Read Medumba Nesiaṅe 6 Bible Online

Nesiaṅe 6 - Medumba bible

Nesiaṅe 6

¹Tshùaben tshob Mosé ndù:

²Tshob ba Israél ndù: A be ze mandum ke mènnzwi lo, bam nesô wul i num tsemo' benntùn, mbam nefà wul i Tshùaben nà,

³yen mèn nà z'a bam neze ju, mb'a fà wul i Nsi là, ke nsi nu ndu' z'a num ngù mènntùn bum nà, a ke nsi nu ndu' ntene, mba ndu' ngefele, ke bwete ndu' ntene bo ndu' nkùa, ke fèt mba ntù nedùmte mi fi mba mi njum.

⁴Yen ngelaṅ nà z'a bam neze ju là, kà sàm ju z'a fe à num tù ndu' là, neto'te num miag ntàm tù tà nèn nkum num ngub tse.

⁵Num yen ngelaṅ neze ju là, kà bo kom tu i, tà nkum ngelaṅ ze neze ju mi, mb'a na' nka' là. A nsi b'a ntùm nelàne faṅ nyiaṅtu tse a ke nsage.

⁶Num yen ngelaṅ nà z'a bam ju Tshùaben nà, a ke nsi ghebte mbaṅ fe mèn.

⁷A ke nsi ket ṅu'u num fe tàab, màab, mfèl i ze mandum ke ze mènnzwi lo, tse bo kwù là, kà ket ṅu'u num fe yube, nummbe a ket ju tu i, a nke nda'te ndù a fà wul i Nsi.

⁸Num njoṅ ngelaṅ neze ju fa, a nsi fà wul i Tshùaben.

⁹A be mèn kwù mbaṅ i be ndende, a yen, nsu ṅu'u num tu i z'a fà Nsi là mb'a nsi kom tu i num lé'njù nelànte wut, nkom tu i num lé'njù sammbàa.

¹⁰A be kum lé'njù fome, a lo' fôgtab ngab bàa ngù bwoṅtambia' bàa ndo' nèn yi ju ngale'te, nzendà ba' mbumte.

¹¹Ngale'te nsi zwi mo' ta' i num nukebwô, nton mo' ta' i a kù, ndo' ngamte Nsi yi, ngù ndùlala ndo' nsôgte nukebwô tse yi mb'a yen fe mèn nà. A nsi ghù ndùlala tu i tù' nelàne num sen lé'njù là.

¹²A nsi bèn fà wul i ghua ntshùate num ngelaṅ z'a na' njab là, mfà njùmbwe tamngu' nelo' mbètte nelagte nukebwô tse yi, bo ke mbèn nsiaṅ lé'njù z'a na' njab là, nummbe a ket ṅu'u num ju neze z'a na' mbam nà.

¹³Tshù ntshù' mfà num neze ju ngelaṅ z'a nsi miagte neze li: Bo nsi ghù a se' nzendà mbumte.

¹⁴A nsi fà ju neghamte Nsi. Mén njùmbwe ke lo' z'a tswe tamngu' là, num neton a kù ndo' nde'te Nsi yi, njùmbwe ke lo' z'a tswe tamngu' là num nesôgte nukebwô tse yi, ngù kekomnjù z'a tswe tamngu' là, num nefà me bam Nsi.

¹⁵Ngù bàn ke ko' ntùm kesoṅ ndune, ngù tag nekate ndù bo lo' a mfèt kà, ntébte yi, mbèn ngù mo' tag nekate ndù bo tsha mfèt num bwe, ngù ju nefà mba ju nefètte dù'nsi, be mba bo num to' ngù là.

¹⁶Ngale'te lo' tshen tshu là nèn yi mbwe Tshùaben mbèn mfà ze ju num nukebwô mba ze ju neton a kù ndo' nde'te Nsi yi.

¹⁷A lo' kekomnjù, mfà Tshùaben mba ju nele'te z'a num mfà fite là, ngù nkesoṅ bàn keko', ntamte boa ju nele'te mba ndu' nefètte dù'nsi.

¹⁸Yen ngaze là kom tu i z'a fà Nsi là, mbwe ndà mbumte, ntswitte nyiaṅtu ts'a fà Nsi là ma' mbwôge a kù mbwe ju nele'te z'a num mfà fite là.

¹⁹Ngale'te lo' bu mbàb kekomnjù ze bo kate là, mba tag keko' ntùm kesoṅe, mba mo' ju nekate ze ju keko' ke' be bwe là, mbe ghù ndùlala ndù a kom tu i z'a fà Nsi là.

²⁰Ngale'te nyi'te yen ju là bag bag mbwe Tshùaben, a ju nelàne, ze ju ngale'te, ngù metsit kekomnjù z'a la'te, ngù ku i z'a nsi sô là, tshen tshu là nsi be tôge, ngabam neze ju nu ndu'.

²¹Tshù ntshù' mfà num mènntùn z'a bam neze ju là, tshù ze ju nefà Nsi num neze ju là, kà ngù ju z'a ku'ni nefà nkwi'te num tshen tshu là là.

²²Tshùaben tshob Mosé ndù:

²³Tshob Aron boa nshumnshum tse ndù: Tshù mba bin ghù naṅ fite num ba Israél li:

²⁴Tshùaben naṅ fite num o nke mbéb o.

²⁵Tshùaben fà se i nke ndôt'o, nko ndèn mo.

²⁶Tshùaben fà se i nke ndôt'o, mfà fite wù.

²⁷Bo tsi lén sàm ndùlala mbwe Israél kà me naṅ fite num bo.