Read Medumba Nesiaṅe 29 Bible Online

Nesiaṅe 29 - Medumba bible

Nesiaṅe 29

¹Num mbwe lé'njù ntùm maṅwù sammbàa, bin nsi ghù ntse'te nelàne, kà bin fa' sàm fa' neta. A b'a lé'njù netô nta mfà ku'u.

²Bin nsi fà ju neton a kù, z'a lamte là Tshùaben, a nsi b'a: Ta' ndu mfô, ta' kekomnjù, bon njùmbwe sammbàa tse bo tswe tamngu' là, ze mbit ke' be num bo là,

³ngù ju nefà mbab bàn, ndù bo tshwibte bo mfèt, nze tat num nze gham num ndu mfô, nze bàa num nze gham num kekomnjù.

⁴Num bon njùmbwe sammbàa, bo nke ndo' nze ntshù' num nze gham num ta' mén njùmbwe,

⁵nkwi'te num ta' fot mbwe num nebiagte nukebwô, num mat nebiagte yi num lén sine.

⁶Ke tamte num ju neton a kù mba tshu nefà, mba tse nemiag tse bin num ngù num ntshùa maṅwù là, a be ju neghù num njoṅ ngelaṅ fa là, ngù be mat ze bin num nto' ngù là. A b'a jujù ze ywèt tse num ndamte Tshùaben nà.

⁷Num lé'njù gham, be num yen maṅwù là, bin ghù lé'njù nelàne, ntswe ke jù ju, ke fa' sàm fa' neta.

⁸Bin nsi ton nyàm tse nelamte Tshùaben, a b'a ta' ndu mfô, ta' kekomnjù, ngù bon njùmbwe ke mbit sammbàa, tse bo tswe tamngu' là,

⁹ngù ju nefà, mbab bàn ndù bo tshwibte mfèt, nze tat num nze gham num ta' ndu mfô, nze bàa num nze gham,

¹⁰num ta' mén njùmbwe num bon njùmbwe sammbàa.

¹¹Kà ngù ta' fot mbwe num nele'te num nukebwô, kà mbèn ngù ju nele'te num nukebwô num lé'njù nelagte nukebwô ze ndùb, mba ju neton a kù, bo ju nefà num nemiage.

¹²Num lé'njù ntshob tàn gham, num maṅwù sammbàa, bin nsi ghù ntse'te nelàne. Kà bin fa' sàm fa' neta. Bin nsi tsiaṅte num lén Tshùaben num lé'njù sammbàa.

¹³Bin nsi fà ju nelamte Tshùaben, a b'a du mfô ntshob tat gham, nkekomnjù mbàa, bon njùmbwe ntshob kuà gham, nyàm tse bo ke' ghù mbit là;

¹⁴ngù ju nefà mbab bàn, ndù bo tshwibte mfèt, nze tat num nze gham mba num zit ta' ndu mfô lo; nze bàa num nze gham mba num zit ta' kekomnjù lo,

¹⁵nze ntshù' num nze gham mba num zit mén njùmbwe lo num bon njùmbwe ntshob kuà gham.

¹⁶Kà ngù ta' fot mbwe num nelagte nukebwô, ke lagte ju neton a kù, z'a b'a ju neghù njoṅ ngelaṅ fa là, mba ju nefà num nemiag nsi.

¹⁷Num mbatte lé'njù bàa, a b'a du mfô ntshob bàa gham, nkekomnjù mbàa, bon njùmbwe tamngu', ke mbit, ntshob kuà gham,

¹⁸ngù ju nefà mba tse nemiag num tu ndu mfô, nkekomnjù mba bon njùmbwe, kà bo be be ndù ke lo, ntùm mat neghù;

¹⁹ngù ta' fot mbwe num nele'te num nukebwô, ke siaṅ ju neton a kù, mba tshu nefà, mba tse tshu nemiag ts'a num mbe njam bwe là.

²⁰Num lé'njù tat, du mfô ntshob ntshù' gham, nkekomnjù mbàa, bon njùmbwe ntshob kuà gham, tse bo tswe tamngu' là, nyàm ke mbit.

