Read Medumba Mika 1 Bible Online

Mika 1 - Medumba bible

Mika 1

¹Tshù ntshob mi Tshùaben tshob Mika, ze Moréshet, num ze ngelaṅ Yotam, Akaz, Ezékia, fenfen Yuda li: Njem ze Mika yen num Samaria mba Yérusalém nà.

²Ntumntum, njoṅ zin fa ju'u! Tsha' mba tshu ts'a ntùm bwe là kù' ntoṅ! A bwô ndù Tshùaben Nsi kwé nta min kebwô, Tshùaben z'a be ntùm ntshwèl i ze nelàn nà!

³Tshù, Tshùaben tum ntùm dù'ntswe i, a swe', nke nzinte num dù' ṅaṅa num nsitsha'a.

⁴Ba mbat tshwèt nkôg tun nku mi, ntômbo' nke nga' nte nge, mba zin be njag mbaṅ mbwôg là, mba ntse be nswe' dù' swe'swe' là.

⁵Yen njoṅ i là fa b'a num nukebwô Yakob, yen njoṅ i là fa b'a num mfànnu tunndà Israél! Nukebwô Yakob b'a ke? A ke b'a Samaria ké? Yérusalém ke bèn ntù' tse mbwe' Yuda num kônga ké?

⁶Me nsi lo' Samaria ghù famla' yi mà tshwèt, dù' nebwe nkùa bwe. Me nsi tèn ndoṅ ba' mi ma' mà tômbo'o, te tun ba' tse tù nge.

⁷Me nsi be'te njoṅ tse neto nekom fa mfémfé, ton njoṅ tshu fa ts'a ghù mum nukebwô là ntùm mbwôge. Me nsi tsham njoṅ tse neto fa ts'a lo' nkàbfa' kat njun yi là. Tshen neto là nsi tù' nkàbfa' kat.

⁸A ndùlala me nsi kua'a, me nsi làne, me nsi zin nku banban, zin tunntôg. Me nsi kua' mba nka'ghun nà, me nsi làn mba lànmàṅa' là.

⁹Nummbe mfaṅ nèn tà nkum mà Yuda, nèn tà nkum nzendà yàm nzwit mèn, nèn tà nkum Yérusalém. Tshen mfaṅ nà b'a ketùn mfaṅe.

¹⁰Kà bin yob njo i mà Gat, bin fètte ntsenyà mà Ako! Bin soṅ wut tsin mum mbab mà Bét-Léafra.

¹¹Mènnzwi z'a be ntswe Safir là tôge. A b'a tunntôg, tuswe nke nko i! Mènnzwi z'a be ntswe Tsaanan nà ke' fèn ntù netume. Vù Bét-Esèl ghù ju nekabte zin ke bèn mbe.

¹²Mènnzwi z'a be ntswe Marot là tshwèt mvètte num yôg se, nummbe nge' z'a fe Tshùaben nà swe' tà nkum num tse nzendà Yérusalém.

¹³Mènnzwi z'a be ntswe Lakish, taṅte ghakùnde num kalig so. O na' mbèn ngù kà Sion nto' nevù ntùm nukebwô. Nummbe njoṅ mi mfànnu Israél fa b'a netèl o.

¹⁴A ndùlala, o nsi lé' lag so num Moréshet-Gat. Mba' Akzib nsi tù' nu tatte fenfen Israél.

¹⁵Me nsi bèn fà tà ngô ze nswe mènnzwi z'a be ntswe Marésha là. Ghamte, Nkuni, Israél nsi nèn tà kum mà Adullam.

¹⁶Kebte nyiaṅtu tsho, kom tu o, num nshumnshum tsho ts'o be nkô yub là; ṅ, fin tu o ndaṅndaṅ mba tshom nà, nummbe bo lo' nshumnshum tsho nèn yi ndà kuan tà ngùanesà mbaṅ o.