Read Medumba Amos 3 Bible Online

Amos 3 - Medumba bible

Amos 3

¹Bon Israél, bin ju' men ntshob li mi me, Tshùaben tshob num bin nà; me tshob num njoṅ tunndà fa ze me na' ngù a ko' mà Egipto là ndù:

²Me lo tsho' à nda' bin netèt njoṅ ntunndà fa ts'a num nsitsha' là. A ndùlala m'a' naṅ ntsha tu bin num njoṅ mfànnu min fa.

³Benntùn bàa ghù netamte nzin ke be ndù bo bwôg mbe, mbe ntshu ntshù' ké?

⁴Be ngwayit tshu' mà fèn ke be ndù a ghù ze jujù ké? Be mén ngwayit tsin tô ntshag nz'é tù ke be ndù a ghom ju ké?

⁵Be saṅ vù ntùm nkù num tsha' ke be ndù bo bùn nkù njab ju bwe ké? Be nkù fiag ke be ndù ju tsho ntùm bwe ké?

⁶Be bo tô nta ntsho ntùm ngô kà benntùn tag ke bwôg ntùm ngô ké? Be nge' tsho ntùm ta' ngô ke be ndù Tshùaben bèn ngù yen nu là ké?

⁷Nummbe Tshùaben Nsi ke' be ghù sàm ju ke be ndù a te bu num ghafa' tse, ba ghatshob ntshob Nsi.

⁸Ngwayit tshu'u, we z'a ke bwôg à? Tshùaben tshob, we z'a ke nsi tshob ntshob Nsi à?

⁹Bin tshag nze zin tù ntùm tse ntshwèt Asdod mba ntùm tse ntshwèt Egipto ntshob ndù: Bin tse'te num tu mbat Samaria, njen njoṅ va' ts'a netèt bwe njene. Nefètte lem yàm netèt bo neshu.

¹⁰Bo ke' lèn neghù nu ndaṅndaṅ. Tshùaben bèn ntshob ndùlala. Bo num ntse'te tshu tse bo lo' num nefètte lem mba num tshô là ntùm ntshwèt tshobe.

¹¹A ndùlala Tshùaben Nsi tshob ndù: Ngakeban nsi lo' ngô, mbiagte yu neta, bo lagte njoṅ tsho ntshwèt fa.

¹²Tshù mba Tshùaben tshob li: Ndaṅndaṅ mba ngabéb mbwe be nsoṅ nku mbwe mbàa, ke kam toṅ mbwe lo, ntshu ngwayit là, a b'a ndaṅndaṅ mba bon Israél, tse bo tswe mà Samaria, mbaṅ tôg kunndà num nzwe nso' ts'a fe Damas là, nsi yôg là.

¹³Tshùaben Nsi, Nsi tàndà ntsho tshob ndù: Bin ju' yen nu li, ntshob tunndà Yakob.

¹⁴Lé'njù se me nsi naṅ ntsha num Israél num mfànnu mi là, me nsi naṅ ntsha num ntômbwôg mi a Bétél là, me nsi be'te ndô tômbwôge, a vùte nsi.

¹⁵Me nsi sate mba' mi a be num ngelaṅ mfùag num nko là bo num ngelaṅ ze mfùag ke' be ko là; me nsi biagte mba' nsô nsen. Mba' ben ndùbndùb ke nsi bèn be. Tshùaben bèn ntshob ndùlala.