Read Medumba Nesiaṅe 32 Bible Online

Nesiaṅe 32 - Medumba bible

Nesiaṅe 32

¹Bon Rubèn mba bon Gad lo ghù bwoṅ nyàm ndùb neshu. Bo lôte ngô Yaser mba ngô Galad, njen ndù a bwô num nyàm tshobe.

²Bon Rubèn mba tse Gad se' ntèt Mosé ntshob yi bo ngale'te Eléazar mba ghatô benntùn ndù.

³Atarot, Dibon Yaser, Nimra, Hesbon, Eléalé, Séram, Nébo, Béon.

⁴Ngô tse Tshùaben bèn na' mbiagte yub mbwe ba Israél là, b'a ngô ndù a bwô num bwoṅ nyàm; kuan tsho, ne ngù bwoṅ nyàm.

⁵A be ze se yag làn mbwe o là, o ghù yen ngô li tù' dù' tsha' kuan tsho, kà ghù ndù bag dut Yordan.

⁶Mosé tshob bon Gad mba tse Rubèn ndù: Yé! Fèt tsin be nèn ntsho, bin ghô zin sen ni ké?

⁷Numke bin nke nkôgte nku bon Israél ndù kà bo tsho ntùm ngô ze Tshùaben fà bo là à?

⁸A b'a ju ba tà tsin na' ngù ngelaṅ ze bo na' ntum yub Kadèsh-Barnéa ndù bo nèn ntom ngô là.

⁹Bo lo ko' tà nèn nkum tômbo' Eskol, ngelaṅ ze bo na' ndèn ngô kua' mebwô là. Bo kag bot num bon ba Israél ndù kà bo bam netsho ntùm ngô ze Tshùaben fà bo là.

¹⁰Tshùaben lo ya ntù bo num sen lé'njù là ntshob ndù:

¹¹A ghù be ke lo, mba tshen ben ni tse bo ko' Egipto, tse ngu'njù 20 mba tse bo tshùate là, ke nsi yen tsha'a ze me na' mbù Abraham, Isak mba Yakob là, nummbe bo lèt wut num netam njam àm!

¹²Nsô nda' Kaléb, nshum Yéfuné ze Kén mba Yoshua nshum Nun netèt bo, nummbe bo lo kô netam njam Tshùaben ke lèt wut.

¹³Tshùaben ya ntù bo, ngù bo nke ntsha num kônkwa num ngu'njù ṅam nkuà, tà nkum ngelaṅ ze yen zwiaṅ benntùn tse bo na' ngù ju z'a ke' bwô Tshùaben na' mi là.

¹⁴Mba bin, ntô ben kebwô, bin tshwèt mbèn nke nte ku be num ju ze ba tà tsin na' nke ngù là, num neghù ndù ntù Tshùaben bèn nja à num ba Israél.

¹⁵Nummbe bin netsin netam njam i, mb'a nsi bèn kwi'te lé'njù bon ba Israél num kônkwa, ngù benntùn bi.

¹⁶Bo ghebte mbaṅ Mosé, ntshob yi ndù: Bag nsi kut kàb nsen ni, naṅ bwoṅ nyàm tshag ntùm bwe, kut ngô num bon tshage.

¹⁷Yag tu wut tshùb tshu ntsho, netsin mbwe bon ba Israél, bag bo nèn ntsho, tà nkum ngelaṅ bag ghù bo tsho ntùm yub dù' là. Bon tshage tù' nsen ni, ntùm ngô ze bag kut mebwô là, ndù kà ba ntùm yen ngô là se' nkam yube.

¹⁸Bag ke nsi bèn ndà bag, ke be ndù mba zit mèn Israél lo ghù ze dù' ntsi'i.

¹⁹Bo ke ngabte be ngô ze bo kwé là, mba bag ke nsi kwé sàm ju, nummbe yag ju ntsi' b'a yen yoṅ Yordan ni.

