Read Medumba Nesiaṅe 25 Bible Online

Nesiaṅe 25 - Medumba bible

Nesiaṅe 25

¹Israél tswe Kittim, benntùn fà wut tshob num nekale boa ngonngon Moab.

²Bo soṅte yube, boa bo nèn nke ngamte ba nsi neto tshobe, njù jujù bwe mbèn ngwù nsi mbwe bo.

³Ba Israél tsho kuan Baal ntùm ngô Béor, ndùlala Tshùaben ya ntù yi.

⁴Tshùaben tshob Mosé ndù: Tshùb njoṅ benntùn ndùbndùb fa, ntaṅ yub tù mbwe Tshùaben njag-nyam, ndù yantù ze Tshùaben ghù num Israél là kôgte.

⁵Mosé tshob ghatsho'te ntsha ba Israél ndù: Mba we lo zwi mènntùn ze bo yen i, a vù nsi mbwe Baal mà Béor là.

⁶Bo be yene, mo' mén Israél lo' ngon Madian nse' yi netèt fèt tse, mbwe Mosé boa ntse'te bon Israél, ngelaṅ ze njoṅ yub fa na' ntse'te mbwe nzendà mbumte nke nkua' là.

⁷Bo be yen ndùlala, ngale'te Finéas, nshum Eléazar, nshum Aron lo nsi netèt benntùn, ndo' ta' kô,

⁸ntam njam yen mén nà, tà nèn nkum bam ntshundà, ntam yub kô ben bàa fa, mén Israél mba mènnzwi, ntam mènnzwi tun bam se, a tshùa ndùlala nge' mi netèt bon Israél.

⁹Benntùn tse bo na' nkwù njam yen nge' là lo kum benntùn 24 000.

¹⁰Tshùaben tshob Mosé ndù:

¹¹Ngale'te Finéas, nshum Eléazar, nshum Aron fite ntù àm, num yantù z'a be netèt ba Israél mba yàm tu wut là, ndùlala bèn ngù kà me ke biagte ba Israél fa yoṅ ntshù'.

¹²A tshùa njam yen nu là, ntshob ndù: Me ghù bwôntù, mbam ndù bag yi wat kàn ndù fite be.

¹³Sen kàn nà b'a num i mba num tunndà i. Sen kàn nà nsi ghù a tù' ngale'te njoṅ ngelaṅ fa, ke ghù ndù i, nummbe a yab ntù num nu Tshùaben, ngù mat nebiagte nukebwô bon Israél.

¹⁴Mén Israél ze bo na' nzwi i bo ngon Madian nà na' mb'a Zimri, nshum Salu, ngalôte nzwit Siméon.

¹⁵Lén ménngon ze bo na' nzwi i bo yi là na' mb'a Kozbi, ngon Tsur, ngalôte mo' tunndà, ndùlala b'a mbe tunndà Kozbi ba Madian.

¹⁶Tshùaben tshob Mosé ndù:

¹⁷Lo' ba Madian mba ghakeban nà, nzwite yube.

¹⁸Nummbe bo la'te wut tshob mba ghakeban tsin nà, ndo' lamte mfùte zin yi ntùm nu Béor, mba ntùm nu Kozbi, ngon ngalôte benntùn mà Madian, mba nu mfèl i ze mènnzwi ze bo na' nzwi ze num nu ntsha Béor là.