Read Medumba Nesiaṅe 3 Bible Online

Nesiaṅe 3 - Medumba bible

Nesiaṅe 3

¹Tshù tunndà Aron bo Mosé ngelaṅ ze Tshùaben na' ntshob nu Mosé tu mbat Sinaï li.

²Tshù ndèn bon Aron li: Nadaf, tuswe i, Abihu, Eléazar ngù Itamar.

³Tshù ndèn bon Aron tse bo na' njo' yub ghale'te Nsi, mbèn nte yub num fa' Nsi, ndù bo ke nde't'é là.

⁴Nadaf, Abihu, kwù mbwe Tshùaben mba bo na' mfette mbwôg ghua, mbwe Nsi num mbat Sinaï là. Bo lo be kwù num mbat Sinaï ndùlala ndù bo ke' ghù bon bandum. A b'a Eléazar bo Itamar bèn nke nde'te Nsi mbwe tà yub.

⁵Tshùaben tshob Mosé ndù:

⁶Ghù ndù tunndà Lévi ghebte. O nsi te yub mbwe ngale'te Aron ndù bo ke mfa' fa' se.

⁷Bo nsi ke mfa'a, a nke ndôte mba ntse'te, nke ndôte mbwe ndà mbumte, ke ke mfa' à num tshu ts'a be mum ndà là.

⁸Bo nsi ke ndôte njoṅ tshu fa' fa ntùm ndà mbumte, mba ts'a lôt'a bon Israél là, bo nsi fa' mum ndà mbumte.

⁹O nsi fà ben Lévi boa bon tse Aron, a be yub ju ze bon ba Israél fà bo là.

¹⁰O nsi te Aron boa bon tse num nele'te Tshùaben. Bo nsi zwi ngùn z'a ghebte mbaṅ bo là.

¹¹Tshùaben tshob Mosé ndù:

¹²Tshù me lo' bon Lévi netèt bon Israél num tu tuswe bon, tuswe bon ba Israél, ben Lévi nsi b'a tshàm ben.

¹³Nummbe tuswe bon b'a yàm ju, fe lé'njù ze me na' nzwite tuswe bon mà Egipto là. Me lo' njoṅ tuswe bon fa, bo b'a yàm ju. Tuswe benntùn mba tuswe ba nyàm b'a yàm ju. A b'a me Tshùaben.

¹⁴Tshùaben tshob Mosé tu mbat Sinaï ndù:

¹⁵Siaṅte tunndà Lévi, be mba bo be yi là. O nsi siaṅ njoṅ bandum fa neto'te num ta' maṅwù mba tse bo tshùate là.

¹⁶Mosé siaṅ ben Lévi, mba Tshùaben bètt'é là, nju' ntshu ngù ndùlala.

¹⁷Tshù ndèn bon Lévi li ndù: Gerson, Kéhat, ngù Méhari.

¹⁸Tshù ndèn bon Gerson ntùm tunndà li ndù: Libni bo Shiméi.

¹⁹Tshù ndèn bon Kéhat ntùm tunndà li ndù: Amram, Yitsehar, Hébron ngù Usiél.

²⁰Bon Méhari ntùm tunndà: Mashi ngù Mushi. Tshù bon Lévi là mba tunndà ba tà tshob na' mbe là.

²¹Tunndà Libni bo Shiméi na' ntum a ju Gerson, bo nke ntsiaṅ yub ndù ben Gerson.

²²Bo siaṅ ndèn bon bandum fa neto'te num ta' maṅwù, mba tse bo tshùate là bo be ntsha' sammbàa ngù nkù tàn.

²³Tunndà Gerson nke nzi yub bag ntumnyam, njam ntàb mbumte.

²⁴Ngatô tunndà num ben Gerson na' mb'a Eliasaf nshum Laél.

²⁵Fa' ben Gerson num ndà mbumte na' mb'a nelôte dù'nsi, nu ntàb, ju nekabte, nzwe nekabte nzendà ntàb.

²⁶Boa nzwe ndù a sage ze nelam ndà mbumte yi boa ndeb nelo' mfa' fa' yi num yen ndà mbumte là.

²⁷Bon tse bo tum num Kéhat là b'a tunndà Amram, tunndà Yitsehar, tunndà ba Hébron, tunndà ba Usiél: Tshen nà na' mbèn mbe tunndà Kéhari.

