Read Medumba Nesiaṅe 10 Bible Online

Nesiaṅe 10 - Medumba bible

Nesiaṅe 10

¹Tshùaben tshob Mosé ndù:

²Ghù bo lo' tùn silba nabte nta yi bàa, bo tswe tùn kà nabte yi; a sage, a ywimte netô ntsiaṅ ntse'te yi, mba netô ngelaṅ nelo ntam manze.

³Ngelaṅ ze bo nsi tô ba nta là, njoṅ benntùn fa tse'te mbaṅ ntshundà mbumte.

⁴A be ze bo tô nta nda' ntshu ntshù' là, mba nda' ba tà ntse'te tse bo num ntô benntùn ntsha'ntsha' là bèn bumte mbaṅ o.

⁵Ngelaṅ ze bo tô nta nz'é ta là, mba ba tswe bag ntumnyam bèn nène.

⁶Ngelaṅ ze bin bèn tô nta mbatte bàa, nz'é ta là, ba tswe bag mà ntèn nèn, ngelaṅ ze bin bèn tô nta mo' yoṅ i nz'é ta là, mb'a ba lèn bo ndù bo bèn nène.

⁷Mbe se' netsiaṅ mbumte, bin tô nta ke tsin, nz'é ke ta.

⁸A b'a nshumnshum Aron, ghale'te bèn tô nta. Yen ni b'a ntshù' ke bate ze bin nsi ke ghù netèt bin num njoṅ zwiaṅ benntùn fa là.

⁹Ngelaṅ ze bin tswe ntùm ngô zine, ntsho kamte zin nà, bin tô nta, nz'é ta, ndo' ngù lèn yi. Ndùlala b'a nekwimte Tshùaben Nsi zin, ndù a kwé zin bu ghakeban tsine.

¹⁰Num ba lé'njù tsiaṅte mba lé'njù njùa tsine, bin tô ba nta kà bo ndo' tshu neton a kù, mba tshule'te num fite nèn yi, a ghù Nsi kwimte zine. Me b'a Tshùaben Nsi zin.

¹¹Num mbatte ngu'njù bàa, num lé'njù ṅam mbàa, num maṅwù bàa ndot lo num tu ndà Nsi.

¹²Bon ba Israél lo tun mbat Sinaï, mba we lo, be mba bo na' nabte là, ndo nèn nkum num kônkwa Aram.

¹³A na' mb'a mbwe i, mba ba Israél na' ntum nke nèn mba Tshùaben na' ntshob Mosé ndù a tshob bo là.

¹⁴Mbwe benntùn nenène na' mb'a mbàn bon Yuda boa tse ntshu ntsho; ze ngatshagte na' mb'a Nason nshum Aminadab.

¹⁵Ngatshagte ntshu ntsho tunndà Isakar na' mb'a Nétanél, nshum Suar.

¹⁶Ngatshagte ntshu ntsho tunndà Zabulon na' mb'a Eliaf, nshum Hélon.

¹⁷Bo tsho'te ndà mbumte bon Gerson boa bon Méhari, ket.

¹⁸Benntùn ntùm mbàn Rubèn nèn bo ze ntshu ntsho, ngatshagte ntshu ntsho na' mb'a Elisur, nshum Seder.

¹⁹Ngatshagte ntshu ntsho tunndà Siméon na' mb'a Shelumiél nshum Suridaï.

²⁰Ngatshagte ntshu ntsho tunndà Gad be Eliasaf, nshum Deul.

²¹Bon Kéhat ket yub ndà mbumte, tsemo' nke mbote tshu kà bo nse'e.

²²Benntùn ntùm mbàn Efraim boa tse ntshu ntsho lo yub, ze ngatshagte ntshu ntsho tunndà na' mb'a Elishama nshum Aminadab.

²³Ngatshagte ntshu ntsho tunndà Manasé na' mb'a Gamliél, nshum Pédatsur.

²⁴Ngatshagte ntshu ntsho bon Benjamin na' mb'a Avidan, nshum Geodoni.

²⁵Nemiagte ndo, num njoṅ mbàn fa na' mb'a Ahiazar, nshum Amisadaï.

²⁶Ngatshagte ntshu ntsho tunndà Aser na' mb'a Pagiel, nshum Akran.

²⁷Ngatshagte ntshu ntsho bon Néftali na' mb'a Ahira, nshum Enan.

²⁸Tshù nka ze njoṅ bon ba Israél na' ndo nke nène, mba tshob ntshu ntsho là. Bo lo nke nène.

²⁹Mosé tshob Hodab, nshum Reuél, ze Madian, ntse i ndù; Bag nèn à ntùm ngô ze Tshùaben na' ntshob ndù: Me nsi fà bin nà. Se' bag bin nène. Mba wù yu nsi ghù yu bag ntswe mebwô ntùm yen ngô là ze Tshùaben bù bag là.

³⁰Hodab bùnte yi ndù: Me ke nsi nène. Me nsi nèn à ntùm ngô yage, ntùm tunndà yage.

³¹Mosé tshob yi ndù: Kà faṅ yage, nummbe o lèn dù' ze bag kut mbàn yag bwe num kônkwa là, o a' be ngatshagte yage.

³²A be z'o bam ndù bag bin nèn nà, mb'o nsi ghù yu bag fu' ntùm ntswe mebwô ze Tshùaben bam nefà bag là.

³³Bo lo num mbat Tshùaben nezin num lé'njù tat. Koṅ Tshùaben bèn ndo nke mbe mbwe bo num tshen lé'njù tat là, num nelèn dù' ze bo nsi kut mbàn yub bwe là.

³⁴Tshùaben lo nke nkabte yube, mbwôgtshù ngelaṅ ze bo ke ndo ntùm mbàn nà.

³⁵Ngelaṅ ze bo ke nèn nà, Mosé tshob ndù: Tshùaben lo tù, ghakeban tsho nsi sate, ghamaṅt'o nsi kù mbwe o.

³⁶Ngelaṅ ze bo ke nte Koṅ nsi là, a tshob ndù: Bèn se'e. Bon Israél ba njoṅ kesiaṅ nze bo yàm ntshùa ntambia' bo mba ntshu'ntshu'.