Read Medumba Osé 9 Bible Online

Osé 9 - Medumba bible

Osé 9

¹Israél, kà tswe tsiaṅte, ke ṅwate mba tsemo' ngôngô là. nummb'o kat, ngua' Nsi o. O be nkô nkàbfa' kat, num njoṅ dù' fa tse bo tshwèt ntsham nsa bwe là.

²Dù' netsham nsa mba tshab netshàb ndu' yi ke nsi bèn be wù. Ndu' nswe ke nsi bèn be.

³Bo ke nsi bèn tswe ntùm ngô Tshùaben. Efraim nsi bèn njam mà Egipto; bo nsi jù jujù ts'a sagte là Asiria.

⁴Bo ke nsi bèn naṅ ndu' Tshùaben tshob, tshule'te Nsi ke bèn mbwô i, a nsi tswe bo à mba bàn vù là, njoṅ benntùn fa tse bo nsi jù là, a nsi sagte yube, nummbe bàn yub b'a nda' yub tù' bo; a ke nsi tsho mum ndà Tshùaben.

⁵Bin nsi ghù à ndùke mum lé'njù njùa Tshùaben à?

⁶Tshù bo là bo tshwèt nène, mba bo sate ngô là. Ngô Egipto nsi lo' yube, Memfis nsi be tufi.

⁷Lé'njù tse nenaṅ ntsha ku'u, lé'njù tse neyen nefà ntsho'fa' ku'u. A bwô Israél lène, bin ba Israél tshob ndù ngatshob ntshob b'a mbabune, mèn ze ywèt be num i là b'a ngazwiaṅte. Mba nukebwô tsin yàm nà, be ndaṅndaṅ tsin ghakeban nsi yàme.

⁸Ngatshob ntshob Nsi, ngalôte Efraim, b'a bo Nsi. Ba Israél num mbaṅ àm. Me ngatshob ntshob Nsi b'a ndù bo bùn nkù num njoṅ tshàm manze fa. Nkembàn num ntùm ndà Nsi i.

⁹Bo nèn tà nkum ntùm tun nukebwô mb'a na' mbe num tse lé'njù Guibéa là; Nsi kwimte mfànnu mube. A nsi naṅ ntsha tu bo num nukebwô tshobe.

¹⁰Me lo fon Israél kônkwa mba ntàm tù ndu' là. Me lo yen tà tsin mba mbwe ntàm tù mbatsi là. Là, bo lo nèn Baal-Béor, ntsho bwe ngwù ntùm nu tuswe; bo lo tù' ju tshabte, mba ju ze bo ke nkô là.

¹¹Ghamte Efraim nsi fùt mba saṅ nà. Nebwe ke bèn mbe, nejùm ke bèn mbe, nelèt ke bèn mbe.

¹²A be ze bo tshagte bon tshob là, mba m'a' kwé yub ke bo yoṅ mbe benntùn, nummbe nge' num mba tu bo yub, ndùse me nsi tsin ngùanesà mbaṅ bo là.

¹³Me num ndo' miag ndôte bag ngô Tiro yi, njen Efraim ndù a lo' bon tse mba ba mbab là, a nsi lo' yub nèn mbwe mèn z'a zwite yub là.

¹⁴Fà bo me Tshùaben. Ke z'o nsi fà bo à? Fà bam bènnzwi tse bo ke' be bwe mén nà bo mba mbùn mub mi a jum nà.

¹⁵Njoṅ kebwô yub fa la'te wul i Guilgal, me na' nto' nebàn yub à bwe, mba num kebwô z'a ntùm mfa' mub là; me nsi sô yub ntùm ndà àm, me ke bèn nekô yube; fenfen tshob b'a fenfen ba ghatatu njoṅ yub fa.

¹⁶Bo lab Efraim, nga tshob jum, bo ke nsi bèn yam ntàme. A be ze bo bwe mba nebwe là, mba m'a' ghù mbwô tàm s'a be kô, s'a tum bam i là kwù.

¹⁷Nsi àm nsi ghua' yube, nummbe bo lo ke ju' ntshu i; bo nsi ke ntsha netèt ngôngô.