Read Medumba Nesiaṅe 21 Bible Online

Nesiaṅe 21 - Medumba bible

Nesiaṅe 21

¹Ba Kanaan. Mfen Arad lo ke ntswe Negéf, nju' mbe ba Israél num manze Atafim nke nse'e, bo ma' Israél ntsho, ndo' bon Israél ngù ghandàtsha yi.

²Be ndùse, Israél bètte yen ju li Tshùaben. A be z'o kô nebù' tshen ben ni mfà mum mbu màm nà, mba m'a' le' yub kà ntusô mub vù nsi.

³Tshùaben ju' nkua' ba Israél, mbù' ba Kanaan mfà bo. Israél kôg se' sube mba se' ntusô mube. Bo tswi lén yen dù' là ndù Horma — dù' bwembwôg ntsho, dù' ntsi' ntsho.

⁴Bo lo kônga Hor, nzin num manze dibantse na' nko' ndiaṅ mbaṅ ngô Edom à nediaṅe, là nkum manze fènntù mi bo.

⁵Bo to' netshabte Nsi mba Mosé ntshob ndù: Ke bèn ngù bin sô yag nko' yi mà Egipto à? Ndù bag se' kwù num kônkwa nsen ni ké? Nummbe sàm bàn mba sàm ntse ke nsen ni, mba yen mana zwentù li yà ke mbag yage!

⁶Be ndùse, Tshùaben tum ba mbanyu njam tunndà Israél, mbanyu tshôg yub neshu, benntùn yàme kwù num tunndà Israél.

⁷Tunndà se' njen Mosé, ntshob yi ndù: Bag fàn mba bag tshabte Nsi mbèn ntshabt'o là, bu' mbu Tshùaben a ghù mbanyu kù nèn ngùanesà mbaṅ bag. Mosé le'te Nsi num tunndà.

⁸Tshùaben tshob yi ndù: Ghù bo nabte ta' mbanyu nkwim tu kam ntshwèn; mba we lo ze mbanyu tshôg i a lôte là, mb'a nsi yôge.

⁹Mosé nabte ta' ba nyu, nkwim tu ta' kam ntshwèn. Ngelaṅ ze ta' nyu ke ntshôg mèn nà, yen mèn nà lôte ba nyu, njôge.

¹⁰Bon Israél nèn, nte mbàn yub Obot.

¹¹Mbèn ndo Obot, nte mbàn yub Liyé-Ava. Num kônkwa bag ntumnyam Moab là.

¹²Mbèn ndo bwe, nte mbàn yub mbaṅ netsha' ntse Zérèd.

¹³Mbèn ndo bwe, nte mbàn yub yoṅ kaṅ Arnon z'a ke nswe' kônkwa, ntùm ngô ba Amor là. Arnon na' mb'a ndùnsi netèt Moab bo ba Amor.

¹⁴A b'a ju z'a ghù bo tshob ntùm ṅwa'ni ntsho Tshùaben ndù: Wahéb mà Sufa boa tse netsha' ntse,

¹⁵ts'a num nswe' mbaṅ la' Ar, ndam be ndùlala nèn nkum ndù Moab là.

¹⁶Bo tsho bwe, ndo' tôntse Ber. A b'a num yen Ber là ze Tshùaben na' ntshob Mosé ndù: Tse'te bwoṅ benntùn me fà ntse bo là.

¹⁷Be bwe, Israél na' fà sen kwi li ndù: Tôntse! Ko'o! Bin tam ku' tun i.

¹⁸Tôntse se ba fenfen tswe' là, se ba kam ngô tsiagte boa kamfà yub mba nkôg mub là! Bo lo kônkwa nèn Matana.

¹⁹Ndo Matana nèn Nahaliél, ndo Mahaliél nèn Bamot,

²⁰mbèn ndo Bamot nèn tômbo' z'a ke nzin nkum tu mbat Moab là. Ntshùa kônga Pisga nèn tu ntshùa kônkwa.

²¹Israél tum ghantum bo nèn ntshob Sion, mfen ba Amor ndù:

²²Faṅ me tshùa mum yu ngô, bag ke nsi faṅ manze kù'te nèn ntùm nà, ke ntùm nkùa lo. Bag ke nsi nu tshag ntse mum ntôntse mo. Bag nsi zin à be num koṅ manze ndùb kà ntôg o ntshùa.

²³Là Sion ke bam Israél mb'a tshùa mum ngô i, a tse'te njoṅ ben tse fa bo à bo nèn nebumte boa Israél num kônkwa. Bo se' Yahat, dù' ze bo ma' Israél ntsho bwe là.

²⁴Israél lab i ntshùag ṅwi nkwé ngô i neto' Arnon nèn nkum Yabok mba tà ndùnsi bon Arnon na' nkut a ta là.

²⁵Israél lo' njoṅ ntusô fa, nte mbàn i ntùm ntusô bon Amor ts'a be Hesbon, mba ts'a ghebte mbaṅ bwe là.

²⁶Nummbe Hesbon na' mb'a tusô Sion, mfen bon Amor, z'a na' ma' miagte mfen Moab ntsho, nkwé ngô i tà nèn nkum mbaṅ Arnon là.

²⁷A b'a ju z'a ghù ghakite nke ntshob ndù: Bin se' Hesbon! Bin bèn nkul i kut nswe, ngù tusô Sion bèn njwèn tse!

²⁸Ta' mbwôg tum tusô Hesbon, la' mfen Sion, ta' lambwôg z'a mi Ar ntùm tusô Moab, ntshùa kô z'a sag nèn tù mà Arnon là.

²⁹Ndon tu o là me Moab! O bi ntàn me tunndà Kémoshe! Bo lo' bon tse tse bandum ngù ghakù ntsho yi, ndo' ngonngon tse ngù nkuan yi ju Sion mfen Amor.

³⁰Bag tote yub nkéle, neto' Hesbon nèn nkum Dibon, bo kwù fa. Bag ṅwat njoṅ tshu fa neto' Nofa nèn nkum Madaba.

³¹Israél te mbàn i ntùm ngô ba Amor.

³²Mosé tum bo nèn ndo' Yazer boa dù' ts'a ghebte mbaṅ bwe, Mosé ta' njoṅ bon Amor fa tse bo be bwe là.

³³Ngelaṅ bo na' ndo bwe ntshùb mo' manze nswe nke nzin bwe là, bo ko' num manze Basan, Og, z'a be mfen Basan nà tum boa tse bwoṅ benntùn, nèn nete'te yube, ma' yub ntsho Edrei.

³⁴Tshùaben tshob Mosé ndù: Kà bwôg i! Me bù' i mfà mum mbu mu, yi mba ben tse boa ngô i; o nsi na nkôntshu fà yi mb'o na' ngù num Sion mfen ba Amor z'a ke ntô Hesbon nà.

³⁵Bo ma' ntsho ntshùa i mba bon tse boa njoṅ ben tse fa, kà mba nda' mènntùn ntshù' ke bèn mbwe' yi; bo ghù ndùlala kà ndo' ngô i.