²¹Ngù ju nefà, mba ju nemiag num du mfô, nkekomnjù, mba bon njùmbwe, ke bo be be ndù ke lo, ntùm mat neghù,

²²ngù ta' fot mbwe num nele'te num nukebwô, ke siaṅ tshu neton a kù, ju neghù njoṅ ngelaṅ fa, ngù ju nefà mba ze nemiage, z'a num ntum njam bwe là.

²³Num mbatte lé'njù kuà, du mfô gham ntùm mat neghù. Nkekomnjù mbàa, bon njùmbwe ntshob kuà gham, tse bo kum tamngu' là, nyàm ke mbit.

²⁴Ngù ju nefà mba ju nemiag nsi num du mfô, nkekomnjù mba bon njùmbwe; kà bo be be ndù ke lo, ntùm mat neghù.

²⁵Kà ngù ta' fot mbwe num nele'te num nukebwô, ke siaṅ ju neton a kù bo ju nefà mba ze nemiag nsi z'a num mbe njam bwe là ntùm mat neghù là.

²⁶Num mbatte lé'njù tàn, du mfô bwe'e, nkekomnjù mbàa, bon njùmbwe ntshob kuà gham tse bo tswe tamngu' là, nyàm ke mbit.

²⁷Ngù ju nefà mba tshu nemiag nsi num du mfô, nkekomnjù, bon njùmbwe, ke bo be be ndù ke lo, ntùm mat neghù.

²⁸Kà ngù ta' fot mbwe num nele'te num nukebwô, ke siaṅ ju neton a kù, bo ju nefà mba tshu nemiag nsi, ts'a be mbe njam bwe là.

²⁹Num lé'njù ntôge, du mfô fome, nkekomnjù mbàa, bon njùmbwe ntshob kuà gham, tse bo kum tamngu' là, nyàm ke mbit.

³⁰Ngù ju nefà mba ju nemiag nsi num du mfô, nkekomnjù, bon njùmbwe kà bo be be ndù ke lo, ntùm mat neghù.

³¹Kà ngù ta' fot mbwe num nele'te num nukebwô, ke siaṅ ju neton a kù, bo ze ju nefà mba tshu nemiag nsi z'a num mbe njam bwe là, ntùm mat neghù.

³²Num lé'njù sammbàa, du mfô sammbàa, nkekomnjù mbàa, bon njùmbwe ntshob kuà gham, tse bo kum tamngu' là, nyàm ke mbit.

³³Ngù ju nefà, mba tse nemiag nsi num du mfô, nkekomnjù, bon njùmbwe ke bo be be ndù ke lo ntùm mat neghù.

³⁴Kà nkwi'te ta' fot mbwe num nele'te num nukebwô, ke siaṅ ju neton a kù, ju ke tag, bo ze ju nefà mba tshu nemiag nsi, ts'a num mbe njam bwe là.

³⁵Num lé'njù fome, a b'a miagte lé'njù ndùb, kà bin fa' sàm fa' neta.

³⁶Bin nsi lo' ju neton a kù, ju nelamte, nèn yi mbwe Tshùaben, a b'a: Ndu mfô, ta' kekomnjù, bon njùmbwe tamngu' sammbàa, nyàm ke mbit.

³⁷Kà ngù ju nefà mba tse nemiag nsi num ndu mfô, kekomnjù boa bon njùmbwe, ke bo be be ndù ke lo, ntùm mat neghù.

³⁸Kà ngù ta' fot mbwe num nele'te num nukebwô, ke siaṅ ju neton a kù, ke bate, ngù ze ju nefà mba ju nemiag nsi, ts'a be njam bwe là.

³⁹Tshù ju ze bin nsi fà Tshùaben num lé'njù ze bo nsi la'te bin nà, ke tamte num tsin tshu nefà num nele'te ntùm zin nekô, ntùm bwôntù; tshu neton a kù, tshu nefà mba mbab bàn, mba tshu nefà num nemiag nsi mba ndu' là, mba tshu nele'te num fite.