Read Medumba Nesiaṅe 22 Bible Online

Nesiaṅe 22 - Medumba bible

Nesiaṅe 22

¹Bon ba Israél nèn nkut mbàn yub ntùm tômbo' Moab, yoṅ ntse Yordan, mbwe ngô Yériko.

²Balak, nshum Tsipor, yen njoṅ nu fa tse Israél na' nke ngù num ba Amor là,

³Moab bwôg mbwe tshen bwoṅ benntùn nà, bwôg tshùb i mbwe bon ba Israél.

⁴Moab tshob kamkam Madian ndù: Yen bwoṅ benntùn nà nsi mi njoṅ benntùn fa tse bo num ndiaṅ be mbum nà, be ndaṅndaṅ mba nyàmna' num mfèt nenàfi tshwèt là. Balak, nshum Tsipor na' mb'a mfen ba Moab num yen ngelaṅ nà.

⁵A tum benntùn ju Balaam, nshum Béor, ntùm ngô Pétor, kaṅntse ngô ze bo bwe i bwe là, ndù bo ntshob yi ndù: Bag ghù tsemo' benntùn nsen ni ndù bo tum à Egipto, bo lo' njù fa, tshù bo li tse bo yà tshùa kà ntsin mbwe àm nà.

⁶Me le't'o, nse'e, naṅ ndon tu tshen benntùn ni, nummbe bo ta ntshùa àm, mo' ndù, me ton yube, njoṅ yub me la', nummbe me lèn ndù, o num naṅ fite num mèn, mba fite nsi be yi, nenaṅ be ndon tu mèn, mb'o naṅ.

⁷Ba kamkam Moab mba tse Madian ket tshu, tse bo tsho fà ngatshob ntshob Nsi là. Bo zin kum ju Balaam, nsoṅ i njoṅ nu fa ze Balak tum yub bwe là.

⁸Balaam tshob bo ndù: Bin zi nsen ni yen tèttswe' li, me nsi bùnte nu bin ngelaṅ ze Tshùaben nsi tshob nu me là. Tshen kam nà zi ju Balaam.

⁹Nsi se' Balaam, ntshob yi ndù: A b'a ba we là la' o à?

¹⁰Balaam tshob Nsi ndù: Balak nshum Tsipor, mfen Moab bèn ntum yube, bo tshob me ndù:

¹¹Tshù tsemo' benntùn ni tse bo tum Egipto là, ndù bo lo' ngô, se'e, naṅ ndon tu bo, num lén sàm, mo' ndù me ton yube, njoṅ yub me la'.

¹²Nsi tshob Balaam ndù: Kà nèn bin à bo. Kà naṅ ndon tu tshen benntùn nà, nummbe bo naṅ mbotni num i.

¹³Njù làn Balaam tsiaṅ kamkam Balak, ntshob bo ndù: Bin bèn la' bin nummbe Tshùaben ke' bam ndù bag bin nène.

¹⁴Tshen kamkam Moab là bèn njam ju Balak ntshob yi ndù: Balaam ke' kô ndù bag bo se'e.

¹⁵Balak bèn ntum tsemo', ndù bo yàm, mbèn nkuni, ntshùa tse mbwe.

¹⁶Bo zin nkum ju Balaam ntshob yi ndù: Tshù, Balak, nshum Tsipor tshob ndù: O ko ndèn mi, kà gha nese'e me la'!

¹⁷Me nsi fà tshu kam wù yàme. Me nsi ghù mba ke lo z'o bètte me là. Se' là naṅ ndon tu tshen benntùn ni me.

¹⁸Balaam bùnte tshe' Balak ndù: Balak fà be nkàb fa, mba tùn gol fa ts'a be ndà i là me, mba me ke nsi ghù sàm ju ze nke'e, ke ze ndùb lo, ze Tshùaben Nsi àm ke' kô là.

¹⁹Bin zi nsen ni, bag bin, num nebéb ju ze Tshùaben nsi tshob me là.

