Read Medumba Nahum 2 Bible Online

Nahum 2 - Medumba bible

Nahum 2

¹Tshù nku ngantum z'a tshwèt ntshob fite là num ba mbale! Yuda, a bwô ndù o jù mu njùa, nzwiagte tsho nka'ni. Nummbe ngatshùagntù ke nsi bèn tôg netèl o. Bo biagt'é matmat.

²Ngabagte dù' lo nsi num o: Béb yu kàbngô, béb manze, taṅ so kob tun o! Lôte mba yu neta be yi là;

³nummbe Tshùaben bèn nte ghamte Yakob mba ghamte Israél. Nummbe ghalagte dù' lo lagte yube, mbiagte nkùa tshobe.

⁴Tshètntsho sa'nde' tshob b'a meba; ghama' ntsho ket nzwe mediba; nkalig be mbe se' tùn nke ma' nsa. A num mbe lé'njù s'a nabte num ntsho là bo sab nkô.

⁵Nkalig tshwèt njab nu num manze, nke ntsham dù' nène; bo tswe à mba ntswe'nka' là, bo ke nso nde à mba mbeba'mbaṅ nà.

⁶A kwimte tse neta benntùn. Là bo tshwèt mbe zin nke ngwù bag bag ntiage; bo tshwèt nànte nèn mbaṅ kàbngô, nke nabte wut netshètte yub njam.

⁷Nzendà kàbngô ts'a shù nze num nta'ntse là te nge, ntshwèt kôge.

⁸Bo lo lo' neto i nèn yi, ghafa' tse tse bènnzwi tshwèt ntswe mba mbwoṅtambia' là, nke ndab ntù yub mbu.

⁹Ninive b'a mba dù' ze ntse tse'te bwe là, ndù a dun. Bin tsine, bin tsine. Là sàm mèn ke kaṅ wul i.

¹⁰Bin lagte nkàb, bin lagte gol. Tshunkàb nsi ndù a yàm neshu, tshunkàb tse bo lo' njoṅ ju tanjoṅ fa nabte yi là.

¹¹Bo tshwèt ndagte dù', nke nsate dù'! Wut tshob, nku kôge, zwe' nke nja, ntshù njoṅ benntùn fa lab.

¹²Ngab ba ngwayit tù' b'a ndùke? Sen kin bon ngwayit là tù' b'a ndùke? Me dù à dù' ze ngwayit ke mbe nène, nzwi i mba mén nke ntswe bwe, sàm mèn ke be bwe z'a kamt'é là.

¹³Ngwayit lo ke nsé'te nyàm num bon tse, nke nyu' ntô nyàm num zwi tse; a lo ke naṅ nyàm ts'a zwite là ntùm ngab tse, nke naṅ mbàb ts'a sé'te là ntùm ntô tse.

¹⁴Tshùaben tàndà ntsho tshob ndù: Tshù, me lo nsi num o. Me nsi ghù nkalig mu kaṅ ntù' nzembwôge; bon ngwayit tsho nsi kwù num ntshùag ṅwi. Me nsi biagte ntsha' ts'o lagte là ntùm ngô; bo ke nsi bèn ju' nze tsho ghantum.