Read Medumba Nesiaṅe 8 Bible Online

Nesiaṅe 8 - Medumba bible

Nesiaṅe 8

¹Tshùaben tshob Mosé ndù:

²Tshob Aron ndù: Ngelaṅ z'o tshwèt nke mbat ndambo là, ghù ndù mi sammbàa ke nké' mbwe dù' nete ndambo.

³Aron ghù ndùlala. A te ndambo sammbàa a nke nké' mbwe dù' nete ndambo mba Tshùaben na' mbètte Mosé là.

⁴Tshù mba bo na' nabte dù' nete ndambo yi là yi ndù: A na' mb'a gol, ndù bo na' ka ntswe num lam, neto'te tun bwe tà nèn nkum num mbu mi. Bo na' nabte yen dù' nete ndambo là, a be mfi' mba Tshùaben na' nda'te là.

⁵Tshùaben tshob Mosé ndù:

⁶Sô ntô Lévi netèt ba Israél, ndànte yube.

⁷Tshù mb'o nsi ghù num bo, kà lànte yub li: Miag ntse nelagte nukebwô num bo, bo lo' shua'tu nkom nyiaṅ yi num wut tshob, nsôg nzwe tshobe, ndànte wut tshobe.

⁸Bo lo' ndu mfô, ngù mbab bàn, lèn ze bo num nde'te Nsi yi là, bo tshwibte mfèt, mbèn ndo' mo' mfô num nele'te Nsi yi num nukebwô tshobe.

⁹O nsi ghù ntô Lévi se' mbwe ndà mbumte, o tse'te ba Israél fa.

¹⁰O nsi ghù ntô Lévi tsin mbwe Tshùaben, bon ba Israél ntshag mbu mube tu bo.

¹¹Mbe miagte Aron la'te ntô Lévi, be mba bo num ngù num ju nele'te Nsi là.

¹²Ntô Lévi nsi yab mbu mube num tu ba ndu mfô, mfà tshen du mfô là Tshùaben; mo' ta' i num nele'te num nelagte nukebwô, bo ton mo' ta' i a kù kà bo nde'te Tshùaben yi. A be num ntô bon Lévi mbe ju nesôge nukebwô tshobe.

¹³O nsi te ntô bon Lévi mbwe Aron boa nshumnshum tse. O nsi la'te yub be ndaṅndaṅ mba bo num ngù num ju nele'te Nsi là.

¹⁴O nsi sô ntô Lévi netèt ba Israél, bo tù' ben tshàm.

¹⁵Yen nà nsi be tôge bo se' nke mfa' ntùm ndà mbumte ba' lànte yube, nda'te yub be mba bo num nda'te ju nele'te Nsi là.

¹⁶Kua' nenùne, bo fà yub me, bo sô yub netèt ba Israél mfà me. Me lo' yub mbate njoṅ tuswe bon fa, yen nà bagt'a ndù tuswe bon ba Israél.

¹⁷Nummbe njoṅ tuswe bon fa, tuswe bon benntùn mba tuswe ba nyàm b'a yàm ju, neto'te mba me na' nzwite tuswe bon ba Egipto là. Me lo' njoṅ tuswe bon fa.

¹⁸Me lo' ntô Lévi mbate bon Israél yi.

¹⁹Me fà yub Aron boa nshumnshum tse, bo sô yub netèt ba Israél mfà me, ndù bo ke mfa' num ndà mbumte, ndù bo ke mfa' nebiagte nukebwô num ba Israél, ngelaṅ ze Nsi ghebte mbaṅ dù' nelàn nà.

²⁰A b'a ju ze Mosé, Aron mba ntse'te na' mfa' num ntô Lévi là.

²¹Ntô Lévi lànte wut tshobe, nsôg nzwe tshobe, Aron la'te yub be ndaṅndaṅ mba bo num nda'te ju nele'te Tshùaben yi là, mbiagte nukebwô tshobe, neghù bo làne.

²²Yen nà be tshùa, ntô Lévi nèn nto' fa' num ndà mbumte mbwe Aron mba nshumnshum tse. Bo ghù num ntô Lévi be ndaṅndaṅ mba Tshùaben na' ntshob Mosé ndù a ghù là.

²³Tshùaben tshob Mosé ndù:

²⁴Tshù ju neghù num ntô Lévi ngelaṅ ze bo kum ngu'njù ntshob tàn ṅam mbàa li: A b'a nefa' fa' num ndà mbumte.

²⁵Ngelaṅ ze mèn kum ngu'njù ṅam ntàn nà, a tsin, k'a nefa'a.

²⁶A ghù nda' nese' njwimte fèt tse ntùm ndà mbumte ngelaṅ fa', ke ghù tu fa'. Tshù ju z'o nsi ghù num fa' ntô Lévi là.