Read Medumba Yona 1 Bible Online

Yona 1 - Medumba bible

Yona 1

¹Tshù ntshob Tshùaben mi a tshob Yona nshum Amitai li:

²Lo tù, nèn Ninive, ngô ndùb nkua' ntshob nu num i! Nummbe tshùagntù i ko' tà nse' nkum mbaṅ àm.

³Là Yona lo tù nkù nèn Tarsis, ngùanesà num miag Tshùaben. A swe' nèn mà Jafa, njen mo' sitima, a nke nèn Tarsis; a fà ze nkàb nze, ntsho ntùm sitima, nke nèn boa bo Tarsis. Yona ke nèn ngùanesà num miag Tshùaben.

⁴Là Tshùaben kag mo' fetmbaṅ neta num dibantse. Mo' tonkèt fetmbaṅ shùm sitima, a nke ndiag nenèn ntùm ntse.

⁵Ghafa' tù sitima bwôg, mba we lo bu' mbu ze nsi; ndùlala bo sô tshu ts'a ntùm sitima là naṅ ntùm ntse, ndù sitima na' mfùage. Yona lo swe' nèn tun sitima nô nsi, nke nzi kua' mebwô.

⁶Mfen sitima nèn mbaṅ i, ntshob yi ndù: Numk'o nke nzi à? Lo tù ntsiaṅ yu Nsi! Be mo' ndù a kwate be, be ke bi.

⁷Bo tshob bo bo ndù: Bin se' be tam tô, njen mèn z'a lo' yen nge' li nse' yi num be là. Bo tam tô, a vù tu Yona.

⁸Bo tshob Yona ndù: Soṅ yag mèn z'a lo' yen nge' li nse' yi num bag là. Yu ntsha b'a ndùke? O fe à yà? Yu ngô b'a yà? O tum à ntùm zit nzwil à?

⁹Yona bùnte, ntshob ndù: Me b'a mén Héber, nke mbwôg Tshùaben, Nsi mfe kamànyam z'a nabte dibantse mba tsha' là.

¹⁰Mo' mà bwôg ndùb tshùb tshen ben ni, bo tshob yi ndù: Numk'o ngù ndùlal'à? Tshen ben nà lo lèn ndù a ke nekù nèn ngùanesà num miag Tshùaben, nummb'a lo tshob bo.

¹¹Bo bètt'é ndù: Ke z'a bwô ndù bag ghù kà dibantse na' mfite num bag à? Nummbe dibantse lo ke nshùm nèn à be mbwe.

¹²Yona bùnte bo ndù: Bin lo' àm ma' ntùm dibantse, ndù dibantse fite num bin; nummbe me lèn ndù a tshùa num tu àm kà yen fetmbaṅ ndùb li mbe.

¹³Tshen ben nà nke nkagtùn nelo' sitima nèn yi num tsha'a, là ke ku'ni, nummbe dibantse lo ke nshùm be neta.

¹⁴Ndùlala bo tsiaṅ lén Tshùaben ntshob ndù: O! Tshùaben, kà ghù ndù bag bi num yôg yen mènntùn ni, ke ghù ndù lem tse tsho tu bag! Nummbe wù Tshùaben ke ngù à ju z'o kô là.

¹⁵Ndùlala bo lo' Yona ma' i ntùm dibantse, dibantse fi.

¹⁶Tshen ben nà bwôg Tshùaben, mbèn ngù nka'ni.