Read Medumba Amos 1 Bible Online

Amos 1 - Medumba bible

Amos 1

¹Ntshob Amos mo' mèn netèt ghabéb mbwe mà Tékoa. Njem z'a na' njen num Israél num ze ngelaṅ Ozias, mfen Yuda mba num ze ngelaṅ Yéroboam nshum Yoas, mfen Israél là. Yen nà lo tôge, a tswe ngu'njù bàa kà tsha' nyi'te.

²Amos na' ke ntshob ndù: Tshùaben nsi tsin mfe num mbat Sion tshu' mba ngwayit là. A nsi tsin Yérusalém fà nz'é tù; yen ngelaṅ nà nenà ts'a be ntùm kin mbwe ghabéb mbwe là nsi ke ndàne. Tu mbat Karmél jume.

³Tshù mba Tshùaben tshob li: A tshùa num nukebwô ze Damas ghù mbèn ngù là, me ke nsi sô ju num nkwat'àm. Nummbe bo lo kebte ba Galad nkalig ntùne.

⁴Me nsi tum mbwôg num tunndà Hazaél, a kù tse ntshwèt Ben-Hadad.

⁵Me nsi be'te fùn nzendà Damas, biagte ben tse bo be ntswe dù' bu'to' Avèn nke ngù nukebwô nèn yi be mbwe là, biagte mèn z'a tshùb kôg fen mà ngô tsiaṅte Edèn nà. Me nsi lo' ba Siria ghù kuan yi mà Kir. Tshùaben bèn ntshob ndùlala.

⁶Tshù mba Tshùaben tshob li: A tshùa num nukebwô ze Gaza ghù mbèn ngù là, me ke nsi sô ju num nkwat'àm. Nummbe bo ghom ta' ngô ntùn num neswèn Edom.

⁷Me nsi tum mbwôg mum ngô Gaza, a kù tse ntshwèt.

⁸Me nsi biagte ben tse bo be ntswe Asdod là, biagte mèn z'a tshùb kôg fen mà Ekron nà; me nsi bù' bu àm nsi num Ekron, tshé' ba Filistia nsi bite fa. Tshùaben bèn ntshob ndùlala.

⁹Tshù mba Tshùaben tshob li: A tshùa num nukebwô ze ba Tiro ghù mbèn ngù là, me ke nsi sô ju num nkwat'àm. Nummbe bo swèn bwoṅ kuan Edom, ke kwimte kàn fètfèt se bo wat là.

¹⁰Me nsi tum mbwôg mum ngô Tiro, a kù tse ntshwèt.

¹¹Tshù mba Tshùaben tshob li: A tshùa num nukebwô ze ba Edom ghù mbèn ngù là, me ke nsi sô ju num nkwat'àm. Nummb'a lo lo' ṅwi ngwù yi njam fèt tse, nummb'a fam kondèn i, yantù i ke nta nèn à be mbwe, tshùagntù i ghô tse matmat.

¹²Me nsi tum mbwôg mum ngô Téma, a kù mba' mebwô mi a be mà Bosra là.

¹³Tshù mba Tshùaben tshob li: A tshùa num nukebwô ze bon Ammon ghù mbèn ngù là, me ke nsi sô ju num nkwat'àm. Nummbe a lo be ngelaṅ ntsho bo be diag negha'te yub ngô mfagte bam bènnzwi jùm tse bo be mà Galad là.

¹⁴Me nsi te mbwôg mum yub ngô mà Rabba, a kù tse ntshwèt. Yen nu là nsi b'a mum lé'njù zwe', mba netèt ntshu'te ntsho, netèt zim mba mum lé'njù fetmbaṅ.

¹⁵Mfen yub boa kamkam tse nsi nèn ndà kuan. Tshùaben bèn ntshob ndùlala.