Read Medumba Amos 4 Bible Online

Amos 4 - Medumba bible

Amos 4

¹Bin ju' men ntshob li, me mfô ts'a Basan, bin tse bin be num mbat Samaria, bin tse bin be mfétte bwoṅbwoṅ, nke ma'ni ghayennge' là; bin be ntshob du tsin ndù: Bin se' ndu' bag bin nu.

²Tshùaben Nsi na' ntshob nsaṅlaṅ ntùm nelàn i ntshob ndù: Tsemo' lé'njù nsi se' num tse bo nsi lo' ba ghub soṅ zin yi, lo' ba lob soṅ tshé' ben ts'a tù' là mba ba ngontse là;

³Bin nsi tum num tô s'a be mbwe mba we lo là; bo nsi ta' zin tshag num mbat Hermon. Tshùaben bèn ntshob ndùlala.

⁴Bin ba Israél, bin nèn ndà Nsi Bétél ngù nukebwô bwe. Bin nèn ndà Nsi Guilgal ngù nukebwô bwe ntshùate; bin ke mfà tshule'te Nsi mba zit nkebnjù lo, nke mfà zin bag ju ntshù' num tse nze gham njoṅ lé'njù tat fa.

⁵Bin be ton tsin tshu nenyàmte Nsi yi ma' ntsha' bwe. Bin yob njo num tsin tshu bwôntù, ntô nta njam bwe. Nummb'a tshu tse bin tshwèt nkô là me bon Israél. Tshùaben bèn ntshob ndùlala.

⁶Tu wul àm lo tum nziku' ntùm tsin ngô, ngù bin bwoṅ bàn ntùm njoṅ ndà tsin fa. Mba ndùlala bin ke' bèn njam ntèl àm. Tshùaben bèn ntshob ndùlala.

⁷Tu wul àm lo gha nefà mbaṅ bin, ndùs'a ke ntù' ṅwù tat kà netsho' tshu ku' là. Me lo ghù mbaṅ lo ntùm mo' ngô, ke lo ntùm mo'o. Mo' nà lo ghù mbaṅ, mo' z'a ke' ghù là jum.

⁸Ngô bàa ke tat lo nèn ntùm mo' ngô nu ntse bwe, ke nu k'a fite ntù yub z'a tshwèt nkù là. Mba ndùlala bin ke' bèn njam nse' ntèl àm. Tshùaben bèn ntshob ndùlala.

⁹Me lo lo' mbé' boa netswe mbagte tshu tsin yi; nka' tsin bo nkùa tsin jum, ngamntàn fèt ntù mbatsi min mba nten mine. Mba ndùlala bin ke' bèn njam ntèl àm. Tshùaben bèn ntshob ndùlala.

¹⁰Me tum keya' netèt bin, lèn keya' z'a be mà Egipto là; me zwite tsin ghuan benntùn ṅwi, mfaṅ bo ghom tsin nyàmdiaṅe; me lo ghù ndam fe tshu ko' ntsho mum mfaṅ ntselag mine. Mba ndùlala bin ke' bèn njam ntèl àm. Tshùaben bèn ntshob ndùlala.

¹¹Me lo sate zin ndaṅndaṅ mba Nsi na' nsate Sodom bo Gomora là; bin na' mbe à mba nesèn mbwôg ze bo sô ntùm mbwôg ndùb là. Mba ndùlala bin ke' bèn njam ntèl àm. Tshùaben bèn ntshob ndùlala.

¹²Israél, me nsi ghù num o be ndùlala; là, a bwô ndù o nabte wul o bin Nsi o bumte me Israél!

¹³Nummbe mèn z'a nabte ba mbat mba fetmbaṅ, nke ngù mènntùn lèn nkwatenu mi là, lén se b'a Tshùaben tàndà ntsho. A yi nke ndo' mfôgnjù nkaṅ njam yi, nke nzin num dù' tsha' ts'a ṅate là.