Read Medumba Nesiaṅe 19 Bible Online

Nesiaṅe 19 - Medumba bible

Nesiaṅe 19

¹Tshùaben tshob Mosé bo Aron ndù:

²Tshù mo' nu ze Tshùaben na' mfà ntshù' bwe li: Tshob ba Israél ndù bo fà mén mfô meba mba ze mènnzwi wù, ze mbit ke' be num i là. Mfô z'a ke' yoṅ nket kele' là.

³Bin nsi lo' yen nyàm nà nèn yi ngale'te Nsi Eléazar, a lo' nyàm ntum yi ntùm mbàn, nzwi i mbwe i;

⁴ngale'te Eléazar nsi lo' ntu bu i lo' lem yen mfô là yi, miag yoṅ sammbàa, mbe ghù ndùlala, nke ndôte nzendà mbumte;

⁵nton yen mbàb là be mbwe i, nton ngub i, mbàb, mba lem, mba mbèt mi.

⁶Ngale'te nsi lo' ntshwèn tù bù, boa nenà nelamte mba ju meba, ma' ntùm mbwôge, dù' ze mfô tshwèt nke nkù là;

⁷ngale'te sôg nzwe tse, mbam wul i ntse, ngù ndùlala kà njôg mbèn njam ntùm mbàn, ntswe ṅu'u tà nkum mfetnjù.

⁸Mba ngazwi nyàm nsi sôg nzwe tse, mbam wul i ntse, ntswe ntùm ṅu'u tà nkum mfetnjù.

⁹A mènntùn z'a làn nà bèn ṅwat bwembwôg yen mfô là, tum ntùm mbàn yab ntùm dù' nelàne. Tshen bwembwôg là nsi fa' num ba Israél num nelànte wut. A b'a ju nele'te num nukebwô.

¹⁰Mba mènntùn z'a ṅwat yen bwembwôg là là, sôg nzwe tse, mbam wul i ntse, ntswe mba mèn ze ṅu'u be num i là, tà nkum mfetnjù. A b'a ntshù' ke bate num bon ba Israél mba num ngùn z'a be netèt bo là.

¹¹Mènntùn z'a kwag fe mèn, k'a b'a be ke lèn fe mèn no, nket ṅu'u z'a nsi tswe num i num lé'njù sammbàa là.

¹²Mb'a nsi lo' men ntse là, lànte wul i yi num mbatte lé'njù tat, a kum lé'njù sammbàa, a tù' mèn nelàne. A nya ke lànte wul i num lé'njù tat, mb'a ke nsi làn tse num lé'njù sammbàa.

¹³Mba we lo z'a kwag fe mèn, fe mèn z'a yôg nekwù ke lànte wul i là, nsi sagte dù'ntswe Tshùaben. A bwô ndù bo sô i netèt bon ba Israél, nummbe a ke' sôg wul i ntùm ntse nelànte wut, a sagte wul i, a ke' à ntùm ṅu'u.

¹⁴Tshù ntshù' li: Mèn z'a tsho ntùm ndà ze fe mèn be bwe, mba mènntùn z'a be kwù ntshiag i ndà là, ket ṅu'u num lé'njù sammbàa.

¹⁵Mba njoṅ tshundà fa ts'a tenge, ndù kabt'é ke bwe là ket ṅu'u.

¹⁶Mba we lo z'a tsham ku i num fe mèn tshwèt, ze bo wal i là, ke mba ke lèn fe mèn no, ke num mvôg mèn, ke tufi lo, nsi tswe ntùm ṅu'u num lé'njù sammbàa.

¹⁷Neghù ndù yen mèn nà làne, a bwô ndù bo lo' bwembwôg le'te, naṅ ntùm ndô ntse ze tumnsi ntse be bwe là.

¹⁸Mènntùn z'a be nelàn nà nsi lo' nzenyi, ntshag ntùm men ntse là, miag num ntàb, num tshundà, num njoṅ benntùn fa tse bo be ndà là, mba num mèn z'a kua' mvôg fe mèn nà, ke fe mèn ke mèn ze bo zwi i là, ke tufi lo.

¹⁹Mènntùn z'a làn nà nsi miag ntse nelànte wut num mèn z'a ke' làn nà, num mbatte lé'njù tat mba num mbatte lé'njù sammbàa. A nsi be kum num lé'njù sammbàa ndù a làn num nukebwô tse. Mo' mèn nsi sôg nzwe tse, bam wul i ntse, a be mfetnjù a tù' mèn nelàne.

²⁰Là mènntùn z'a ket ṅu'u, ke lànte wul i là, bo nsi sô i netèt ntse'te nummbe bo lo ke miag ntse nelànte wut num i, a b'a nga ṅu'u.

²¹A b'a ntshù' ke bate netèt bo. Mbe se' num mèn z'a miag ntse nelànte wut num mèn nà, a bwô ndù a sôg nzwe tse. Mba mèn z'a kwag nda' ntse nelànte wut là ket ṅu'u tà nkum mfetnjù.

²²Mba zit ju lo ze nga ṅu'u kwag là, b'a ju ṅu'u, mba mèn z'a kwag ju ṅu'u là nsi be nga ṅu'u tà nkum mfetnjù.