read Medumba Osé 6 Bible Online

Osé 6 - Medumba bible

Osé 6

¹Bin se' be bèn njam ntèt Tshùaben, nummb'a lo sé'te, là a yi bèn yate be; a be z'a lab be là, mb'a yi bèn kut mfaṅ num be.

²A nsi be be lé'njù bàa a fà yôg be, a be kum lé'njù tat a bù'te be. Be nsi yôg mbw'é;

³be lène, ndèn nediag Tshùaben. A tshwèt nse'e, ndaṅndaṅ mba mfôgnjù z'a be a ke tag ke se' là; a nsi kum num be mba mbaṅ nà, mba njwèt mbaṅ z'a be nzwi' tsha' là.

⁴Efraim, m'a' ghù à ke wù à? Yuda, m'a' ghù à ke wù à? Yu nebétni b'a mba ṅam nkebnjù là, mba meme' nkebnjù mi a be ntôg là!

⁵A ndùlala m'a' tshùa num ghatshob ntshob Nsi ndab yube, m'a' zwite yub num ntshob mi a tum ntshu àm nà; yàm netsho'te ṅwag a mba nka' mbwôgtshù là.

⁶Nummbe me kô à nebétni, ke b'a tshule'te Nsi, nkô à nelèn Nsi, ke b'a tshu neton a kù fafa.

⁷Bo lo fàn kàn ngelaṅ ze bo tsho ntùm ngô Kanaan nà. A bwe là ze bo na' nga àm nà.

⁸Galad b'a ngô ba ghù kebwô, lem fètte num njoṅ dù' fa bo num ntshùa bwe là.

⁹Bwoṅ ghale'te Nsi tswe à mba ba fimntshu tse bo tshwèt nya' mènntùn nà, bo be nzwite benntùn num manze Sikém; nummbe bo tsho tshob ntùm nukebwô.

¹⁰Me yen ju z'a kuni neshu là ntùm tunndà Israél. Efraim be nkat bwe, Israél nke nsagte wul i bwe!

¹¹Yuda, a te nsi num o yu, me tshwèt nabte netsho' tshu. ndùse me nsi sô yàm nzwit mèn ndà kuan bèn yi njam nà.