Read Medumba Amos 2 Bible Online

Amos 2 - Medumba bible

Amos 2

¹Tshù mba Tshùaben tshob li: A tshùa num nukebwô ze bon Moab ghù mbèn ngù là, me ke nsi sô ju num nkwat'àm. Nummbe a lo tone, nton mvôg mfen Edom, k'a kù nkute.

²Me nsi tum mbwôg mum ngô Moab, a kù tse ntshwèt Kiriot. Moab nsi bi à ntùm ntshu'te, netèt ntshu'te ntsho mba ntshu'te nze nta.

³Me nsi biagte ngatsho'te netèl i, zwi i boa kamkam tse. Tshùaben bèn ntshob ndùlala.

⁴Tshù mba Tshùaben tshob li: A tshùa num nukebwô ze bon Yuda ghù mbèn ngù là, me ke nsi sô ju num nkwat'àm. Nummbe bo ghua' ntshù' Tshùaben ke ze nkàn mi. Nummbe ba nsi banban tse bo na' nke nsoṅte ba tà tshob, bo nke nzin njam bo là, lo ghù bo fàn manze.

⁵Me nsi tum mbwôg Yuda, a kù tse ntshwèt Yérusalém.

⁶Tshù mba Tshùaben tshob li: A tshùa num nukebwô ze bon Israél ghù mbèn ngù là, me ke nsi sô ju num nkwat'àm. Nummbe bo swèn mèn netsin mba nkuan nà num nu nkàb, nswèn mbwoṅ num nketo' nku mbàa.

⁷Bo ke ntshàm ntù à be nenyiaṅte tu ben nke'nke' mum mbabe, nke mbagte ze nze ghayennge' a be nebagte; mén bo tà be ndo' ta' ménngon ntshù', ndùlala ndù bo ghù lén sàm se nelàn tù' ju banban.

⁸Bo be nôte num nzwe tse bo yab tshwèt bwe là, mbaṅ mba sit tômbwôg lo ntùm ndà nsi tshobe, nke nu ndu' ntùm ndà nsi tshobe, mba ndu' ben tse tu wut tshob naṅ ntsha tu bo là.

⁹Mbe ndù me lo biagte ba Amor num miag mube, bo tse bo sag mba sédra, neta yub be mba ze tù bù là; me lo biagte ntàm mub mfe tù, nkebte nga tshob mànsi.

¹⁰Mbe ndù me lo ghù bin ko' mà Egipto, ntshagte zin num kônkwa num ngu'njù ṅam nkuà, ndù bin lo' ngô ba Amor a tù' zine.

¹¹Me lo ghù ba ghatshob ntshob Nsi tum netèt tsin nshumnshum; ngù ba nazir tum netèt tsin ghuan benntùn. Bon Israél, a ke' b'a ndùlala ké? Tshùaben bèn mbètte ndùlala.

¹²Là, bin lo ghù ba nazir nu ndu', mbe se' mba ba ghatshob ntshob Nsi là, bin fà ntshù' bo, ntshob ndù: Kà bin tshob nu Nsi.

¹³Tshù, me nsi tshu'te zin mba kalig se nenà dun bwe be ntshu'te tsha' là.

¹⁴Mèn z'a fùag wut là ke nsi ku'ni nekù. Mèn z'a ghù neta là, net'é ke' ku'ni neywimt'é. Nduku ke nsi béb yôg se.

¹⁵Mèn ze ngoṅkét be bu i a nke ntàmte nu yi là ke nsi bébe, mèn ze nku mi fùag là ke nsi lo dù' i, nko' nyàmdiaṅ ke nsi béb yôg se.

¹⁶Kua' neta ngama' ntsho netèt ba soyé nsi kù à tunntôg mum sen lé'njù là. Tshùaben bèn ntshob ndùlala.