Read Medumba Mika 4 Bible Online

Mika 4 - Medumba bible

Mika 4

¹A nsi be be num miagte lé'njù bo te mbat ndà Tshùaben num tu tsemo' mbale. A nsi nèn tù tôg nkônga. Ngôngô nsi nèn bwe,

²Ntumntum nsi tèn bwoṅ nèn bwe, ke tshob ndù: Bin se' bag bin ko' nèn num mbat Tshùaben, mfe ndà Nsi Yakob, ndù a tswite ben tse manze, be ke nzin num tse ntshagnze. Nummbe kàn nsi tum à Sion, ntshob Tshùaben tum Yérusalém.

³Tshùaben nsi be ngatsho'te nzwit benntùn yàme, be ngatsiagte ngôngô tse neta, tse bo tà ngùanesà là. Bo nsi lo' ṅwi tshob tswe sofa' yi, lo' nkô mub tswe mbitshwèt yi; bo ke nsi bèn zi'te nele' ntsho,

⁴kà mèn tswe tun nkùa i, tun tshom se, ke ke mbwôge, nummbe yen nu là tum à ntshu Tshùaben tàndà ntsho!

⁵Nummbe njoṅ nzwit benntùn fa ke nzin à num lén nsi yub; là bag ke nzin yag à num lén Tshùaben Nsi yag, nzin ndùlal'a matmat.

⁶Tshùaben tshob ndù: A nsi be mum tshen lé'njù là me soṅte njùmbwe tse bo be nke'kèt là, kùmte tse bo sate là, mba tse me na' ma'ni yub là.

⁷Me nsi lo' tshé' ba nke'kèt te ngô yi, lo' tse bo ta' yub là ghù ngô neta yi. Tshùaben nsi tsin num mbat Sion sa' yube, neto' ndonni kà nèn miagte!

⁸Wù Sion nsi tù' dù' netsin bwe ndôte njùmbwe. Njwèn netô z'a be mbwe bo nufen mum tunndà Israél nsi bèn b'a yu me Ofél, wù kônga Yérusalém.

⁹Numk'o nke nkua' ndonni ntshag nz'o tù à? o ke' ghù mfen, ke bèn neghù ghafà ntag ké, kà ya ntshùb o mba mènnzwi z'a tshwèt mbwe l'à?

¹⁰Ngon Sion, yen nge', tswe mba mènnzwi z'a tshwèt mbwe là! Nummb'o a' tum ntùm ngô nèn ntswe à mà tshwèt. O nsi nèn tà kum Babilon, Tshùaben nsi kwé o à bwe. Tshùaben nsi tshu' o mum mbu ghakeban à bwe.

¹¹Ndonni ngô nzenze tse'te ndo nsi num o, nke ntshob ndù: Be lo' i ngù ju banban yi; a bwô ndù miag be ṅwate neyen i mb'a be fam nà.

¹²Là, bo ke' lèn nkwatenu Tshùaben, ke ju' ntenu mi, ke lèn ndù a lo tse'te yub mba nsa là dù' netsham nsa.

¹³Ngon Sion, lo nsi nyiaṅte nku, me nsi ghù ndô mu tù' tùne, ghù tun nku mu tù' tùn meba; o nsi nu bu ngô nzenze. O nsi lo' ntsha' fà Tshùaben, fà tshunkàb tshob Tshùaben njoṅ nsitsha' fa.

¹⁴Ndonni tse'te njoṅ ghale' ntsho fa me ngon ntshu ntsho! Bo lo' ze be ngô, bo lo' shua' tùn ndab ghe' ngatsho'te Israél yi.