Read Medumba Mika 6 Bible Online

Mika 6 - Medumba bible

Mika 6

¹Ju' ju ze Tshùaben tshob li: Lo tù ma' njom wut mu mbwe ba mbale. A bwô ndù nkônga ju' nz'o.

²Ba mbat ju' la'ntsha Tshùaben, mba neta ntom tsha' ju'u! Nummbe Tshùaben ghù la'ntsha bo ze nzwit mèn, A tshwèt nda' ntsha, nsa' kam bo Israél.

³Tshùaben bètte ndù: Nzwil àm, ke ze me na' ngù wù à? Me na' ngùtni o à num zit nu à? Bùnte me!

⁴Tshù, me lo ghù o ko' mà Egipto, me tshu' o mà ndà kuan. Me lo tum Mosé, Aron mba Miriam mbwe o.

⁵Nzwil àm, kwimte ju ze Balak mfen Moab tàmte là, bo ju ze Balaam nshum Béor bùnte yi là, neto' Sitim nèn nkum Guilgal là. A nsi tshùa ndùlala o lèn tse numebwô Tshùaben.

⁶Be me lo' à ke nèn yi mbwe Tshùaben, num nevù nsi mbwe Nsi z'a tà mfe tù à? Be me lo' nyàm netone, mén mfô z'a tam ngu' là nèn yi mbwe i ké?

⁷Tshùaben nsi bam nkomnjù ntsha'ntsha' ke nete' mfèt ntsha' gham no ké? Be me fà à tuswe àm num mfànnu màm ke ju z'a tum zwe' àm nà num nukebwô ntù àm ké?

⁸Wù mènntùn, bo lo ghù o lèn ju z'a bwô là, ju ze Tshùaben be mbètte ndù o ghù là. Yen nà b'a ndù o ghù nunetsine, nke nkô nu kondèn, mbèn nke nzin ntùm mbétni bin Nsi o.

⁹Nze Tshùaben kua' mum ngô; a b'a ywimte num mèn z'a bwôg lén se là, a bwô ndù bin ju' me tunndà, mba wù z'o tse't'é là.

¹⁰Tshunkàb lamte bèn nke' mum ndà ngatshùagntù ké? Mo' mfi' mfùm bèn nke' ze me ke' kô neyen nà ké?

¹¹Be mèn be nelàn ndùs'a ghù ba kilô mi à be mi fùte ke mfi' tatte lo bàm i là ké?

¹²Nefètte lem lo' tu tse ghankàb, tatte tshote tse ba la', lém sob be se fùte ntshu bo.

¹³A ndùlala me nsi lo' nge' lab o yi, me nsi sat'o num nukebwô tsho.

¹⁴O nsi ke jù, ke ywèt, nziku' nsi taṅ nga num o. O nsi yab ju ntùm nta ke bèn ndo'o, mba z'o nsi lo' là, me nsi ma' i num ntshùag ṅwi.

¹⁵O nsi ywile, là ke tsho'. O nsi tshab mba, là ke bé'te mfèt mi. O nsi diaṅ nkùa, là ke nu ndu' mi.

¹⁶O be nzin num ntenu Omri, mba ntùm ngùninu tunndà Akab, nke nzin à ntùm ntag mube; a ndùlala me nsi ghù bo sat'o, ghù ba la' tsho tù' ju tshabte. Bin nsi ket tuswe yàm nzwit mèn.