²⁰Mosé tshob bo ndù: A be ze bin tshùb tshu ntsho, ngù ndùlala mbwe Tshùaben num nenèn tshwèt ntsho là.

²¹A be ze njoṅ bandum fa ghua' ntsha dut Yordan mbwe Tshùaben, nèn ma' ntsho, tà nkum ngelaṅ z'a yoṅ ghakeban tse là.

²²Bin bèn nèn be nda' yoṅ ntshù' ntùm ngô z'a vù nsi mbwe Tshùaben nà, mba bin làn mbwe Tshùaben mba mbwe ba Israél; mba yen ngô li nsi tù' dù' tsha' zine mbwe Tshùaben.

²³Là, bin ne nyà ke ghù ndùlala, mba bin ghù nukebwô mbwe Tshùaben. A be ndùlala bin lèn ndù nukebwô tsin nsi tam njam bin.

²⁴Bin kut ngô num bon tsine, nkut kàb ma' njùmbwe tsin bwe, là bin tshùb ju nka'ni z'a nsi tum ntshu bin nà.

²⁵Bon Gad mba tse Rubèn tshob Mosé ndù: Kuan tsho nsi ghù mba Tshùaben yag tshob là.

²⁶Zwi tshage mba bon tshage, bwoṅ nyàm tshage nsi tù' ntùm yen ngô Galad li.

²⁷Kuan tsho fa, lo' tshu ntsho nèn ntsho yi ntshùa mbwe Tshùaben ndaṅndaṅ mba Tshùaben yag tshob là.

²⁸Mosé tshob ngale'te Eléazar, Yoshua, nshum Nun, mba ben ndùbndùb netèt ba Israél ndù.

²⁹A be ze bon Gad mba bon Rubèn ma' ntsho ndut Yordan bin à bo, netshùa mbwe Tshùaben nèn ntsho là, mba ngelaṅ ze bin nsi lo' yen ngô là, bin fà ngô Galad bo mba yub ju ntsi'i là.

³⁰Là, bo nyà ke nèn ntsho bin à bo, mba bo nsi ghù dù' ntsi' à netèt bin, Kanaan.

³¹Bon Gad mba tse Rubèn bùnte ndù: Bag nsi ghù ju ze Tshùaben tshob kuan tse là.

³²Kua' tu wut tshage nsi tshùb tshu ntsho ntshùa yi mbwe Tshùaben ntùm ngô Kanaan. Là, yag ju ntsi' b'a yen yoṅ Yordan ni.

³³Mosé fà ngô Sion, mfen ba Amor mba nufen Og, mfen Basan, ngô mba bontsit ngô, mba ngô tse bo be mbaṅ bwe là bon Gad mba bon Rubèn, mba mo' bag benntùn ntùm tunndà Manasé mén Yosèf.

³⁴Bon Gad kut ngô Dibon, Atarot, Aroer.

³⁵Astra, Sofa, Yaser, Yogbola.

³⁶Bét mba Bét-Haram, nkut kàb nebéb ngô yi mba kàb nenaṅ njùmbwe bwe.

³⁷Bon Rubèn bèn nkut yub Hesbon, Eléalé, Kiriatam.

³⁸Nébo, Baal-Méon, ze bo bèn mbate ndèn mub là, mba Sifua. Bo fà ndèn ghua ngôngô tse bo bèn nkut là.

³⁹Bon Makir, bon Manasé, nèn Galad ndo' ngô, nta' ba Amor tse bo ke ntswe ntùm ngô là.

⁴⁰Mosé fà Galad Makir, mén Manasé, a te bwe.

⁴¹Yair, nshum Manasé nèn ma' ntsho nkwé mbàn yàme, ntswi ndèn mub ndù mbàn Yair.

⁴²Nova ma' nkwé ze Kenat mba tsemo' ngô nke'nke'e mbaṅ bwe, ntswi lén se num i ndù Nova.