Read Medumba Nesiaṅe 35 Bible Online

Nesiaṅe 35 - Medumba bible

Nesiaṅe 35

¹Tshùaben tshob Mosé tômbo' Moab kaṅntse Yordan, yoṅ Yériko ndù:

²Tshob bon ba Israél ndù bo séb dù' tsha'a num tsha' tshob mfà ntô Lévi, ntùm ngô ze bo nsi te bwe là, mbèn mfà tsha' bo nediaṅ ngô nke'nke' mbume.

³Tsha' ntùm ngô bwe num netswe bwe ze ndùngô ndiaṅ mbume bwe num ba nyàm tshob mba tshu tshobe.

⁴Tsha' bontsit tusô ze bin nsi fà ntô Lévi là nsi to'te num sagba' kàbngô nema' mfi' kam bu tsha' bàa, ndiaṅ mbume,

⁵nse' njam njù, bin fi' kam bu ntsha' bàa num bag ntumnyam, nse' bag mà ntèn ndo' kam bu ntsha' bàa, nse' num bag netèt bag mà ntèn bo mfe tu ndo' kam bu ntsha' bàa, nse' num bag mfe tu ndo' mfi' kam bu ntsha' bàa, ngô be netèt. Tshù tsha' ze bo nsi ghù njam tusô ndiaṅ mbum nà.

⁶Ntusô ze bin nsi fà ntô Lévi là, nsi b'a ntusô ntôge, dù' nekù ndeme, ze bin nsi te ndù ghazwi benntùn nke nkù nse' ndem bwe là, bin nsi bèn kwi'te memo' tusô bwe ntshob bàa ṅam nkuà.

⁷Ntusô mi bin nsi fà bo là nsi tamte fa b'a ntshob fome ṅam nkuà, mba sit tusô lo, bo tse tsha'a.

⁸Nse' num tshen tsha' là, tse bin nsi kwé fà bon ba Israél là, bin kwé tsha' yàme mènntùn ze tse tsha' yàm nà, nkwé metsili mènntùn ze ntsha' kag là: Mba zit tunndà lo nsi sébte tse tsha' fà ntô Lévi be mb'a na' nkwé là.

⁹Tshùaben tshob Mosé ndù:

¹⁰Tshob bon ba Israél ndù: Ngelaṅ ze bin nsi dut Yordan tsho ntùm ngô Kanaan nà,

¹¹bin nsi tsho' ngô nekù ndem bwe bin. Ngazwi mèn z'a be zwi ke kô là nsi kù lem bwe.

¹²Men ntusô là nsi ywimte nekù ndem bwe kà bo yagte mba' ngazwi mèn. Bo ke' ghù nezwi mènntùn nà ke be ndù bo lo' i nèn yi mbwe ntse'te benntùn ndù bo tsho'te ntsha i.

¹³Bin nsi tsho' ntusô ntôge netèt ba ntusô mi bin nsi ghù là, ndo' ngù ngô nekù ndem bwe yi.

¹⁴Bin nsi nèn yoṅ ntse Yordan ngù tshen dù' là bwe tat, nse' yoṅ Kanaan ngù mo' ta' i bwe, a be ntusô dù' nekù ndem bwe.

¹⁵Men ntusô nekù ndem bwe là nsi b'a num bon ba Israél, mba ba kùla', mba ntshùanze z'a be netèt bin nà. Mba zit mèn no z'a zwi mèn ke kô là, nsi kù nèn lem bwe.

¹⁶A be z'a lo' à tùn kà ndab i yi nzwi i là, mb'a b'a ngazwi mèn, mba bo nsi zwi yen ngazwi mèn nà.

¹⁷A be z'a ma' loṅ k'a ntam i a kwù là, mb'a b'a ngazwi mèn, mba bo nsi zwi yen ngazwi mèn nà.

¹⁸A be z'a be zwi i, ndo' kam tù z'a ghù nezwi mèn nà, kà ndab i yi a kwù là, mb'a b'a ngazwi mèn; mba bo nsi zwi yen ngazwi mèn nà.

¹⁹A b'a ngayagte mba' bèn zwi yen mèn nà, ngelaṅ ze bo yi bumte mo' dù' là, a zwi i.

²⁰Ke mènntùn lo' be lag kebàn, ke nema' ju ntshùag num i nzwi i lo,

²¹ke nelo' be nto' ntsham i yi ntùm ntù mba'a, a kwù lo, mba bo nsi ghù yen ngazwi mèn nà be mba ngazwi mèn nà. A b'a ngayagte mba'a bèn zwi yen mèn nà, dù' ze bo yi bumte bwe là.

²²Là, a be z'a tèn i, ke be ndù a ghù ntsha bo yi, ke nema' mo' ju ntam i yi, ke tam a ntù kebwô;

²³ke nebe ma' loṅ, ke yen i, a tam i, nzwi i, a be ghù yi ndùlala, ke ghù à ntù kebàn, ke diag à nukebwô num i,

²⁴mba ntse'te benntùn nsi tshùa num tshen nu tse bo yab là, nkeb ntsha netèt ngazwi mèn bo ngayagte mba'a.

²⁵Ntse'te benntùn nsi yôg ngazwi mèn bu ngayagte mba'a, ndo' i mbèn yi ntùm ngô nekù ndeme, dù' z'a na' nkù nèn ndem bwe là, a tswe bwe tà nkum ngelaṅ ze ngale'te ze ndùb ze bo na' ndo' mfèt nelàne njo' i yi nsi kwù là.

²⁶Là, a ne mbe ze ngazwi mèn tum ntùm ngô nekù ndeme,

²⁷ngayagte mba' yen i mo' dù' là, a ke be ntùm ngô nekù ndem nà, a zwi i, mb'a ke' ghù tse nukebwô.

²⁸Ngazwi mèn nsi tswe à be ntùm ngô nekù ndeme, tà nkum ngelaṅ ze ngale'te ze ndùb kwù là. A nsi bèn njam la' i ngelaṅ ze ngale'te ze ndùb kwù là.

²⁹A b'a ju neghù netèt bin num njoṅ zwiaṅ benntùn fafa, mba yà lo ze bin nsi tswe bwe là.

³⁰Mbe se' num njoṅ nezwi mèn fa, bo ke nsi zwi ngazwi mèn, o ke' ghù nezwi mèn z'a zwi mèn nà.

³¹Kà bin kwé nkàb mèn z'a zwi mèn nà nummbe bo nsi zwi i ze.

³²Kà bin nekwé nkàb i faṅ i, a diag dù' ntùm mo' ngô nekù ndeme, ke nefaṅ i a bèn njam la' i, ngale'te ze ndùb ke yoṅ nkwù.

³³Kà bin bagte ngô ze bin tswe bwe là, lem b'a ju z'a num mbagte ngô là. Bo nsi lo' à be lem mèn z'a fètte là kà nsôg ngô ze bo fètte lem bwe là.

³⁴Kà bagte ngô z'o num ntswe bwe là, nummbe me b'a Tshùaben nke ntswe netèt bon ba Israél.