²⁸Bo siaṅ njoṅ bandum fa, neto'te num ta' maṅwù mba tse bo tshùate là bo tum ntsha' fome ngù nkù ntôge, tse bo ke mfa' fa' num dù'nsi là.

²⁹Tunndà Kéhat, kut yub mbàn bag mà ntèn num ndà mbumte.

³⁰Ngatô tunndà num ben Kéhat na' mb'a Elisafan, nshum Usiél.

³¹Tshu tse bo ke ndôte là na' mb'a Koṅ, téblé, lambo, dù' neton tshu, tshundà, nzwe boa tshu nefa' fa' yi.

³²Ngatô ben Lévi na' mb'a Eléazar, nshum ngale'te Aron. A na' mbèn nke nte lag num njoṅ benntùn fa tse bo ke mfa' num ndà mbumte là.

³³Benntùn tse bo na' ntum num Méhari là na' mb'a tunndà Mashi, mba tunndà Hushi, bo tamte fa mbe ntô Méhari.

³⁴Ben tse bo na' nsiaṅ njen, bandum tse bo tswe ta' maṅwù, mba tse bo tôg là na' mb'a ntsha' ntôge ngù nkù bàa.

³⁵Ngatô tunndà Méhari na' mb'a Tsuriel, nshum Abihaïl, bo nke nzi yub ntùm mbàn bag mfe tu.

³⁶Bon Méhari nke nte yub lag num tshu nekut ndà mbumte yi, ntù nema' tù, ngag, tshundà mba ts'a be njam bwe là.

³⁷Ba ntom ntshundà ndiaṅ mbume, tun tse, ntom mba nkù netaṅ ju yi.

³⁸Mosé, Aron boa bon tse nke nzi mbwe ndà mbumte bag ntumnyam num dù'nsi, yub ju neghù b'a neke ndôte ndà mbumte ze bo na' mfà bon ba Israél là, ngùn z'a nsi ghebte mbaṅ bo là nsi kwù.

³⁹Njoṅ bon Lévi fa tse Mosé bo Aron na' nsiaṅ njene, tunndà tunndà mba Tshùaben na' mbètte là, bon bandum tse bo tswe ta' maṅwù mba tse bo tshùate là, na' mb'a ntsha' ntshob bàa ṅam mbàa.

⁴⁰Tshùaben tshob Mosé ndù: Siaṅ njoṅ tuswe bon bandum fa num bon ba Israél, neto'te num ta' maṅwù mba tse bo tshùate là, ndèn njoṅ ndèn mub fa.

⁴¹O nsi lé' bon Lévi me, me b'a Tshùaben, ndo' mbate tuswe bon bandum ba Israél yi. Be ndaṅndaṅ, o nsi lé' tuswe ba nyàm bon ba Israél.

⁴²Mosé siaṅ tuswe bon bandum ba Israél mba Tshùaben mbètte là.

⁴³Njoṅ tuswe bon bandum tse bo na' nsiaṅ njen nà, neto'te num ta' maṅwù mba tse bo tshùate là kum ntsha' ntshob bàa ṅam sammbàa ngù ntshob tat bon sammbàa nkù.

⁴⁴Tshùaben tshob Mosé ndù:

⁴⁵Lo' bon Lévi ndo' mbate tuswe bon ba Israél tse bandum, mba num ba nyàm, ben Lévi fa b'a tshàm. Me b'a Tshùaben.

⁴⁶Netshu' ben ntshob tat bon sammbàa nkù bàa z'a tôg num ben Lévi, netèt bon ba Israél là,

⁴⁷o nsi lo' nkàb nze tàn num tu ta' mèn, ndo' a num nkàb dù'nsi z'a b'a gera ṅam mbàa là.

⁴⁸O nsi fà yen nkàb là Aron boa bon tse num netshu' bon tse bo dut tu bon tunndà Lévi là yi.

⁴⁹Mosé lo' nkàb netshu' bon z'a dut là.

⁵⁰A lo' nkàb tuswe bon ba Israél a be ndô nkàb ntsha' mbùm ngù ntshob tàn bon ntôg nkù tat num ndô nkàb dù'nsi.

⁵¹Mosé fà ndô nkàb netshu' bon, Aron boa bon tse, mba Tshùaben ke mbètte là, ngù be ndaṅndaṅ mba Nsi na' mbètte Mosé ndù a ghù là.