²⁰Nsi se' Balaam tèttswe' ntshob yi ndù: A be ze tshen ben nà nse' tsiaṅ o là, o nèn bin à bo, là o nsi ghù à be ju ze me nsi tshob wù là.

²¹Njù làn, Balaam ko' num kekwène, nèn boa kamkam Moab.

²²Là Nsi ya ntù yi mb'a nèn nà, Angél Tshùaben tsin num manze, ntshèt manze yi ngelaṅ z'a ke nèn boa tshe' tse bàa tse bo ke nèn tshag i là,

²³kekwèn yen Angél ndù a tsin num manze, ndù a tshùb ṅwi bu i, a kù num manze nèn tshwèt. Balaam lab kekwèn ndù a bèn num manze.

²⁴Angél Tshùaben tsin num mo' manze ndù tô bwe, manze nke nèn ntùm nà ntù ndu', netèt bontsit sagba' bàa.

²⁵Kekwèn yen Angél Tshùaben, nèn ntsin mbaṅ sagba', Balaam bèn nke ndab i.

²⁶Angél Tshùaben tshùa ntsin num manze neféle, dù' ze be sàm mèn ke bémte ntshùa bu zwim ke bu kwéb lo là.

²⁷Kekwèn yen Angél, nkôg wul i mfà nsi. Balaam ya ntù ndab i shua'a.

²⁸Tshùaben ghù kekwèn tshob, ntshob Balaam ndù: Ju ze me ghù wù k'o nke ndab àm ntshu tat là b'a ke?

²⁹Balaam tshob yi ndù: Nummbe o tshwèt nke ngù be mb'o kô là, ṅwi lo mbe bu àm mba me zwi o be ndonni.

³⁰Kekwèn tshob Balaam ndù: Me ke' b'a kekwèn o z'o num nke nko' fe tà ndù ke lo ké? A b'a yàm mat nu neghù wù ndùlala ké? A tshob ndù: Nga!

³¹Tshùaben gha' miag Balaam, a yen mba Angél tsin num manze ndù a tshùb ṅwi bu i, mbag wul i nsi, ngwù nsi kabkab.

³²Angél Tshùaben tshob yi ndù: Numk'o nke ndab kekwèn o yoṅ tat à? Yene, a b'a me bèn nse' netshèt manze wù, nummbe o tshwèt ndo' yen nezin ni mba metsit ju là.

³³Kekwèn yen àm yoṅ tat nde'e mbaṅ àm. A lo nyà ke le' mbaṅ àm, mba me zwi o be dù' i, njôg mfaṅ i a yôg tse.

³⁴Balaam tshob Angél Tshùaben ndù: Me ghù nukebwô nummbe me lo ke lèn ndù o bèn ntsin mbwe àm num manze àm. Ndonni, a be z'o yen ndù dù' ze me nèn nà ke' bwô o là, mba m'a' bèn tshàm njam.

³⁵Là Angél Tshùaben tshob yi ndù: Nèn bin tshen benntùn nà, nda' ndù o nsi tshob à ju ze me nsi tshob wù là. Balaam nèn boa kamkam Balak.

³⁶Balak be ju' ndù Balaam tshwèt nse'e, nèn ndo' i Ir-Moab num dù' ze Arnon ghù ndùngô i là.

³⁷Balak tshob yi ndù: Me ke' tum benntùn wù yàme ndù bo tsiaṅ o ké? Numke o ke se' à? Me ke' ku'ni neghù njoṅ nu nku'ni fa num o ké?

³⁸Balaam bùnte Balak ndù: Ṅ, me se' ndonni njen o, me ku'ni netshob mba mit ntshob lo wù ké? Me nsi tshob ntshob mi Nsi fà ntshu àm ndù me tshob là.

³⁹Balaam nèn boa Balak nkum Kiryat-Husot.

⁴⁰Balak fà tshu nele'te tse ndùb mba tse nke'e, ntum ze ju Balaam mba ben ndùbndùb tse bo be njam i là.

⁴¹Njù làn, Balak lo' Balaam, bo yi ko' nèn Balaam-Baal dù' ze bo ke njen mo' bag benntùn bwe là.